Dövlətimizin iqtisadi, siyasi, mədəni həyatında, bütövlükdə inkişafında gənclərimizin rolu əvəzsizdir. Bütün sahələrdə hər addımda onlara dövlət tərəfindən yüksək qayğı göstərilir, fəaliyyətləri diqqət mərkəzində saxlanılır. Tarixi inkişaf yolumuzun bütün mərhələlərində uğurlar qazanan gənclərimiz ölkəmizin işıqlı gələcəyi naminə həmişə inamla ön sıralarda addımlayıblar. Onlar geniş, hərtərəfli fəaliyyətləri, istedadları, bacarıqları, əzmkarlıqları ilə dövlətimizin tərəqqisinə və inkişafına bir-birindən dəyərli töhfələr veriblər.
Bu gün gənclərimiz dövlətçiliyimizin çiçəklənməsi, güclənməsi və qüdrətlənməsi naminə fəallıq göstərirlər. Onlar iştirakçısı olduqları yarışlarda ölkəmizi layiqincə təmsil edir, oxuduqları ali təhsil ocaqlarında biliklərə yiyələnə-yiyələnə Azərbaycanın layiqli vətəndaşı olmağa çalışırlar.
Gündən-günə gücünü, qüdrətini artıran dövlətimizin gənclərə hərtərəfli diqqət və qayğı göstərməsi onlarda özlərinə, istedadlarına, potensiallarına inam hissini daha da gücləndirir. Dövlət onlara oxumaq, işləmək və cəmiyyətin müxtəlif sahələrində fəaliyyət göstərmək, uğur qazanmaq üçün geniş imkanlar yaradır. Yaşamağa, oxumağa, işləməyə, yeni-yeni zirvələri fəth etməyə, dövlətimizə, dövlətçiliyimizə və xalqımıza xidmət göstərməyə həvəsləndirir.
Gənclərimiz bacarıq və istedadları, təhsildə qazandıqları uğurları ilə ölkəmizin inkişaf, tərəqqi tarixinə yeni səhifələr yazırlar, Azərbaycanımızın işıqlı gələcəyi naminə yorulmaq bilmədən çalışırlar. Belə gənclərimizdən biri də Əliulla Aydın oğlu Vəliyevdir. Əliulla çox gəncdir, iyirmi yaşın içindədir. Ürəyi, qəlbi arzu və istəklərlə doludur. Ömrünün ən gözəl, ən təravətli çağlarını yaşayır. Yaşı az olsa da, artıq Ə.Vəliyev xeyli uğur qazanıb, gələcək həyatının bünövrəsini etibarlı şəkildə qurub. Dostları, yoldaşları arasında az-çox tanınıb, müəllimləri tərəfindən sevilib. Arzularının ardınca gedən Əliulla 2022-ci ildə sınaqlardan uğurla keçərək Azərbaycan Dövlət Mədəniyyət və İncəsənət Universitetinin Teatr və kino aktyorluğu fakültəsinə qəbul olub.
Söhbət zamanı Əliulla Vəliyevin ömür yoluna qısaca nəzər yetirdik. Öyrəndik ki, o, 2005-ci il sentyabrın 1-də Bakı şəhərində dünyaya göz açıb. Kiçik yaşlarından incəsənət sahəsinə böyük maraq göstərib. Orta təhsilini Azərbaycan Milli Konservatoriyasının nəzdindəki İncəsənət Gimnaziyasında alıb. Aldığı təhsil onun bu sahəyə olan maraq və həvəsini daha da artırıb.
Əliulla hələ kiçik yaşlarından həm ölkə daxilində, həm də xarici dövlətlərdə keçirilən bir-birindən maraqlı tədbirlərdə iştirak edib. 2018-ci ildə Türkiyənin Bursa şəhərində təşkil edilmiş Azərbaycan Xalq Cumhuriyyətinin yaranmasının 100 illik yubileyinə həsr olunmuş tədbir onun üçün çox yaddaqalan olub. 2019-cu ildə Türkiyənin Kayseri şəhərində İmadəddin Nəsiminin 650 illiyinə həsr olunmuş tədbirdə isə Əliulla əsərlərini, çox sevdiyi dahi şairimizin obrazını canlandırıb. Böyük sevgi və məhəbbətlə dünyada sevilən, oxunan və daim ehtiramla yad edilən görkəmli Azərbaycan şairi Nəsiminin şeirlərini səsləndirib. Bütün bunlarla yanaşı, Əliulla Vəliyev əlamətdar günlərlə bağlı müntəzəm olaraq Yeni Azərbaycan Partiyası, Bakı Şəhər İcra Hakimiyyəti və başqa təşkilatlar tərəfindən keçirilən tədbirlərdə də fəal iştirak edib. Üzərinə düşən vəzifələri layiqincə yerinə yetirib. İştirakçısı olduğu bu tədbirlər Əliullanın dünyagörüşünün formalaşmasında mühüm rol oynayıb, onu sənət aləminə daha da həvəsləndirib.
