Göygöllülər üçün il-ildən uğurlu gəlir
Regional inkişaf proqramlarında nəzərdə tutulmuş vəzifələrin icrası, habelə bu istiqamətdə həyata keçirilən digər tədbirlər hesabına bölgələrdə qeyri-neft sektorunun davamlı inkişafı, sosial infrastruktur təminatının yüksəldilməsi, sahibkarlıq mühitinin daha da yaxşılaşdırılması, yeni müəssisələrin, iş yerlərinin açılması və nəticədə yoxsulluğun səviyyəsinin azaldılması təmin olunmuşdur.
Bu baxımdan Göygöl rayonu da istisna deyil. Təkcə keçən il rayon üzrə ümumi məhsul buraxılışı 5,9, o sıradan sənaye məhsulunun həcmi 2,8, kənd təsərrüfatında ümumi məhsul istehsalı 2 dəfə artmışdır.
Rayonda taxılçılığın inkişafına xüsusi münasibət var. Son mövsüm sahələrdən 12328 ton taxıl götürülmüşdür. Hər hektardan məhsuldarlıq əvvəlki ilə nisbətən 12 sentner çox olmuşdur. Digər kənd təsərrüfatı məhsullarının istehsalında da yüksək göstəricilər qazanılmışdır. Sahələrdən 2615 ton kartof, 30066,7 ton tərəvəz, 2766,1 ton meyvə toplanmışdır.
Heyvandarlıq məhsullarının istehsalına gəldikdə cari ilin əvvəlinə olan məlumata görə, rayon üzrə 20,4 min baş qaramal, 118,9 min baş davar qeydə alınmışdır. Ötən il ət istehsalı 3287,4, süd istehsalı 24879 tona çatmışdır. Heyvanların cins tərkibinin yaxşılaşdırılması üçün də tədbirlər görülür. İl ərzində 1673 baş qaramal süni yolla mayalanmış və onlardan 829 baş bala alınmışdır ki, bu da əvvəlki illə müqayisədə 129 baş çoxdur. Mövcud mal-qaranın sağlamlığının qorunması, əhalinin sağlam və keyfiyyətli heyvandarlıq məhsulları ilə təmin olunması üçün digər tədbirlər də unudulmamışdır.
Rayonda sənaye müəssisələri və bu sahədə fəaliyyət göstərən fiziki şəxslər məhsul istehsalını əvvəlki ilə nisbətən 3,4 faiz artırmağa nail olmuşlar. Sənaye məhsullarının həcmində qeyri-dövlət mülkiyyətinin xüsusi çəkisi 69,3 faiz təşkil etmişdir.
Keçən ilin sentyabr ayında rayonun Keşkü kəndi ərazisində respublikamızda ilk dəfə olaraq moruq festivalı keçirilmişdir. Festivalda iştirak edən fermerlər istehsal etdikləri moruq məhsullarını yerli və xarici qonaqlara təqdim etmişlər. Tədbirdə həmçinin iştirakçılara moruq istehsalı ilə daha yaxından tanış olmaq imkanı yaradılmışdır. Onlar təqdim edilən moruq sortlarından dadmış və bəyəndiklərindən almışlar. Festivala gələn ziyarətçilər 100-ə yaxın fermer və sənətkarın istehsal etdiyi məhsullar və xalq tətbiqi sənətkarlıq nümunələri ilə də tanış olmuşlar.
Göygöl rayonu turizm imkanlarına da malikdir. Təkcə keçən il rayona 113 mindən çox turist gəlmişdir ki, bu da əvvəlki illə müqayisədə 29 min nəfər çoxdur. Söz yox ki, cari ildə onların sayının daha da artacağı gözlənilir. Odur ki, rayonda turizm mövsümünə hazırlıq işləri sürətlə gedir.
Sabir ƏLİYEV,
"Azərbaycan"
