İlin sonunadək 5300 keçmiş məcburi köçkünün yurd həsrətinə və nisgilinə son qoyulacaq
Otuz il ərzində dağıdılıb viran qoyulan, xarabazarlığa çevrilən yurdlarımız Müzəffər Ali Baş Komandan İlham Əliyev və rəşadətli ordumuz sayəsində artıq əzəli sahiblərinə qovuşur. Böyük Zəfərimizdən qısa zaman keçməsinə baxmayaraq, düşmən tapdağından azad edilən torpaqlarımızda sürətlə bərpa-quruculuq işləri aparılır, kəndlər və şəhərlər yenidən qurulur, həyat yenidən qaynayır.
Qələbədən sonrakı üç il müddətində Qarabağ və Şərqi Zəngəzur iqtisadi rayonlarında bərpa-quruculuq işlərinə dövlət büdcəsindən 7 milyard dollar vəsaitin ayrılması isə Azərbaycanın iqtisadi qüdrətinin göstəricisidir.
Keçmiş məcburi köçkünlərin dədə-baba yurdlarına dönüşü üçün Prezident İlham Əliyevin 2022-ci il 16 noyabr tarixli sərəncamı ilə təsdiq edilmiş "Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı" çərçivəsində artıq Zəngilan rayonunun Ağalı kəndinə, Tərtər rayonunun Talış kəndinə, Laçın və Füzuliyə məcburi köçkünlərin bəzilərinin qayıdışı təmin olunub və bu istiqamətdə işlər sürətlə davam etdirilir.
Həyata keçirilən məqsədyönlü və genişmiqyaslı layihələr Qarabağ və Şərqi Zəngəzur iqtisadi rayonlarının sürətlə dirçəlməsinə, əhalinin dayanıqlı məskunlaşmasına və davamlı iqtisadi aktivliyinin təmin olunmasına xidmət edir.
Ali Baş Komandan İlham Əliyevin tapşırığına uyğun olaraq, yenidən qurulan Laçın şəhərinə keçmiş məcburi köçkünlərin qayıdışı davam edir. Dünən növbəti köç karvanı Bakı şəhərinin Qaradağ rayonundakı "Qobu park 3" yaşayış kompleksindən Laçın şəhərinə daha 25 ailə - 96 nəfər yola salınıb. Köçürülən ailələr Laçın şəhərində yenidən tikilən evlərdə məskunlaşacaqlar. Bununla da Laçın şəhərində 1052 nəfər olmaqla, 272 ailənin daimi məskunlaşması təmin edilib.
Böyük qayıdış çərçivəsində indiyədək 133 ailə (649 nəfər) Zəngilan rayonunun Ağalı kəndinə, 20 ailə (90 nəfər) Tərtər rayonunun Talış kəndinə, 272 ailə (1052 nəfər) Laçın şəhərinə, 258 ailə (928 nəfər) Füzuli şəhərinə, 20 ailə (88 nəfər) Laçın rayonunun Zabux kəndinə köçürülüb.
Qeyd etmək lazımdır ki, 2026-cı ilədək Qarabağ və Şərqi Zəngəzurda 140 min nəfərin məskunlaşması nəzərdə tutulur.
Ötən 3 il suverenliyimizin bərpası, həmçinin işğaldan azad olunmuş ərazilərdə geniş quruculuq işlərinin yüksək səviyyədə həyata keçirilməsi ilə yadda qalıb.
Prezident Administrasiyasının rəhbəri Samir Nuriyev dövlət başçısı İlham Əliyevin Prezident seçilməsinin 20 illiyi münasibətilə Bakıda "Gülüstan" sarayında keçirilən konfransda çıxışı zamanı bildirib ki, 44 günlük Vətən müharibəsində qazanılmış tarixi Zəfər İlham Əliyevin rəhbərliyi, düşünülmüş siyasəti, qətiyyəti və prinsipiallığı nəticəsində bütün istiqamətlərdə əldə olunmuş böyük uğurların, güclü dövləti xarakterizə edən bütün komponentlərin üzvi bağlılığının məntiqi nəticəsi idi: "Bu Qələbə bir daha göstərdi ki, milli maraqları hər şeydən uca tutan Liderin ətrafında sıx birləşmiş xalq bütün dünyaya öz sözünü deməyə, beynəlxalq münasibətlərdə formalaşmış stereotipləri sındırmağa və düşməni diz çökdürərək tarixi ədaləti bərpa etməyə qadirdir. Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə Azərbaycan Silahlı Qüvvələri həm Vətən müharibəsində, həm də lokal antiterror tədbirləri zamanı peşəkarlığını, qarşısına qoyulmuş vəzifələri ən yüksək səviyyədə icra etmək məharətinə malik olduğunu bir daha nümayiş etdirdi".
Samir Nuriyev diqqətə çatdırıb ki, Ulu Öndər Heydər Əliyevin layiqli varisi Azərbaycan tarixinin, mədəniyyətinin, milli-mənəvi dəyərlərimizin, adət-ənənələrimizin qorunub saxlanmasını, gənc nəslin vətənpərvərlik, dövlətə və xalqa sədaqət ruhunda böyüməsini ən vacib məsələlərdən biri hesab edir: "Məhz onun ölkəyə rəhbərliyi dövründə formalaşmış gənc nəsil Vətən müharibəsinin bütün ağırlığını öz üzərinə götürdü və böyük bir missiyanı şərəflə yerinə yetirdi. Ümumilikdə, 2021-2023-cü illərdə 105 layihənin təməli qoyulub, onlardan 63-ü müxtəlif təyinatlı obyektlərdir ki, açılışı baş tutub. Zəfərdən sonra işğaldan azad olunmuş ərazilərə 2717 nəfər keçmiş məcburi köçkünün qayıdışı təmin edilib. İlin sonuna kimi isə 5300 şəxsin qayıdışı nəzərdə tutulub".
Böyük qayıdış sürətlə davam edir, keçmiş məcburi köçkünlər mərhələli şəkildə doğma yurdlarına köçür, bu yerlərdə həyat yenidən öz axarına qayıdır. Otuz il öncə ah-nalə ilə torpaqlarından zorla didərgin salınan soydaşlarımız fərəh və qürurla ömürlərinin yeni səhifəsinə başlayırlar.
Görülən uğurlu işlərin və ölkə başçısına olan inamın nəticəsidir ki, keçmiş məcburi köçkünlərin öz torpaqlarına qayıtması ilə bağlı keçirilmiş sorğuya görə, soydaşlarımızın əksəriyyəti əzəli yurdlarına geri qayıtmaq arzusundadır. Hətta azad olunmuş ərazilərə qayıtmaq istəyən insanlardan ibarət növbə yaranıb.
Xalqımızın bu sevincinin, qürurunun və güvəninin səbəbkarı isə Müzəffər Ali Baş Komandanın iradəsi və rəşadətli Azərbaycan Ordusunun şücaətidir. Bu gün dövlət başçısı bölgəmizdə düşmənçiliyə son qoyulması, qarşılıqlı etimada əsaslanan davamlı sülhə, dincliyə və əmin-amanlığa nail olunması uğrunda çalışır.
Ülkər XASPOLADOVA,
"Azərbaycan"
