Azərbaycanın Cənubi Qafqazın aparıcı dövləti kimi mövqeyini ildən-ilə daha da möhkəmləndirməsi, qlobal miqyasda öz sözünü deyən, prinsipial mövqeyi ilə seçilən və müstəqil siyasət yürüdən dövlət statusunu gücləndirməsi ölkənin beynəlxalq nüfuzunun yüksəlməsinin əsas göstəricilərindəndir. Eyni zamanda, həyata keçirilən məqsədyönlü iqtisadi siyasət və müasir infrastruktur layihələri Azərbaycanın Avrasiya məkanının mühüm beynəlxalq nəqliyyat-logistika mərkəzlərindən birinə çevrilməsini təmin edib.
Bu fikirləri AZƏRTAC-a açıqlamasında türkiyəli iqtisadçı ekspert İlhan İşbaş bildirib.
Ekspert qeyd edib ki, son illərdə qlobal iqtisadiyyat və beynəlxalq münasibətlər sistemi ciddi transformasiya mərhələsinə qədəm qoyub. Yeni geoiqtisadi reallıqlar, alternativ ticarət marşrutlarına artan ehtiyac və beynəlxalq təchizat zəncirlərinin yenidən formalaşması strateji mövqeyə malik ölkələrin əhəmiyyətini daha da artırır. Belə bir şəraitdə Azərbaycan uzaqgörən dövlət siyasəti, sabit inkişaf modeli və etibarlı tərəfdaş imici sayəsində regionun ən mühüm aktorlarından biri kimi çıxış edir.
İlhan İşbaş bildirib ki, Azərbaycanın xarici siyasətinin əsas üstünlüklərindən biri milli maraqlara söykənməsi və bütün tərəfdaşlarla qarşılıqlı hörmət prinsipi əsasında münasibətlər qurmasıdır. Məhz bu yanaşma ölkəyə müxtəlif beynəlxalq platformalarda etibarlı tərəfdaş kimi qəbul olunmaq imkanı qazandırıb. Azərbaycan regional və qlobal məsələlərdə balanslı mövqeyi, konstruktiv təşəbbüsləri və prinsipial yanaşması ilə beynəlxalq aləmdə böyük etimad formalaşdırıb.
"Bu gün Azərbaycan yalnız Cənubi Qafqazın lider dövləti deyil, həm də Avropa ilə Asiyanı birləşdirən strateji körpü rolunu uğurla yerinə yetirən mühüm geoiqtisadi mərkəzdir. Dövlətin həyata keçirdiyi müstəqil siyasət, güclü iqtisadi potensial və müasir idarəetmə modeli ölkənin beynəlxalq nüfuzunu davamlı şəkildə artırır", - deyə ekspert vurğulayıb.
Onun sözlərinə görə, ölkədə siyasi sabitliyin qorunması, iqtisadi islahatların ardıcıl şəkildə həyata keçirilməsi, rəqəmsal transformasiya, investisiya mühitinin təkmilləşdirilməsi və qeyri-neft sektorunun inkişafı Azərbaycanın iqtisadi dayanıqlığını daha da gücləndirib. Bütün bunlar beynəlxalq maliyyə institutlarının və xarici investorların Azərbaycana marağının artmasına səbəb olur: “Azərbaycanın beynəlxalq nəqliyyat-logistika mərkəzi kimi mövqeyinin gücləndirilməsi son illərin ən mühüm strateji uğurlarından biridir. Ölkənin əlverişli coğrafi mövqeyi məqsədyönlü investisiyalar hesabına böyük iqtisadi üstünlüyə çevrilib. Müasir avtomobil yolları, yüksək standartlara cavab verən dəmir yolu infrastrukturu, Xəzər hövzəsində inkişaf etdirilən dəniz nəqliyyatı imkanları, beynəlxalq hava limanları və logistika mərkəzləri Azərbaycanın tranzit potensialını əhəmiyyətli dərəcədə artırıb. Dünya ticarətində alternativ marşrutlara marağın artdığı indiki dövrdə Orta Dəhlizin əhəmiyyəti sürətlə yüksəlir. Bu marşrutun əsas iştirakçılarından biri olan Azərbaycan yükdaşımaların sürətli, təhlükəsiz və səmərəli şəkildə həyata keçirilməsində mühüm rol oynayır. Bu isə ölkənin qlobal logistika xəritəsində strateji əhəmiyyətini daha da artırır”.
