Onlar özlərini diri-diri dəfn edirlər

Rusiyada qəfildən diksinərək ayılıblar ki, sən demə, ölkənin aparıcı təbliğatçı  jurnalistlərinin az qala 90 faizi ermənilərmiş. Rus jurnalistlər bir-birilərinə sual verirlər ki, onların erməniəsilli həmkarlarının at belinə çıxması təsadüfdür, yoxsa  düşünülmüş plan? Bu sualın cavabını hələlik bilən yoxdur.
Erməniəsilli Rusiya jurnalistlərinin uzun siyahısına məşhur təbliğatçı Marqarita Simonyan başçılıq edir. Onun arxasınca əri Keosayan, Qabrelyanov, Baqdasarov, Babayan, Kurqinyan, Mardanyan və başqaları sıralanıb. Nə qədər acınacaqlı da olsa, reallıq belədir ki, adlarını sadaladığımız və sadalamadığımız erməni təbliğatçıları böyük rus mədəniyyətinin "təəssübkeş"ləri kimi, kimin üstünə desən diş qıcayırlar, təki pullu sifariş olsun. Çünki Puşkin demiş: "Sən qorxaqsan, sən qulsan, sən ermənisən!" 
Rusiya və hətta dünyada Marqarita Simonyanı əxlaqsızlığına və haqsızlığına görə tanımayan yoxdur. O, vaxtaşırı öz teleqram kanalında Qarabağa əl uzatmaqdan çəkinmir, Rusiya ilə Azərbaycan arasında münasibətləri qızışdırmaq üçün əldən-ayaqdan gedir. Jurnalistdən daha çox əsl faşist kimi hərəkət edən Simonyanın Rusiya təəssübkeşi olması onun yalnız makiyajlı üzüdür, astarı tam əksinədir. Daha  doğrusu,  astarı puldur, o, nə ermənipərəstdir, nə də rusiyapərəst. 
Nikol Paşinyanın xarici siyasət üzrə eks məsləhətçisi Arsen Xaratyan deyir ki, Ermənistanda Simonyana münasibət kifayət qədər mənfidir: "Vaxtilə o, ermənilərin 2018-ci il inqilabına qarşı çox sərt ifadələr işlədən nadan idi. Onun erməni familiyasından  başqa bizimlə ümumi heç nəyi yoxdur. Bu adam heç vaxt Ermənistanda yaşamayıb və bizi başa düşmək iqtidarında deyil. Ermənistan onu Kremlin təbliğatçısı kimi qəbul edir. Elə bu baxımdan, Simonyanın son sayıqlamaları qətiyyən bütün ermənilərin mövqeyini əks etdirmir". Başqa bir erməni siyasətçi Puben Meqrabyan isə Simonyanın əməllərini insanlığa qarşı cinayətlərdə iştirak etməyə bərabər sayır: "Onun yalnız etnik mənşəyi ermənidir, amma reallıqda bu insanın Ermənistanla bağlı heç nəyi yoxdur. Marqarita Ermənistana zərrəcə hörmət belə etmir". Yazıçı-ssenarist Bəhram Martirosyan da Marqaşaya münasibətdə sərtdir. "Simonyan sadəcə rus yox, imperiya təbliğatçısıdır. Bu isə keçmiş sovet respublikası üçün çox vacib məqamdır. Sakit oturun, Rusiya özü sizin yerinizə bütün məsələləri həll edəcək. Bu da ciddi hay-küyə səbəb olan əsl imperiya jestidir. Lakin Simonyan və digər erməni təbliğatçıları öz statuslarında yanılırlar... Ermənilər özlərini nə qədər yüksək ranqlı təbliğatçılar saysalar da, mahiyyət etibarı ilə Kremlin küllüklərində eşələnən, xüsusi hörməti olmayan xidmətçi statusundan yuxarıda deyillər. Bu rol nə qədər təhqiramiz olsa da, ermənilər can-başla ona hazırdırlar... Mən Simonyana və başqalarına haqq qazandırmıram. Onlar üstünlüklərə malikdir və bu mövqelərini qorumaq üçün dəridən-qabıqdan çıxırlar. Buna görə də bir qayda olaraq çoxluğun tərəfində çıxış edirlər. İndiki çətin vəziyyətdə onlar yalnız qazandıqlarını qorumağa çalışırlar. Onlar üçün Ermənistanın olub-olmayacağı maraqlı deyil, əsas məsələ üzdə qalmaq, belə mürəkkəb dövrdə batmamaqdır. Bu artıq erməni milli  məsələsi yox, sadəcə əldə olunanları qorumağa xidmət edən maraq məsələsidir".
Bir sözlə, Rusiyadakı etnik erməni təbliğatçıları yalnız öz maraqlarına xidmət edirlər. Onlar üçün müqəddəs nə vətəndir, nə də ideya. Əgər sabah Rusiyada, yaxud Ermənistanda hakimiyyət dəyişərsə, onlar yeni rejimin qulluğunda dayanacaqlar, təbii ki, pullarını versələr. Bu gün Rusiyada lövbər salmış erməni təbliğatçılarının ruslardan daha çox rus olmaq cəhdləri sadəcə hiylədir, özü də ödənişli. Ona görə də artıq Ermənistanda Moskvadakı erməni lobbisi haqqında neqativ fikirlər artmaqdadır, hamı onları Ermənistan dövlətinin düşməni kimi qəbul edir. Erməni xaqlı hətta millətçilik xəstəliyinə yoluxmasına baxmayaraq anlayır ki, Moskvadakı erməni lobbisi yalnız öz maraqlarını güdür, erməni təbliğatçıları isə diri-diri özlərini dəfn edirlər. 

Bahadur İMANQULİYEV,
"Azərbaycan"