25 Yanvar 2023 22:12
252
Təhsil
A- A+

ADA Universitetində İtaliya-Azərbaycan Universiteti layihəsi çərçivəsində iki magistr ixtisası təqdim olunub

 

Yanvarın 25-də ADA Universitetində İtaliya-Azərbaycan Universiteti layihəsi çərçivəsində iki magistr ixtisası təqdim olunub.

AZƏRTAC xəbər verir ki, magistratura pilləsində tədris olunacaq qlobal idarəçilik və siyasət ixtisası İtaliyanın Luiss Universiteti ilə, qida sistemi üzrə menecment ixtisası isə Bolonya Universiteti ilə əməkdaşlıq vasitəsilə təklif olunur. Yeni magistr ixtisasları İtaliya-Azərbaycan Universiteti layihəsi çərçivəsində təklif olunan ilk proqramlardır.

ADA Universitetinin rektoru səfir Hafiz Paşayev qonaqları salamlayaraq İtaliya-Azərbaycan Universitetinin tarixi və bu təşəbbüs çərçivəsində son 3 ildə görülən işlərdən bəhs edib. Rektor qeyd edib ki, bu təşəbbüs çərçivəsində təklif olunan ixtisasların məqsədi iqtisadiyyatın prioritet sahələri üzrə yüksəkixtisaslı kadrlar hazırlamaqdır.

Daha sonra Bolonya Universitetinin prorektoru Raffealla Kampaner yeni açılan ixtisaslarla bağlı təbriklərini çatdırıb. Bildirib ki, İtaliya-Azərbaycan Universiteti həm Bolonya Universiteti, həm də iki ölkə arasındakı münasibətlər üçün əhəmiyyət kəsb edir. Bu layihə çərçivəsində Bolonya Universiteti ilə əməkdaşlığa Kənd təsərrüfatı və qida elmi fakültəsinin yaradılması, birgə tədris və araşdırma layihələri, akademik və inzibati heyət üçün təlimlər, mədəniyyətlərin inteqrasiyasına yönəlik layihələr daxildir. Bu layihələrin həyata keçirilməsi üçün Bolonya Universiteti böyük təcrübəyə malik olduğu “sahədən süfrəyə” modelindən yararlanacaq. Hazırda magistr pilləsində təklif olunan ixtisas “Qida sistemi üzrə menecment” adlanır və növbəti akademik ildən tədris olunacaq. Bu proqramın məqsədi kənd təsərrüfatı və qida sənayesi üzrə gələcək menecerlər, mütəxəssislər və sahibkarlar hazırlamaqdır.

Luiss Universitetinin prorektoru Raffaele Marketti isə İtaliya mədəniyyətinin özəlliyinin əsasının fərdi yanaşma olmasından bəhs edib. Qeyd olunub ki, qlobal idarəçilik və siyasət ixtisası politologiya, beynəlxalq münasibətlər və menecment sahələrini bir araya gətirən çoxşaxəli (ixtisaslararası) proqramdır. Proqramın məqsədi qlobal siyasəti və biznesin idarə olunması, həmçinin milli konteksti uzlaşdırmağı nəzərdə tutan, rəqabətədavamlı “Made in Azerbaijan” (Azərbaycan brendinin təşviqi) keyfiyyət nişanının formalaşması, idarə edilməsi və təşviqini tədris etməkdir. Tələbələr bu ixtisasın bir hissəsi olaraq Roma şəhərində “Made in Italy” mövzusunda yay məktəbində iştirak edərək tanınmış italyan şirkətləri ilə görüşmək imkanı əldə edəcəklər.

Tədbirdə dövlət və ictimai qurumların, müxtəlif assosiasiyalar, təşkilatlar, kənd təsərrüfatı müəssisələri və universitetlərin nümayəndələri və tələbələr iştirak ediblər.

İtaliya-Azərbaycan layihəsi çərçivəsində təklif olunan yeni magistr proqramlarına tələbə qəbulu 2023-cü tədris ili üçün artıq elan olunur. Proqramda tədris iki il ərzində ingilis dilində ADA Universiteti və tərəfdaş İtaliya universitetlərinin professorları tərəfindən keçiriləcək. Tədris müddətində tələbələr bir müddət İtaliyada da təhsil alacaqlar. Qəbul üçün namizədlər beynəlxalq ingilis dili imtahanı və Dövlət İmtahan Mərkəzi tərəfindən keçirilən magistraturaya qəbul imtahanlarında iştirak etməklə yanaşı, müsahibədən keçməlidirlər.

ADA Universiteti ilə Luiss Universiteti və Bolonya Universiteti arasında ikitərəfli müqavilələr 2022-ci il sentyabrın 1-də Romada Azərbaycan səfirliyinin və mədəniyyət mərkəzinin yeni binasının açılışı çərçivəsində İtaliya-Azərbaycan Universiteti üzrə keçirilmiş imzalanma mərasimi zamanı bağlanıb.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video