Ekspert vurğulayıb ki, Azərbaycanın nəqliyyat infrastrukturuna yatırdığı sərmayələr yalnız milli iqtisadiyyatın inkişafına deyil, həm də region ölkələri arasında iqtisadi inteqrasiyanın dərinləşməsinə xidmət edir. Bu layihələr Avropa, Mərkəzi Asiya, Qafqaz və Yaxın Şərq arasında ticarət əlaqələrinin genişlənməsinə, yeni iqtisadi əməkdaşlıq imkanlarının yaranmasına şərait yaradır.
O deyib ki, Azərbaycan və Türkiyə arasında mövcud olan strateji müttəfiqlik münasibətləri nəqliyyat və logistika sahəsində də mühüm nəticələr verir. İki qardaş ölkənin birgə həyata keçirdiyi layihələr regionun tranzit imkanlarını artırmaqla yanaşı, Avrasiya məkanında iqtisadi əlaqələrin genişlənməsinə, beynəlxalq ticarətin sürətlənməsinə və yeni investisiya axınının formalaşmasına əhəmiyyətli töhfə verir.
İlhan İşbaş bildirib ki, Azərbaycanın həyata keçirdiyi çoxşaxəli iqtisadi siyasət ölkənin beynəlxalq rəqabət qabiliyyətini yüksəldir. Tranzit, logistika, enerji, sənaye, rəqəmsal texnologiyalar və yaşıl iqtisadiyyat istiqamətlərində aparılan islahatlar Azərbaycanın uzunmüddətli inkişaf strategiyasının əsas elementləridir. Bu istiqamətlərdə əldə olunan nəticələr ölkənin iqtisadi dayanıqlığını daha da möhkəmləndirir.
Ekspert hesab edir ki, qlobal iqtisadi sistemdə etibarlı tərəfdaş kimi tanınmaq üçün təkcə coğrafi üstünlük kifayət etmir. Bunun üçün siyasi sabitlik, hüquqi etibarlılıq, müasir infrastruktur, çevik dövlət idarəçiliyi və beynəlxalq əməkdaşlığa açıq yanaşma vacibdir. Azərbaycanın bu meyarların hamısına cavab verməsi onun beynəlxalq nüfuzunu davamlı şəkildə artırır.
“Azərbaycanın həyata keçirdiyi siyasət regionda sülhün, sabitliyin və iqtisadi əməkdaşlığın möhkəmlənməsinə də mühüm töhfə verir. Ölkənin təşəbbüsü ilə reallaşdırılan iqtisadi və nəqliyyat layihələri yalnız milli maraqlara deyil, bütövlükdə region dövlətlərinin qarşılıqlı inkişafına xidmət edir və uzunmüddətli tərəfdaşlıq üçün yeni imkanlar yaradır. Azərbaycanın son illərdə qazandığı uğurlar təsadüfi deyil, ardıcıl həyata keçirilən strateji inkişaf siyasətinin məntiqi nəticəsidir. Ölkənin müstəqil siyasəti, yüksək beynəlxalq nüfuzu, iqtisadi dayanıqlığı və beynəlxalq nəqliyyat-logistika mərkəzi kimi mövqeyinin daha da güclənməsi yaxın illərdə də davam edəcək. Bu amillər Azərbaycanın yalnız Cənubi Qafqazın deyil, bütövlükdə Avrasiya məkanının ən mühüm siyasi və iqtisadi güc mərkəzlərindən biri kimi rolunu daha da möhkəmləndirəcək”, - deyə o vurğulayıb.
