Cənubi Afrika Respublikasının (CAR) Durban şəhərində yerli silahlı dəstələrin hədəfinə çevrilən minlərlə miqrant rəsmi orqanlar tərəfindən ölkələrinə yola salınacaqları günü gözləyir. Əksəriyyəti Malavidən gələn on minə yaxın insan hazırda Shervood Hall bölgəsində qurulan düşərgədə ağır sanitar şəraitdə sığınacaq tapıb.
Böyük Britaniyanın “The Telegraph” qəzetinin bölgədəki müxbiri Ben Farmer düşərgədəki miqrantların vəziyyətini işıqlandırıb. Miqrantların sözlərinə görə, silahlı şəxslər onlara iyunun 30-dək ölkəni tərk etmək üçün vaxt qoyub, əks halda zorakılıq tətbiq olunacağı ilə hədələyiblər.
Ümumdünya Səhiyyə Təşkilatının (ÜST) baş direktoru Tedros Adhanom Qebreyesus yaxın günlərdə CAR-da irqçi hücumlar nəticəsində 5 Efiopiya və 5 Mozambik vətəndaşının öldürüldüyünü bəyan edib. CAR rəsmiləri bu rəqəmləri təkzib edərək hadisələrin mütəşəkkil cinayətkarlıqla bağlı olduğunu iddia etsələr də, rəsmi sorğular ölkədə əcnəbilərə qarşı nifrətin son 23 ilin ən yüksək səviyyəsinə çatdığını göstərir.
Yerli əhali işsizlik, artan cinayətkarlıq və dövlət xidmətlərinin yetərsizliyində miqrantları günahlandırır. Qeyri-qanuni miqrasiyaya qarşı çıxan yerli təşkilatlar isə zorakılıq iddialarını rədd edərək, hökumətdən yalnız öz vətəndaşlarına üstünlük verməsini tələb edirlər.
CAR Prezidenti Siril Ramafosa miqrantlara qarşı törədilən zorakılıqları pisləsə də, eyni zamanda, qeyri-qanuni miqrasiyaya qarşı sərhəd nəzarətinin gücləndiriləcəyini və deportasiya prosesinin sürətləndiriləcəyini bildirib. Son həftələrdə minlərlə sənədsiz miqrant artıq ölkədən çıxarılıb. Malavi, Zimbabve, Qana və Nigeriya kimi Afrika ölkələri öz vətəndaşlarını qəbul etməyə hazır olduqlarını bildirsələr də, CAR rəhbərliyini irqçi və ksenofob hücumların qarşısını almaqda aciz qalmaqda ittiham edirlər.
Təhminə VERDİYEVA,
“Azərbaycan”
jpg_1782135526.jpg)
