Təşkilatın fəaliyyətinin dayandırılması təqdirəlayiqdir
"ABŞ Beynəlxalq İnkişaf Agentliyi (USAID) fəaliyyətində Ermənistana xüsusi münasibətilə fərqlənib. Təşkilat indiyədək bu ölkədə mandatına uyğun olmayan fəaliyyətlə məşğul olub".
Bu fikirləri "Azərbaycan" qəzetinə Milli Məclisin deputatı Pərvin Kərimzadə deyib. Deputat bildirib ki, ABŞ-nin yeni Prezidenti Donald Trampın məlum qərarından sonra USAID-in Ermənistandakı fəaliyyəti də dayandırılıb. Qurumun Ermənistan ofisi maliyyədən məhrum olub, bütün proqramların icrası dondurulub. USAID uzunmüddətli iqtisadi və sosial inkişafa yardım göstərmək adı ilə formalaşdırılıb. Qurumun ayrı-ayrı ölkələrdə müxtəlif proqramlarla əsasən kənd təsərrüfatına, ticarətə, qlobal səhiyyəyə, demokratiyanın inkişafına və humanitar məqsədlər üçün yardımlar ayırdığı iddia olunur. Əslində isə USAID yardım adı altında ayrı-ayrı ölkələrin daxili işlərinə aktiv şəkildə müdaxilə etmək, qeyri-sabit, çevriliş və xaos üçün münbit şərait yaratmağa çalışıb.
P.Kərimzadənin sözlərinə görə, USAID-nin rəhbərliyi Ermənistana xüsusi "diqqəti" ilə seçilib: "Azərbaycan öz torpaqlarını erməni işğalından azad etdikdən sonra bu "diqqət" daha da artmışdı. Qurumun rəhbəri Samanta Pauerin davamlı olaraq İrəvana səfərləri də bunu təsdiqləyir. Ötən ilin yayında ABŞ-nin Beynəlxalq İnkişaf Agentliyinin Ermənistana maliyyə yardımının həcmini iki dəfədən çox - 120 milyon dollardan 250 milyon dollara qədər artıracağı elan olunmuşdu. Guya bu vəsaitin "demokratik proseslər, regional əməkdaşlıq, fəlakət risklərinin idarə edilməsi, kibertəhlükəsizlik, ərzaq və enerji təhlükəsizliyi və s. kimi sahələrə yönəldiləcəyi" bildirilirdi. Qurumun rəhbərliyi daim torpaqlarını öz gücünə azad edən Azərbaycana qarşı əsassız ittihamlar irəli sürməkdən də çəkinmirdi".
Deputat qeyd edib ki, Azərbaycanın öz ərazi bütövlüyünü və suverenliyini bərpa etməsindən sonra təşkilat rəhbərlərinin qərəzli mövqeyi bir sıra məqamları ortaya çıxardı. Yəni USAID Ermənistanın mövqeyini dəstəkləməklə, onun işğalçı siyasətini də dəstəkləyib. İndi qurumun fəaliyyətinin dayandırılması Ermənistana ciddi zərbə oldu, çünki xarici yardımlar hesabına yaşayan Ermənistan böyük maliyyə və siyasi dəstəyini itirdi. USAID-in vaxtilə respublikamızda müxtəlif adlar altında fəaliyyət göstərən təşkilatları, o cümlədən radikal müxalifəti maliyyələşdirməklə onların vasitəsilə Azərbaycan hökuməti əleyhinə qeyri-qanuni aksiyaların permanentliyini təmin etməyə çalışdığına dair təkzibolunmaz faktlar da var. Belə çirkin əməllərlə məşğul olan təşkilatın fəaliyyətinin dayandırılması təqdirəlayiq haldır.
Əsmər QARDAŞXANOVA,
"Azərbaycan"
jpg_1762961542.jpg)
