Azərbaycanın xarici işlər naziri Ceyhun Bayramov Banqkokda keçirilən Birləşmiş Millətlər Təşkilatının Asiya və Sakit Okean üzrə İqtisadi və Sosial Komissiyasının (BMT ASİSK) “Heç kəsi geridə qoyma: Asiya və Sakit okean regionunda bütün yaş qrupları üçün cəmiyyətin inkişafı” mövzusuna həsr olunmuş 82-ci sessiyasına sədrlik edib.
AZƏRTAC xəbər verir ki, sessiyanın açılışında Azərbaycan Prezidenti İlham Əliyevin müraciəti nazir C.Bayramov tərəfindən oxunub.
Sessiya zamanı Azərbaycan ümumi çağırışların həlli və inkişafın faydalarının cəmiyyətin bütün təbəqələrinə çatmasını təmin etmək üçün regional əməkdaşlığın gücləndirilməsinin vacibliyini vurğulayıb.
Ceyhun Bayramov Azərbaycan tərəfindən təqdim olunan əsas siyasi mesajları vurğulayaraq, inklüziv inkişaf, rəqəmsal transformasiya, yaşıl enerji keçidi, regional əlaqələr, sülh quruculuğu və Cənub-Cənub əməkdaşlığına diqqət çəkib.
Azərbaycanın “Heç kəsi geridə qoyma” gündəliyi çərçivəsində insan mərkəzli, dayanıqlı və bir-biri ilə əlaqəli regional gələcək baxışı təqdim edilib.
Sessiyada “Azərbaycan 2030: Sosial-iqtisadi inkişafa dair Milli Prioritetlər”in inklüziv iqtisadi artım, təhsil və səhiyyəyə bərabər çıxış, rəqəmsal dövlət xidmətlərinin genişləndirilməsi, nəsillərarası bərabər imkanlar kimi prioritetləri xatırladılıb.
Bundan əlavə, Avrasiya bağlantısı üçün Orta Dəhlizin strateji əhəmiyyəti vurğulanıb.
Sessiyada Asiya və Sakit okean regionunda bütün yaş qrupları üçün sosial inkişafın təşviqinə dair Bakı-Banqkok Bəyannaməsi qəbul edilib. Bu sənəd, ASİSK-ın inklüziv inkişaf gündəliyi ilə birbaşa uzlaşan inklüzivlik və dayanıqlı tərəqqiyə dair ortaq öhdəliyi əks etdirir.
Sessiya inklüziv artım, sosial bərabərlik və regionda dayanıqlı inkişaf üzrə dialoqu irəli aparmaq üçün üzv dövlətlərin, beynəlxalq təşkilatların və BMT tərəfdaşlarının yüksəksəviyyəli nümayəndələrini bir araya gətirib.
Qeyd edək ki, Azərbaycan çoxtərəfli diplomatiyada fəal rol oynamağa davam edir və ümumi inkişaf məqsədlərini dəstəkləmək üçün Asiya-Sakit okean regionu ilə əlaqələrini dərinləşdirməyə sadiqdir. Həmrəylik, innovasiya və ortaq məsuliyyət prinsipləri ilə idarə olunan Azərbaycan insanı mərkəzdə tutan, regional əlaqələri gücləndirən, rəqəmsal və yaşıl keçidləri sürətləndirən, sülhü və əməkdaşlığı möhkəmləndirən inkişaf modelini müdafiə edir.
