Çili hökuməti dünya xəritəsinin kənarında, planetin ən ucqar və əlçatmaz guşələrindən birində, materik hissəsinin sərt subantarktik meşələrə, buzlu sulara və buzlaq kütlələrinə yol verdiyi yerdə nəsli kəsilməkdə olan vəhşi təbiəti və unikal ekosistemləri qorumaq üçün milli park yaratmağa hazırlaşır.
AZƏRTAC xəbər verir ki, “Reuters” agentliyinin məlumatına görə, Amerikanın cənub ucundakı Bransuik yarımadasında təklif olunan Keyp-Fruard Milli Parkı Magellan boğazına baxan təxminən 150 min hektar meşə, torflu ərazilər, buzlaqlar və sahil xəttini əhatə edəcək.
“Bransuik yarımadası dəniz, sahil və quru ekosistemlərinin birləşdiyi bir yerdir”, - deyə “Rewilding Chile” təşkilatının vəhşi təbiətin qorunması üzrə koordinatoru Benjamin Kaseres bildirib. O əlavə edib ki, kövrək ekosistemlərə dəyən zərərin qarşısını almaq üçün sənayedən turizmə qədər insan fəaliyyətləri tənzimlənməlidir. “Bunlar tarazlığı qoruyan və nəsli kəsilməkdə olan növlər üçün sığınacaq təmin edən davamlı yerlərdir”, -deyə ekoloq vurğulayıb.
Mərhum xeyriyyəçi və “North Face” aktiv istirahət geyimləri şirkətinin təsisçisi Daqlas Tompkins tərəfindən təsis edilən “Rewilding Chile” fondu noyabr ayında Çili hökumətinə təxminən 127 min hektar torpaq bağışlayıb və iki il ərzində milli parkın yaradılması şərti qoyulub.
Park nəsli kəsilməkdə olan huemul maralının ən cənub qitə populyasiyaları üçün sığınacağa çevriləcək və buradakı zəngin su ehtiyatları balinalar, dəniz şirləri və qatil balinalar da daxil olmaqla geniş qida zəncirini dəstəkləyəcək.
Layihənin koordinatoru Qabriela Garrido bildirib ki, hakimiyyət orqanları yaxın aylarda bu parkı Kaveskar və Alberto de Aqostini milli parklarını da əhatə edən 8 milyon hektarlıq Pataqoniya bioloji dəhlizinə daxil edən prezident fərmanı ilə bağlı işləri yekunlaşdırmağa ümid edirlər.
jpg_1768468671.jpg)
