Sumqayıtda yaşayan görmə məhdudiyyəti olan və əlilliyi müəyyən edilmiş 18 yaşınadək uşaqlar üçün yanvarın 13-də şənlik təşkil edilib.
Bayram tədbiri Qayğıya Ehtiyacı olan Şəxslərə Sosial Dəstək İctimai Birliyi (QEOŞSD) və "Azərbaycan Gözdən Əlillər Cəmiyyəti" İctimai Birliyi ilə birgə, Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin sifarişi ilə "Xüsusi qayğıya ehtiyacı olan ailələrin uşaqları üçün (18 yaşınadək əlilliyi müəyyən edilmiş) Yeni il şənliyinin təşkili" layihəsi çərçivəsində həyata keçirilib.
Bayram şənliyində görmə məhdudiyyəti olan uşaqlar və onların valideynləri iştirak ediblər.
Şənlik Sumqayıt bölgəsindən gələn ailələr üçün xüsusi olaraq təşkil edilib. Belə uşaqlar üçün hər bir tədbir fərdi ehtiyaclara uyğun hazırlanıb və onlara tam müvafiq şərait yaradılıb.
Tədbirin yaddaqalan anlarından biri də müxtəlif nağıl personajlarının təqdim etdiyi şou proqramı olub. Uşaqlar sevdikləri nağıl qəhrəmanlarının canlı çıxışlarını izləyərək Yeni il ruhunu daha dərindən hiss ediblər.
Nağıl qəhrəmanları öz şən və rəngarəng çıxışları ilə uşaqların əhvali-ruhiyyəsini yüksəldiblər. Həmin nağıl qəhrəmanları şənlikdə xüsusi oyunlar və yarışlar da təşkil ediblər. Uşaqlar həm əyləniblər, həm də oyun və yarışmalarda fəal iştirak ediblər.
Tədbirdə tanınmış müğənnilər və musiqiçilər öz çıxışları ilə görmə məhdudiyyəti olan uşaqları və onların ailələrini daha da şənləndiriblər. Musiqiçilər uşaqlara xüsusi olaraq müyəssər formada təqdim etdikləri musiqi nömrələri ilə bayram ovqatını gücləndirib və tədbir iştirakçılarına əsl musiqi zövqü yaşadıblar.
Şənlikdə hər bir uşaq üçün xüsusi hədiyyələr təqdim edilib, onlara müxtəlif təhsil və inkişafetdirici materiallar, eləcə də əyləncəli oyuncaq və texnoloji cihazlar verilib.
Bildirilib ki, bu cür layihələr və tədbirlər cəmiyyətin hər bir üzvünün bərabər imkanlara sahib olması və xüsusi ehtiyacı olan uşaqların həyatlarını zənginləşdirmək məqsədi daşıyır.
Zöhrə FƏRƏCOVA,
"Azərbaycan"
