Orta Dəhlizin əsas seqmenti olan Zəngəzur dəhlizi qlobal ticarətin həcmini artırmaqla yanaşı, Türkiyə və Azərbaycanın regionlarının iqtisadi inkişafına da böyük təkan verəcək. Dəhlizin Naxçıvan ilə Türkiyəni birləşdirən hissəsi regional ticarətin, iqtisadi əlaqələrin və turizmin inkişafına dəstək olacaq. Naxçıvanın Türkiyə üzərindən Avropaya çıxışını təmin edəcək.
Bu sözləri AZƏRTAC-a açıqlamasında Türkiyənin “365 gün” media qrupunun rəhbəri Yakub Aslan deyib.
O bildirib ki, Azərbaycan Prezidenti İlham Əliyevin Zəngəzur dəhlizi ideyası uzaqgörən geosiyasi addımdır. Bu dəhliz yalnız 2 ölkənin deyil, ümumilikdə region dövlətlərinin nəqliyyat əlaqəsinin genişlənməsinə xidmət edir. Bu da öz növbəsində həmin ölkələrin iqtisadi-ticarət əlaqələrinin artmasına, iqtisadi inkişafına əhəmiyyətli töhfə verir: “Qars-İğdır-Aralık-Dilucu-Naxçıvan dəmir yolu xətti 224 kilometrdir və qlobal strateji dəyəri olan layihədir. Hələ 2023-cü ilin sentyabrında Azərbaycan və Türkiyə prezidentləri İlham Əliyev və Rəcəb Tayyib Ərdoğan Qars-Naxçıvan dəmiryolu layihəsi ilə bağlı niyyət protokolu imzalayıblar. Ötən il isə layihənin tikintisinə başlanıb. Bu layihə Zəngəzur dəhlizinin reallaşdırılması istiqamətində atılmış mühüm tarixi addım hesab olunur. Yeni dəmir yolu illik 5,5 milyon sərnişin və 15 milyon ton yük daşımağa imkan yaradacaq. Regiondakı sülh prosesini daha da irəli apararaq sabitliyin dayanıqlı olmasına şərait yaradacaq”.
Ekspert deyib ki, gələcəkdə tikintisi davam edən Qars-İğdır-Aralık-Dilucu-Naxçıvan dəmir yolu Türkiyə, Ermənistan və Azərbaycan arasında dəmir yolu əlaqələrinin gücləndirilməsinə töhfə verəcək. Bu nəqliyyat layihəsi sadəcə ölkənin infrastrukturuna qoyulan investisiya deyil, istehsalı, ixracı, məşğulluğu, turizmi, regional inkişafı və beynəlxalq əməkdaşlığı təşviq edən strateji xarakter daşıyan layihədir. Türkiyənin 2002-ci ildə dəmir yolu şəbəkəsinin uzunluğu təxminən 11 min kilometr idi, bu gün isə söhbət 14 min kilometrdən gedir. Türkiyə dəmir yolu şəbəkəsini 2028-ci ilə qədər 17 min 287 kilometrə, 2053-cü ilə qədər isə 28 min 590 kilometrə çatdırmağı planlaşdırır”.
“Bu dəmir yolu qlobal dəhlizin bir hissəsi olmaqla bərabər Naxçıvan ilə Türkiyənin Qars, Ərdəhan, Ərzurum, İğdır vilayətlərini birləşdirərək turist səfərlərinin artmasına, biznes qurumlarının qarşılıqlı iqtisadi əlaqələrinin genişlənməsinə imkan yaradacaq. Nəticə etibarilə iki ölkə arasındakı iqtisadi əlaqələr regionlara sirayət edərək əhalinin sosial vəziyyətinin daha yaxşılaşmasına xidmət edəcək. Qars-İğdır-Aralıq-Dilucu-Naxçıvan dəmir yolu isə təkcə Azərbaycan və Türkiyə üçün deyil, bütövlükdə region üçün strateji qazancdır. Tarixən parçalanmış marşrutların bərpası Türk dünyası arasında körpü funksiyasını yerinə yetirəcək. Eyni zamanda, Avrasiya məkanında nəqliyyat-tranzit fəaliyyətlərini gücləndirəcək mühüm bir marşruta çevriləcək. Beləliklə, Zəngəzur dəhlizi qarşıdakı onilliklərdə regional proseslərə təsir edən əsas layihələrdən biri kimi tarixdə qalacaq”, - deyə ekspert vurğulayıb.
