Azərbaycan ədəbiyyatının çağdaş simaları arasında özünəməxsus yaradıcılıq xətti, həyat müşahidələri və güclü publisistik düşüncəsi ilə seçilən tanınmış yazıçı, publisist və hüquqşünas Lətifə Oruc növbəti beynəlxalq uğuruna imza atıb. Müəllifin oxucular tərəfindən maraqla qarşılanan “Sirli gedişlər” kitabının Qırğızıstanda qırğız dilində nəşr olunması bu ölkədə böyük maraq doğurub. Bunun nəticəsi olaraq azərbaycanlı yazıçı Qırğızıstana rəsmi dəvət alıb.
Azərbaycan, rus, ingilis, türk, özbək, qazax və qırğız dillərində çap olunan “Sirli gedişlər” əsəri müəllifin yaradıcılığının beynəlxalq miqyasda qəbul olunduğunu təsdiq edir. Müxtəlif dillərdə oxucu auditoriyası qazanan bu əsər təkcə bədii mətn kimi deyil, həm də həyatın, ailə dəyərlərinin, insan xarakterinin və zamanın sosial-mənəvi mənzərəsinin bədii salnaməsi kimi diqqət çəkir.
Səfər çərçivəsində Lətifə Oruc Qırğızıstan Milli Universiteti, Qırğızıstan Milli Kitabxanası, Qırğızıstan Yazıçılar Birliyi və Bişkek Dövlət Universitetində oxucular, ziyalılar, tələbələr və ədəbiyyatsevərlərlə silsilə görüşlər keçirib. Bu görüşlərdə müəllif yaradıcılıq yolu, kitabın yazılma tarixçəsi, əsərin ideya xətti və həyat fəlsəfəsi haqqında ətraflı danışıb, oxuculara kitablarını təqdim edib.
Qırğız oxucuların azərbaycanlı yazıçıya göstərdiyi sevgi xüsusi maraqla qarşılanıb. Ədəbi dairələrdə böyük rəğbətlə qarşılanan bu səfər iki qardaş xalq arasında mədəni əlaqələrin daha da möhkəmlənməsinə xidmət edən mühüm hadisə kimi dəyərləndirilir.
Səfər zamanı yazıçı Qırğızıstan Xalq Assambleyasının sədri Almambet Matubraimov ilə də görüşüb. Görüşdə Azərbaycan-Qırğızıstan mədəni əlaqələri, ədəbiyyatın xalqları yaxınlaşdıran gücü və gələcək birgə layihələr ətrafında fikir mübadiləsi aparılıb.
Yazıçının səfər proqramında yaddaqalan məqamlardan biri də Bişkek şəhərində fəaliyyət göstərən, Azərbaycan xalqının Ümummilli Lideri Heydər Əliyevin adını daşıyan məktəbdə keçirilən görüş olub. Bu görüş barədə həyəcanla danışan Lətifə Oruc bildirib ki, məktəbin pedaqoji kollektivi Azərbaycan xalqına dərin sevgi və ehtiramlarını ifadə edib. Bu mənəvi yaxınlıq yazıçını olduqca təsirləndirib.
Qırğızıstanda gördüyü böyük marağın nəticəsi kimi yazıçı ölkənin dövlət televiziyasına da dəvət olunub. Televiziya proqramında onun yaradıcılığı, “Sirli gedişlər” romanının uğuru və Azərbaycan ədəbiyyatının müasir inkişaf istiqamətləri barədə geniş söhbət aparılıb.
Lətifə Oruc 1960-cı il yanvarın 9-da Naxçıvan Muxtar Respublikasının Şərur rayonunun Düdəngə kəndində anadan olub. Bakı Dövlət Universitetinin hüquq fakültəsini fərqlənmə diplomu ilə bitirən yazıçı uzun illər hüquq sahəsində fəaliyyət göstərib.
Onun “Sirli gedişlər” əsəri müəllifin həyat yolunun, ailə yaddaşının, milli-mənəvi dəyərlərin və insan iradəsinin bədii ifadəsidir. Real həyat hadisələri əsasında qələmə alınan əsərdə sadə bir ailənin timsalında bütöv bir dövrün mənəvi portreti yaradılıb. Müəllif keçmiş sovet dönəmindən müstəqillik illərinədək yaşanan sosial, ailəvi və mənəvi hadisələri böyük ustalıqla təqdim edir.
Əsərin ən böyük uğurlarından biri onun sadə, axıcı və oxucunu ilk səhifədən son səhifəyədək öz təsiri altında saxlayan dilidir. “Sirli gedişlər” təkcə bir ailənin həyat hekayəsi deyil, zəhmətin, iradənin, ailə dəyərlərinin və həyat mübarizəsinin bədii manifestidir.
Bu gün Lətifə Orucun yaradıcılığı Azərbaycanın hüdudlarını aşaraq türk dünyasının müxtəlif coğrafiyalarında maraqla qarşılanır. Qırğızıstanda ona göstərilən yüksək diqqət və sevgi isə bir daha sübut edir ki, həqiqi ədəbiyyatın dili fərqli olsa da, ruhu həmişə eynidir - insanı insana yaxınlaşdırmaq, xalqları bir-birinə bağlamaq.
Elşən QƏNİYEV,
“Azərbaycan”
