Vətən müharibəsində şəhid olmuş qəhrəmanların övladları üçün reallaşdırılan “Mənim atam qəhrəmandır” layihəsi çərçivəsində növbəti tədbir Qusardakı Şahdağ Turizm Mərkəzində təşkil olunub.
AZƏRTAC-ın bölgə müxbiri xəbər verir ki, Azərbaycan Respublikası Müdafiə Nazirliyinin dəstəyi və “Fire Land Production”ın təşkilatçılığı ilə həyata keçirilən belə tədbirlərin məqsədi torpaqlarımız uğrunda canından keçən qəhrəmanlarımızı bir daha anmaq, onların övladlarına xalqımızın diqqət mərkəzində olduqlarını daim hiss etdirmək, şəhid balalarının səmərəli istirahətini təşkil etməkdir.
Tədbir Müdafiə Nazirliyinin Təlim Tədris Mərkəzindən start götürüb. Ekskursiya avtobuslarında Bakı şəhərini dolaşan şəhidlərin övladları “Zəfər marşı”nı ifa edərək tədbirə qatılıblar. Uşaqlar tədbirdə öz atalarının və digər şəhidlərimizin rəsmləri həkk olunmuş geyimlərdə iştirak edib.
Bundan sonra avtobuslar Qusarda yerləşən “Şahdağ” Turizm Mərkəzinə üz tutub. İki gün ərzində davam edən tədbirdə Qusar rayonundan, həm də Bakı şəhərindən gələn şəhid övladları səmərəli vaxt keçirərək xizək sürüb, müxtəlif əyləncə attraksionlarından istifadə ediblər.
Turizm Mərkəzindəki tədbirin rəsmi hissəsində müzəffər ordumuzun şəhid qəhrəmanları bir dəqiqəlik sükutla yad edilib.
Tədbirdə çıxış edənlər Müzəffər Ali Baş Komandan İlham Əliyevin rəhbərliyi ilə qazanılan Şanlı Qələbəmizdən danışılıb. Bildirilib ki, qəhrəman şəhidlərimizin ailələri daim diqqət və qayğı ilə əhatə olunub.
Daha sonra Vətən müharibəsində öz səsi ilə hər kəsi valeh edən və düşmənlə mübarizədə şəhid olan Xudayar Yusifzadənin anası Radə xanımla şəhid övladlarının birlikdə çəkildikləri videoçarx nümayiş etdirilib. Videoçarxda şəhid övladları şəhid anası ilə birlikdə Xudayar Yusifzadənin səngərdə səsləndirdiyi “Xudayar” təsnifini ifa edirdilər.
Tədbirin bədii hissəsində muğam müsabiqəsinin qalibi Zabitə Alıyeva, “Mery Band” qrupu, gənc müğənnilər Murad Azərili və Nihad Orucov şəhid övladları ilə birlikdə mahnılar ifa edib, onlarla hisslərini bölüşüblər.
Tədbirin sonunda qəhrəman övladlarına hədiyyələr təqdim olunub.
“Mənim atam qəhrəmandır” layihəsinin silsilə tədbirləri Bakının bir çox görkəmli yerlərində, tarixi məkanlarında, həmçinin Şuşa şəhərində təşkil olunub. Silsilə tədbirlərə Azərbaycanın bir sıra tanınmış incəsənət xadimləri, o cümlədən Alim və Fərqanə Qasımovlar, Zülfiyyə Xanbabayeva, Brilliant Dadaşova, Röya Ayxan, Sevda Ələkbərzadə, Natiq Şirinov, Təranə Muradova qatılıblar.
