Uşaqlar və gənclər iqlim böhranı probleminə ən az cavabdehdirlər, lakin əhalinin məhz bu kateqoriyası ətraf mühit dəyişməsinin təsirlərinə ən həssas olandır.
AZƏRTAC xəbər verir ki, bu barədə BMT-nin İqlim Dəyişmələri üzrə Çərçivə Konvensiyasının Tərəflər Konfransının Azərbaycanda keçirilən 29-cu sessiyasında (COP29) iştirak edən fəal gənclərin müsahibəsini dərc etmiş Türkiyənin “Milliyet” qəzetini dərc etdiyi məqalədə bildirilib.
Nəşr qeyd edib ki, gənc vətəndaşlar nəsli rəhbər şəxsləri iqlim dəyişikliyi ilə mübarizədə təcili addımlar atmağa çağıraraq, ölkələrin ekoloji gündəmlərinə daha böyük töhfə verməyə hazırdır.
Türkiyənin “iqlim səfirləri” – “Yeditepe” Universitetinin tələbəsi Nazya Yürek və “Bahçeşehir” Universitetinin tələbəsi Kamil Koray Eryılmaz COP29-u ekologiya sahəsində üfüqlərin genişləndirilməsi və təcrübə toplanılmasına əhəmiyyətli töhfə adlandırıblar.
“Əminəm ki, gənclər iqlim dəyişikliyi ilə mübarizədə böyük rol oynaya bilərlər. Son illər bütün dünyada gənc nəslin cəmiyyətlərin həyatında iştirakı artmaqdadır, lakin biz hələ də istənilən səviyyədən uzağıq”, - deyə Nazya Yürek qeyd edib.
Kamil Koray Eryılmaz gənc nəsildə öz ölkələrinin davamlı inkişafına maksimum töhfə vermək zərurəti anlayışının formalaşdırılmasının əhəmiyyətini vurğulayıb.
O, ətraf mühit sahəsində layihələrə, tədqiqatlara və karyera proqramlarına güclü dəstək verməyə çağırıb. “Bərpaolunan enerji mənbələri sahəsində həm özəl təşəbbüsləri, həm də şirkətlərin fəaliyyətini, eləcə də ətraf mühitin mühafizəsi və kənd təsərrüfatı texnologiyalarının təkmilləşdirilməsini dəstəkləmək həyati əhəmiyyət kəsb edir”, - deyə Türkiyənin “iqlim səfiri” bildirib.
2024-cü ilə qədər Türkiyənin “iqlim səfirləri” ölkənin onlarla universitetinin 18-25 yaş arası 175 tələbəsidir. Eyni sayda tələbə ehtiyat səfirlər siyahısına daxil edilib. Hərəkat 2021-ci ildə Türkiyənin Ətraf Mühit, Şəhərsalma və İqlim Dəyişikliyi Nazirliyinin himayəsi ilə yaradılıb.
jpeg_1765955251.jpeg)
