“Heydər Əliyev. Müstəqilliyimiz əbədidir” çoxcildliyinin təkrar nəşrinin 11-ci kitabı çapdan çıxıb.
AZƏRTAC xəbər verir ki, bu kitabda yer alan materiallar 1996-cı il yanvarın 20-dən aprelin 1-dək olan dövrü əhatə edir. Nəşrdə Ulu Öndər Heydər Əliyevin həmin dövrdə çıxışları, nitqləri, bəyanatları, müraciətləri, müsahibələri, məktubları və digər materiallar toplanıb.
Kitaba 1996-cı ildə Prezident Heydər Əliyevin Qanlı Yanvar faciəsi şəhidlərinin xatirə gecəsində söylədiyi nitqin mətni daxil edilib. Ulu Öndər xalqımızın yenilməz və müstəqilliyimizin əbədi olduğunu vurğulayaraq deyib: “Bu gün şəhidləri yad edərək bir daha bəyan edirik ki, xalqımız yenilməzdir və heç vaxt başını aşağı əyməyəcəkdir. Biz əldə etdiyimiz milli azadlığımızı qoruyacağıq, saxlayacağıq və onu əbədi edəcəyik. Dövlət müstəqilliyimizi qoruyub inkişaf etdirəcəyik və əbədi yaşadacağıq Şəhidlərin xatirəsi qəlbimizdə əbədi yaşayacaq, milli azadlığımız əbədidir, dövlət müstəqilliyimiz əbədidir. Heç bir qüvvə bizi bu yoldan döndərə bilməz, iradəmizi sındıra bilməz”.
Bu nəşrə müstəqil Azərbaycan Respublikası Gənclərinin Birinci Forumunda Prezident Heydər Əliyevin nitqinin mətni də daxil edilib. Ulu Öndər proqram xarakterli nitqində demişdi: “Hər bir Azərbaycan gənci öz həyat yolunu müstəqil Azərbaycan Respublikasının gələcək yolu kimi qəbul etməlidir və öz həyatını qurarkən, özünü həyatda fəaliyyətə hazırlayarkən və fəaliyyətə başlayıb onu davam etdirərkən özü haqqında da düşünməlidir, ailəsi haqqında da düşünməlidir, ancaq hər şeydən çox, hər şeydən artıq müstəqil Azərbaycanın bu günü, gələcəyi haqqında düşünməlidir. Bu, sizin vəzifələrinizdir və güman edirəm ki, hər bir Azərbaycan gənci cəmiyyətdə, Vətəndə, ölkədə öz vəzifələrini layiqincə yerinə yetirməyə çalışmalıdır”.
Bu cilddə 1996-cı ildə Prezident Heydər Əliyevin Həştərxan və Gürcüstan televiziyalarına müsahibələrinin, Ramazan bayramı və Xocalı soyqırımının ildönümü ilə əlaqədar xalqa müraciətlərinin mətnləri, Gürcüstana rəsmi səfəri zamanı Prezident Eduard Şevardnadze, digər dövlət və hökumət nümayəndələri, həmin ölkənin işgüzar dairələrinin nümayəndələri ilə görüş və danışıqları, Gürcüstanda yaşayan soydaşlarımızla görüşü haqqında, həmçinin Türkmənistan Prezidenti Saparmurat Niyazovun ölkəmizə rəsmi səfəri ilə bağlı materiallar toplanıb.
Heydər Əliyev 1996-cı ilin fevralında Azərbaycan Milli Televiziyasının 40 illik yubileyi münasibətilə Dövlət Televiziya və Radio Verilişləri Şirkətinin və rabitə işçilərinin bir qrup nümayəndəsi ilə görüşmüşdü. Həmin görüşündə çıxışı zamanı Ulu Öndər Azərbaycan televiziyasının fəaliyyətini yüksək qiymətləndirməklə yanaşı, qarşısında duran vəzifələrin daha əhəmiyyətli, vacib və şərəfli olacağını söyləmişdi. Ümummilli Liderin televiziyanın dili məsələsi ilə bağlı fikirləri bu gün də aktualdır: “Televiziya verilişlərinin aparıcıları, diktorlar çox səlis danışmalıdırlar. Dilimiz gözəldir, amma bu dildə danışanda sözləri, ifadələri elə tələffüz etməliyik ki, danışığımız cazibədar olsun. Ədəbi dili təbliğ etmək, hamıya öyrətmək televiziyanın vəzifələrindən biridir”.
Bu cilddə Ulu Öndərin, həmçinin Azərbaycanın dövlət müstəqilliyinin möhkəmləndirilməsinə, ölkənin bazar iqtisadiyyatına keçidi dövründə yaranmış çətinliklərin aradan qaldırılmasına, kənd təsərrüfatının inkişaf etdirilməsinə dair müşavirələrdəki nitqləri, erməni təcavüzünün ağır nəticələrinin aradan qaldırılmasına, daxili və xarici siyasətin başlıca istiqamətlərinə dair digər materiallara da geniş yer verilib.
Kitabın buraxılışına məsul “Azərnəşr”in baş redaktoru Əlövsət Ağalarovdur.
jpg_1776605046.jpg)
