İrəvanda silahlı qarşıdırma ehtimalı artır

Etirazçılar separatçıların yerləşdiyi binaya hücum ediblər

İrəvanda separatçılar arasında qarşıdurma gündən-günə gərginləşir. Vəziyyət o həddədir ki, separatçılar arasında gərginlik silahlı qarşıdurmaya çevrilə bilər. Böyük ehtimalla, onların yaxın günlərdə bir-birilərinə güllə atacaqları proqnozlaşdırılır. 
Dünən isə Qarabağ erməniləri oktyabrın 1-dən dövlət sektorunda çalışan işçilərin maaşlarının ödənilməməsinə görə etiraz aksiyası keçiriblər. Separatçı Samvel Şahramanyanın açıqlamalarından razı qalmayan etirazçılar onun qardaşı Karenin ərazidə olduğunu görüb, hücum edərək döyüblər. 
Vətəndaşlar etiraz aksiyasından sonra Qarabağ separatçılarının İrəvandakı "nümayəndəliyi"nin binasına daxil olublar. Onlar Qarabağın qondarma qurumlarının işçilərinə maaşların verilməsinin dayandırılmasına etiraz ediblər. Samvel Şahramanyan ermənilərdən birinə yaxınlaşaraq "indi gəlib, sənin kəlləni qoparacağam" deyib. Bundan sonra qarşıdurma baş verib. Polis müdaxilə etdikdən sonra ara sakitləşib.
Qarabağ separatçılarının liderlərindən biri, əli yüzlərlə azərbaycanlının qanına batan Samvel Babayan Hayastana qaçmağı bacarsa da, orada da yaxşı qarşılanmayıb. Ona qarşı münasibət çox pisdir. Belə ki, onu məğlubiyyətdə günahlandırırlar və hesab edirlər ki, ermənilərin Qarabağı tərk etməsində bu cinayətkar ünsürün xüsusi rolu var.
Samvel Babayanla uzun müddət bir yerdə olan bəzi hərbçilər də bu qulduru ittiham edirlər. İşğal olunan ərazilərdə şəhər və kəndlərin dağıdılmasında birbaşa rol oynayan Samvel Babayanı həm də narkotik plantasiyalarına görə ittiham edən Qarabağ erməniləri onun cəzalanmasını tələb edirlər.
Erməni hərbçi Vahan Badasyan bildirib ki, məğlubiyyətin əsasını Samvel Babayan kimi adamlar qoyub. O, öz yalanları ilə indiki nəsli manipulyasiya etməyə, aldatmağa çalışır. Amma bu cinayətkarın səyləri heç bir nəticə verməyəcək: "Bütün cinayətlərin əsasını Samvel Babayan qoyub. Samvel Babayan etdiyi vəhşiliklərə görə cəzasız qaldığını unutmasın. Onun özünə erməni deməyə haqqı yoxdur. Babayan əsl erməni kişilərini necə qarət etdiyini, əzdiyini, öldürdüyünü yadına salsın. Samvel Babayan talançı və saxtakardır. Hektarlarla narkotik plantasiyalarından milyonlarla dollar qazanıb. Bütün erməniləri narkotik aludəçisinə çevirmək niyyətindəydi. O, hakimiyyətə gəlmək istəyirdi. Niyyətinə çata bilməyəndə isə qışqırmağa başladı. Samvel Babayan bildirir ki, döyüşüb, hətta həbsxanada da yatıb. O, həbsxanaya Qarabağ uğrunda döyüşdüyünə görə deyil, Hayastan prezidentinə qarşı uğursuz sui-qəsd təşkil etdiyinə görə düşüb". 
Göründüyü kimi, iki ölkə arasında sülh müqaviləsinin imzalanmasının aktual  olduğu bir dönəmdə hərbi xuntanın və ona bənzər digər ara qızışdıranların etiraz aksiyaları keçirməsi, erməni xalqını növbəti dəfə fəlakətə sürükləyir.   

Elçin CƏFƏROV,
"Azərbaycan"