Yaponiya hökuməti əcnəbilər üçün viza rüsumlarını beş dəfə artırmaq qərarına gəlib. Bu, ölkədə son 50 ilə yaxın dövrdə qeydə alınan ilk kəskin qiymət artımıdır.
“BBC” xəbər verir ki, yeni qaydalara əsasən, 1 iyul tarixindən etibarən birdəfəlik giriş vizasının rüsumu mövcud 3 min yendən (18.69 dollar) 15 min yenə, çoxdəfəlik giriş rüsumu isə 6 min yendən 30 min yenə qaldırılacaq.
Yaponiyanın xarici işlər naziri Toşimitsu Moteqi jurnalistlərə açıqlamasında bildirib ki, 1978-ci ildən bəri ilk dəfə edilən bu dəyişiklik inflyasiya və valyuta məzənnələrindəki dalğalanmaları əks etdirmək məqsədi daşıyır. Nazir bu addımın ölkəyə gələn turist axınına dərhal mənfi təsir göstərəcəyini gözləmədiklərini vurğulayıb.
May ayında Yaponiyanın Yuxarı Palatası əcnəbilərlə bağlı digər rüsumların da artırılmasını nəzərdə tutan qanun layihəsini qəbul edib. Yeni dəyişikliklərlə daimi yaşayış müraciətləri üçün qanuni rüsum limiti mövcud 10 min yendən 300 min yenə (30 dəfə) yüksəldiləcək. Yaşayış statusunun dəyişdirilməsi və ya ölkədə qalma müddətinin uzadılması rüsumları isə 10 min yendən 100 min yenə qədər artacaq.
Yaponiya yeni 2021-ci ildən bəri davamlı olaraq dəyər itirir və hazırda son 40 ilin ən aşağı səviyyəsinə yaxınlaşır. Valyutanın ucuz olması və pandemiyadan sonrakı səyahət bumu ölkəyə rekord sayda turist cəlb edib. Ötən il Yaponiya rekord sayda, 42,7 milyon xarici turist qəbul edib.
Rəsmi dairələr rüsumların artırılmasını Yaponiyanın viza və miqrasiya xərclərini digər Böyük Yeddilik (G7) ölkələri ilə uyğunlaşdırmaq zərurəti ilə izah edirlər. Müqayisə üçün, ABŞ-yə qeyri-immiqrant viza müraciətləri 185-315 ABŞ dolları arasında dəyişir, Böyük Britaniyaya 6 aylıq standart turist vizası isə 135 funt-sterlinqə başa gəlir.
Təhminə VERDİYEVA,
“Azərbaycan”
jpg_1782135526.jpg)
