Qarşılaşmadan öncə Serbiya favorit hesab olunsa da, son saniyələrdə məğlubiyyətdən qaça bilib. Yoviç 90+5-ci dəqiqədə bərabərlik qolunun müəllifi olub. Bu, Serbiyaya son tur ərəfəsində pley-offa yüksəlmək şansı yaradıb. Hər iki oyunda heç-heçə oynayan Sloveniya isə son turda favorit İngiltərə ilə qarşılaşacaq.
Komandalar hakimin start fitindən sonra ilk 15 dəqiqədə topa sahib olmada çətinlik çəkdilər. Xüsusilə sloveniyalılar mərkəzdə tətbiq etdikləri pressinqlə serbləri daha çox hücumları cinahdan qurmağa məcbur etdilər. Lakin 30-cu dəqiqədən sonrakı mərhələdə Sloveniya bütün fazalarda daha sürətli oynamağa başladı. Vurduqları qoldan sonra son 20 dəqiqədə fiziki yorğunluq sözünü dedi. Nəticədə topu rəqibə verib topsuz oyuna üstünlük verməkləri sonuncu dəqiqədə qapılarından qolla nəticələndi.   
Məlumat üçün qeyd edək ki, Sloveniya tarixində ikinci dəfə Avropa çempionatında oynayır. İlk dəfə  "Avro-2000"də Zlatko Zahoviçli yığma qrupda 2 heç-heçə etsə də, bu raundu adlaya bilməyib. 24 ildən sonra qitənin ən güclüləri sırasında yer alan Sloveniya dünya çempionatlarında da iştirak edib. 2002-ci və 2010-cu illərdəki cəhdlər uğursuz alınıb. Komanda hər iki mundialda qrupdan çıxa bilməyib. Millətlər Liqasının ilk iki mövsümünü C divizionunda keçirən Sloveniya "B"yə yüksəldikdən sonra mövqeyini çətinliklə qoruyub.
Draqan Stoykoviçin baş məşqçisi olduğu Serbiya millisi isə "Avro-2024"ə vəsiqəni çətinliklə qazanıb. Serbiya millisi son turda istəyinə çatıb. "Qartallar" Macarıstan və Monteneqro ilə mübarizədə ikinci olmağı bacarıb.