Rəcəb Tayyib Ərdoğanın qələbəsi türk dünyasının uğuru oldu
Xəbər verildiyi kimi, mayın 28-də Türkiyədə prezident seçkilərinin ikinci mərhələsi baş tutdu. Seçicilərin 52,18 faizinin səsini qazanan Rəcəb Tayyib Ərdoğan yenidən Prezident seçildi.
Türkiyə liderinə seçkilərdə əldə etdiyi qələbə münasibətilə ilk təbrik də qardaş ölkə Azərbaycandan gəldi. Qələbə qazanması münasibətilə Türkiyə Prezidentinə zəng edən dövlət başçımız İlham Əliyev bu uğuru Türkiyə xalqının Rəcəb Tayyib Ərdoğanın həyata keçirdiyi siyasətə göstərdiyi etimad kimi dəyərləndirdi. Dövlətimizin başçısı əmin olduğunu bildirdi ki, Rəcəb Tayyib Ərdoğanın liderliyi ilə Türkiyənin hərtərəfli inkişafı növbəti illərdə də davam etdiriləcək.
İlham Əliyev Rəcəb Tayyib Ərdoğana Türkiyə xalqının firavanlığı və ölkənin tərəqqisi naminə fəaliyyətində yeni-yeni uğurlar arzuladı.
Türkiyə Prezidenti təbrikə və xoş sözlərə görə Prezident İlham Əliyevə minnətdarlığını ifadə edib.
Birinci xanım Mehriban Əliyeva da Rəcəb Tayyib Ərdoğanı və xanımı Əminə Ərdoğanı qələbə münasibətilə təbrik edib.
Bu qələbə Türkiyə xalqının milli maraqları baxımından tarixi hadisədir
Milli Məclisin deputatı Elşad Mirbəşiroğlu qəzetimizə açıqlamasında bildirib ki, Rəcəb Tayyib Ərdoğanın yenidən Türkiyə Prezidenti seçilməsi həm Türkiyə, həm Azərbaycan xalqı, həm də bütün islam-türk dünyası üçün olduqca əlamətdar hadisədir. O qeyd edib ki, R.T.Ərdoğanın hakimiyyəti dövründə Azərbaycanla Türkiyə arasında bütün istiqamətlərdə uğurlu əməkdaşlıq sistemi qurulub. İki ölkə münasibətləri müttəfiqlik səviyyəsinə yüksəlib. "Vətən müharibəsi dövründə Türkiyə Azərbaycana böyük mənəvi və siyasi dəstək olub. Ərdoğan başda olmaqla Türkiyə rəsmiləri hər zaman "Azərbaycanın yanındayıq" söylədilər. Təbii ki, Ərdoğanın bundan sonrakı rəhbərliyi dövründə də Azərbaycanla Türkiyə münasibətləri dinamik inkişaf edəcək. İki ölkə təkcə region üçün deyil, dünya üçün də əhəmiyyətli olacaq daha mühüm layihələrin birgə təşəbbüskarı və iştirakçısı kimi diqqət çəkəcəklər", - deyə deputat əlavə edib.
O vurğulayıb ki, Türkiyə ilə Azərbaycan arasında bütün sahələrdə, eyni zamanda hərbi-texniki, müdafiə sənayesi sahəsində də əməkdaşlıq inkişaf etdirilir: "Bu, həm Azərbaycanın müdafiə qabiliyyətinin hər zaman güclü olmasını şərtləndirir, həm də ölkə iqtisadiyyatına əlavə dividendlər qazandırır. Hərbi sahənin inkişaf etdirilməsi dünya silah bazarında Azərbaycanın öz yerini və rolunu təyin etməsini şərtləndirəcək".
E.Mirbəşiroğlu qeyd edib ki, türk dünyasında həmrəyliyin möhkəmləndirilməsində, sıx əməkdaşlığın yaranmasında qardaş ölkənin xüsusi rolu var. 2009-cu ildə Azərbaycanın təşəbbüsü ilə Naxçıvanda Türkdilli Dövlətlərin Əməkdaşlıq Şurasının (indi Türk Dövlətləri Təşkilatı) yaradıldığını xatırladan deputat bildirib ki, bu platforma türkdilli dövlətlər arasında həm siyasi münasibətlər, həm də iqtisadi əməkdaşlığın inkişaf etdirilməsi üçün unikal imkanlar təqdim edir: "Ümumiyyətlə, türk dövlətlərinin maraqlarının qorunmasında Ərdoğanın təsirli rolu olub. Düşünürəm ki, Rəcəb Tayyib Ərdoğanın seçkilərdə qələbə qazanması bir çox məqamlar baxımından çox əhəmiyyətlidir. Birincisi, bu, Türkiyə xalqının milli maraqları, gələcək inkişafı baxımından tarixi hadisədir. Məhz Rəcəb Tayyib Ərdoğanın dövründə Türkiyə ixracın həcmini artıraraq istehlak bazarında xarici asılılıqdan qurtardı. Bu, həm də ölkəyə olan siyasi təsir imkanlarını məhdudlaşdırdı".
Deputatın fikrincə, Rəcəb Tayyib Ərdoğanın yenidən prezident seçilməsi çoxqütblü dünyanı dəstəkləyən dövlətlərin, xalqların qələbəsi hesab oluna bilər: "Azərbaycan-Türkiyə qardaşlığının, səmimi dostluğunun, müttəfiqlik münasibətlərinin bundan sonra daha da inkişaf etdirilməsi Ərdoğan üçün prioritetdir. Buna görə də Azərbaycan xalqı üçün Ərdoğanın qələbəsinin böyük əhəmiyyəti var. İslam-türk dünyasında Türkiyənin barışdırıcı, əməkdaşlığa təkan verən, həmrəyliyi gücləndirən rolu baxımından da Rəcəb Tayyib Ərdoğanın seçkilərdə qələbə qazanması çox vacib idi".
