İsrail və Azərbaycan uzun illər davam edən güclü tərəfdaşlığa malik olmaqla yanaşı, yaşıl enerji və birgə iqlim təşəbbüsləri kimi əsas sahələrə diqqət yetirərək əməkdaşlığı genişləndirməyə davam edirlər. Müxtəlif regionlarda yerləşən, lakin ümumi maraqlar və çağırışlarla birləşən bu iki dövlət dəyişən iqlim və dayanıqlı enerji mənbələrinə keçid zərurəti qarşısında səmərəli tərəfdaşlıq nümunəsi nümayiş etdirir.

AZƏRTAC “stmegi.com” saytına istinadla xəbər verir ki, zəngin neft və qaz ehtiyatlarına baxmayaraq, Azərbaycan energetika sənayesinin şaxələndirilməsinə və bərpaolunan enerji mənbələrinin tətbiqinə böyük diqqət yetirir. Bu kontekstdə günəş enerjisi, su sistemləri və enerji səmərəliliyi sahəsində yenilikləri ilə məşhur olan İsraillə əməkdaşlıq əsas rol oynayır.

İsrailin yüksək səmərəli günəş panelləri və enerji saxlama sistemləri texnologiyaları Azərbaycanda, xüsusən də elektrik enerjisinə çıxışın məhdud olduğu kənd yerlərində uğurla tətbiq oluna bilər. İsrail şirkətləri birgə layihələrə, xüsusən də Xəzər dənizi sahilində külək enerjisi sahəsinə maraq göstərir.

İkitərəfli əməkdaşlığın möhkəmləndirilməsində mühüm mərhələ Bakıda keçirilən COP29 iqlim konfransı oldu. İsrail öz pavilyonunda bərpaolunan enerji, davamlı kənd təsərrüfatı və su idarəçiliyi sahələrində qabaqcıl texnologiyaları təqdim edib.

Azərbaycan İsrailin yerli şəraitə uyğunlaşdırıla bilən yenilikləri ilə tanış olmaq üçün unikal imkan əldə edib. Bu, nəinki əməkdaşlığın üfüqlərini genişləndirəcək, həm də ölkənin ekoloji modernləşdirilməsi istiqamətində mühüm addım olacaq.

Quraq regionda yerləşən İsrail Xəzər dənizinin səviyyəsinin aşağı düşməsi problemi ilə üzləşən Azərbaycan üçün faydalı olacaq su idarəçiliyində unikal təcrübə toplayıb. Suyun duzsuzlaşdırılması və sudan istifadənin optimallaşdırılması üçün İsrail texnologiyaları ölkəyə su təhlükəsizliyinə nail olmaqda kömək edə biləcək bir vasitədir.

COP29 konfransında karbon qazı emissiyalarının azaldılmasına və qabaqcıl texnologiyaların tətbiqinə böyük diqqət yetirildi. Müzakirələrin nəticələri deməyə əsas verir ki, hər iki ölkə birgə iqlim layihələrinin həyata keçirilməsində mühüm irəliləyiş əldə edə biləcək.

“Yaşıl” şəhərlərin yaradılması və kənd təsərrüfatı üçün dayanıqlı texnologiyaların inkişafı sahəsində İsrailin təcrübəsi Azərbaycan tərəfini də maraqlandırır. Bu sahə yaxın illərdə ikitərəfli əməkdaşlığın lokomotivinə çevrilə bilər.

İsrail və Azərbaycan arasında yaşıl enerji və iqlim sahəsində əməkdaşlıq potensialı çox böyükdür. Onların bir-birini tamamlayan resursları və texnologiyaları uzunmüddətli tərəfdaşlıq üçün zəmin yaradır. Qlobal ekoloji problemlərin həllinə kömək edəcək təcrübə mübadiləsini davam etdirmək və birgə layihələrə başlamaq vacibdir.

COP29 təkcə İsrail texnologiyasını nümayiş etdirmək üçün platforma deyil, həm də ölkələr arasında əlaqələrin daha da gücləndirilməsi üçün başlanğıc nöqtəsi idi. İsraillə Azərbaycan arasında əməkdaşlıq bütün region üçün uğurlu tərəfdaşlıq nümunəsinə çevrilə bilər.