Hindistanda keçiriləcək parlament seçkiləri dünyada ən böyük səsvermə kampaniyası olacaq

Dünən Hindistanda parlament seçkiləri başlayıb. Bu, demək olar ki, 970 milyon seçicinin iştirak etdiyi dünyada ən böyük səsvermədir. 
Parlamentin aşağı palatasının (Lok Sabha) 500-ə yaxın üzvünün seçilməsi üçün yeddi mərhələdə keçirilən və iyunun 1-dək altı həftə davam edəcək seçkilər zamanı bir milyondan çox  məntəqə açıq olacaq. Seçkilərdə elektron səsvermə maşınlarından istifadə olunur. 
Böyük ölkənin ucqar bölgələrində yaşayan insanların iştirakını təmin etmək üçün bəzi seçki komssiyalarının üzvləri məntəqələrə piyada, helikopterlə və ya qayıqla gedirlər, bəzi hallarda isə səsvermə aparatları atların və ya fillərin belində aparılır.
Hindistanın hazırkı baş naziri Narendra Modi əhalinin sayına görə dünyanın ən böyük ölkəsində keçirilən seçkilərdə favorit hesab olunur.  Rəy sorğuları baş nazir Narendra Modinin hind millətçi Bharatiya Janata Partiyasının (BJP) qələbə qazanacağını proqnozlaşdırır. Bu, baş verərsə,  10 il ərzində hökumətə rəhbərlik edən 73 yaşlı Modi üçüncü beşillik müddətə yenidən baş nazir seçiləcək.
Hazırkı baş nazirin əsas rəqibi Hindistanı 1947-ci ildə Britaniyadan müstəqillik əldə edərək 2014-cü il seçkilərində Modinin Bharatiya Janata Partiyasına  məğlub olana qədər idarə edən Hindistan Milli Konqresinin lideri Rahul Qandi hesab olunur.
Müxalifət isə Narendra Modini hakimiyyəti mərkəzləşdirməkdə, məhkəmə və media kimi dövlət və ictimai institutların müstəqilliyinə xələl gətirməkdə və öz ətrafında şəxsiyyətə pərəstiş yaratmaqda ittiham edir. 
Qeyd edək ki, Hindistanda seçkilərdən az əvvəl bir neçə müxalifət lideri müxtəlif maddələrlə, məsələn  korrupsiya ittihamı ilə həbs olunub. 

Rizvan CƏFƏROV,
"Azərbaycan"