Azərbaycan Dövlət Mədəniyyət və İncəsənət Universitetinə qəbul olandan sonra da Əliulla bir çox mühüm tədbirdə iştirak edib. 2023-cü il iyun ayı onun üçün çox əlamətdar olub. Həmin il Ə.Vəliyev Rusiya Dövlət Teatr Sənəti İnstitutunun təşkilatçılığı ilə Qırğızıstan Respublikasında keçirilən ustad dərslərində iştirak edib. İştirakçısı olduğu ustad dərsləri ona xeyli təcrübə qazandırıb.
2024-cü ilin noyabr ayı da Əliulla üçün əlamətdar olub. Həmin ay o, iki müsabiqədə iştirak edib. Gözlənildiyi kimi ikisində də uğur qazanıb. Mədəniyyət Nazirliyi Azərbaycan Teatr Xadimləri İttifaqı tətəfindən keçirilmiş "Zəfərimiz - Şərəfimiz" bədii qiraət musabiqəsinə həvəslə qatılan Ə.Vəliyev bacarığı və istedadı ilə fərqlənərək diploma layiq görülüb. 20-25 noyabr 2024-cü ildə isə Əliulla Belarus Respublikasının paytaxtı Minsk şəhərində görkəmli rus şairi A.S.Puşkinın 225 illiyinə həsr olunmuş "Dobrıy skaz" adlı bədii qiraət müsabiqəsində də iştirak edib. Bu müsabiqədə də nümayiş etdirdiyi bacarığına görə "Qran-pri" mükafatına layiq görülüb.
Söhbət zamanı öyrəndik ki, gələcəyin aktyoru olacaq Əliulla Vəliyevin atası Əməkdar müəllim Ənvər Vəliyev bir zamanlar bu ali təhsil ocağında müəllim işləyib, dərs deyib, gələcəyin sənət adamlarına elm və biliklər öyrədib. İndi oğlu atasının yolunu davam etdirir, onun açdığı cığırla incəsənət aləminin dərinliklərinə doğru inamla addımlayır. Əliullanın sənət yolunda atdığı bu inamlı addımlar onu bütün arzularına qovuşduracaq.
Gələcəyin istedadlı aktyoru olacaq Əliulla öz üzərində yorulmadan çalışır. Həm nəzəri, həm də praktiki dərslərdə fəal iştirak edir. Təcrübə və peşəkarlığını daha da artırmaq üçün Gənc Tamaşaçılar Teatrında məşqlərə gedir. Məqsədi aktyorluq sənətini dərindən öyrənmək və bu sahənin peşəkarı olmaq, bir-birindən maraqlı obrazlar yaratmaqdır.
Söhbət zamanı Əliulla sevdiyi, rəğbət bəslədiyi aktyorların adlarını da çəkdi. Dedi ki, teatr və kinolarda oynadıqları rollarını bəyəndiyim aktyorlarımız çoxdur. Biz onlardan çox şey öyrənirik. Ən böyük hörmət və rəğbət bəslədiyim aktyorlar isə Hamlet Xanızadə və Rasim Balayevdir. Onlar bacarıq və peşəkarlıqları ilə səhnəmizdə, kinomuzda dərin izlər qoyublar. Biz gənclər də çalışacağıq ki, bu sənətkarların yaradıcılıq yolunu uğurla davam etdirək. Onları təkrar etmədən incəsənət aləmində yeni yollar və cığırlar açaq.
Hansı sahə olursa-olsun, istedad, bacarıq, işgüzarlıq və peşəkarlıq gec-tez özünü qabarıq şəkildə göstərir. Elə uğurun, zəfərin, qələbənin düsturu da istedad, bacarıq və peşəkarlıqdır. Biz söhbət zamanı gələcəyin tanınmış aktyoru olacaq Əliullada bütün bu müsbət keyfiyyətləri gördük. İnanırıq ki, bu gün dərslərində fərqlənən, müsabiqələrdə müxtəlif mükafatlar qazanan, yorulmadan həvəslə məşqlərə gedən, ürəyi arzu və istəklərlə dolu olan Əliulla Vəliyev sabah səhnəmizin ən sevilən aktyorlarından biri olacaq. Filmlərdə və teatr tamaşalarında yaradacağı obrazları ilə yaddaşlarda dərin iz qoyacaq.
Vahid MƏHƏRRƏMOV,
"Azərbaycan"
jpg_1747777737.jpg)
