”Ölkəmizi tanıyaq” tur-aksiyasının Şabran və Siyəzən rayonlarından olan iştirakçıları avqustun 13-də Gəncə şəhərinə gəldilər.
AzərTAc xəbər verir ki, qonaqlar şəhərlə ilk tanışlığa Heydər Əliyev Mərkəzindən başladılar.
Şagirdlərə məlumat verildi ki, şəhərdə ən mötəbər tədbirlər artıq iki ildir ki, fəaliyyət göstərən bu möhtəşəm Mərkəzdə keçirilir.
Sonra Gəncənin inkişafı ilə əlaqədar görülən işlər barədə məlumat verilərək bildirildi ki, Azərbaycan Prezidenti İlham Əliyev ölkəmizə rəhbərlik etdiyi son 10 ildən artıq müddətdə 12 dəfə Gəncəyə səfər edib. Bu səfərlərin hər biri gəncəlilərə unudulmaz anlar yaşadıb. Şəhərdə 5 müasir park , 5 muzey, bir neçə əzəmətli mərkəz inşa edilib. Onlardan da biri Heydər Əliyev Mərkəzidir. Burada dahi şəxsiyyətin həyat və fəaliyyəti öyrənilməklə yanaşı, geniş təbliğat işləri də aparılır.
Sonra şagirdlər Mərkəzin fəaliyyət sahələri ilə tanış oldular, ayrı-ayrı guşələrdə Ulu Öndərin həyat və fəaliyyətini əks etdirən fotoşəkillərə baxdılar.
Qrupun rəhbəri, Şabran Rayon Təhsil Şöbəsinin məsul işçisi Fikrət Şamxalov Mərkəzlə tanışlıqdan sonra təəssüratını bu sözlərlə ifadə etdi: ”Mən ilk dəfədir ki, belə əzəmətli bina görürəm. Bu Mərkəzin Prezidentimiz İlham Əliyevin iştirakı ilə açılışını televiziya vasitəsilə izləmişdim. Açığını deyim ki, öz gözlərimlə görəndə heyrətimi gizlədə bilmədim. Bu Mərkəz sözün əsl mənasında müstəqil Azərbaycanın memarı və qurucusu Heydər Əliyevin adına layiqdir”.
Avqustun 14-də Şabran və Siyəzən məktəbliləri Gəncənin tarixi, memarlıq abidələri, həmçinin görməli yerləri ilə tanış olacaqlar.