Türkiyədə demokratiya və türkçülük qalib gəldi
Qardaş Türkiyədə keçirilən seçkilərdə Rəcəb Tayyib Ərdoğanın növbəti dəfə Prezident seçildiyinin əhəmiyyətindən danışan Milli Məclisin deputatı Ceyhun Məmmədov azərbaycanlıların da Türkiyə vətəndaşları qədər bu qələbəni səbirsizliklə gözlədiklərini bildirib.
O vurğulayıb ki, Türkiyə qədər Azərbaycan xalqının da sevincinə səbəb olan bu qələbə təkcə qardaş ölkənin deyil, həm də xalqımızın, eləcə də bütöv türk və müsəlman dünyasının qələbəsidir: "Bu gün dünyamızın Rəcəb Tayyib Ərdoğan kimi liderlərə böyük ehtiyacı var. 28 mayda Türkiyədə demokratiya və türkçülük qalib gəldi. Qardaş Türkiyə bütün təbliğat və təxribatlara baxmayaraq, növbəti dəfə demokratik ənənələrə sadiqliyini nümayiş etdirdi. İmperialist qüvvələr seçki prosesinə kölgə salmağa çalışsalar da, buna nail ola bilmədilər. Türkiyəni Suriyaya, İraqa çevirmək istəyənlərin arzuları ürəklərində qaldı".
Deputat qeyd edib ki, Prezident İlham Əliyev və Azərbaycan xalqı əvvəldən bu qələbəyə inanırdı. "Biz bilirdik ki, qardaş Türkiyə xalqı düzgün qərar verərək, Türkiyənin xoşbəxt və parlaq gələcəyinə səs verəcək. Əminik ki, bu qələbə ilə Azərbaycan-Türkiyə münasibətlərində də yeni mərhələ başlayacaq. Biz əlaqələrimizi, dostluğumuzu, qardaşlığımızı daha da gücləndirəcəyik. Prezident İlham Əliyevin və Rəcəb Tayyib Ərdoğanın səyləri nəticəsində türk dünyası yeni zirvələrə yüksələcək".
C.Məmmədov bildirib ki, bu gün hər bir azərbaycanlı bu uğura görə çox sevinir. Bu qələbə ilə eyni zamanda Türkiyəni, Azərbaycanı sevməyənlərin arzuları ürəklərində qaldı: "Qardaş Türkiyə xalqını düzgün seçimə, düzgün qərara görə təbrik edirik. Yaşasın Türkiyə-Azərbaycan dostluğu və qardaşlığı!"
Türkiyə xalqı suverenliklə bərabər bölgənin təhlükəsizliyinə də səs verdi
Milli Məclisin deputatı Bəhruz Məhərrəmov deyib ki, Türkiyədə prezident seçkiləri xalqın və bütövlükdə türk dünyasının milli iradəsinin təntənəsi oldu.
O vurğulayıb ki, Qərb dünyası açıq formada anti-Ərdoğan kampaniyası apararaq Türkiyədə yenidən xaricdən asılı marionet bir rejim qurmaq, Türkiyənin artan güc və imkanları qarşısında birdəfəlik sədd çəkmək istəyirdi: "Bir sözlə, bu seçkilər Türkiyə üçün ikinci Çanaqqala savaşı idi və bir əsr sonra bu savaşda da yenə milli iradə qalib gəldi. Müdrik türk xalqı yenidən "Ərdoğan" deməklə parçalanmanın, potensial vətəndaş müharibəsinin qarşısını aldı, Türkiyəni marionet dövlətə çevrilməkdən qurtardı, müstəqillik, suverenliklə bərabər bölgənin təhlükəsizliyinə səs verdi".
Deputat qeyd edib ki, Ərdoğana qarşı "demokratik dəyərlər" adı altında səlib yürüşü təşkil edən Qərb dünyasına ən yaxşı cavab məhz 2 turlu azad seçki oldu. Ərdoğan türk düşmənlərini məhz demokratik dəyərlər ilə yerinə oturdub Qərbə seçki dərsi keçdi.
Seçkilərin Azərbaycan üçün də böyük əhəmiyyətə malik olduğunu deyən B.Məhərrəmov Türkiyənin ölkəmizin ən yaxın müttəfiqi olduğunu əlavə edib: "Ərdoğanın hakimiyyətdən getməsi arzuolunmaz situasiyalara səbəb ola bilərdi. Əlbəttə, Azərbaycanın yaratdığı reallığı kimsə dəyişə bilməzdi, lakin istənilən halda müxalifətin mesajları narahatlıq vəd edirdi".
Deputat vurğulayıb ki, 28 may seçkilərində qələbə həm də ən yüksək səviyyədə olan Azərbaycan-Türkiyə münasibətlərinin qızıl dövrünün yeni mərhələsini başladıb: "Güclü Türkiyə güclü Azərbaycan deməkdir, amma bu mürəkkəb siyasi situasiyada Prezident İlham Əliyev həm də göstərdi ki, eyni zamanda güclü Azərbaycan da güclü Türkiyə deməkdir. Bu gün qalib bizik. Bizim gücümüz, birliyimiz, cənab Prezidentin dediyi kimi, "bir millət, iki dövlət" və "bir yumruq" olmağımız bölgəmizdə sülhün, təhlükəsizliyin yeganə qarantıdır".
Əsmər QARDAŞXANOVA,
"Azərbaycan"
