Azərbaycan tarixi Zəfər qazanmaqla, ərazi bütövlüyünü və suverenliyini tam bərpa etməklə regionda yeni geosiyasi reallıq yaradıb. Cənubi Qafqaz regionunda artıq geriyə dönməz xarakter alan sülh gündəliyinin müəllifi Prezident İlham Əliyevdir. Azərbaycan yalnız sülh gündəliyini təqdim etmir, buna nail olmaq üçün sistemli, qətiyyətli və konkret addımlar atır.
Milli Məclisin deputatı Vüqar Rəhimzadə qəzetimizə açıqlamasında bildirib ki, bu gün regionda de-fakto sülh var və bunu hüquqi çərçivəyə salmaq üçün sülh sazişi artıq imzalanmalıdır: "Ermənistan konstitusion əsasda Azərbaycana qarşı bütün ərazi iddialarına son qoymalıdır ki, regionda davamlı və qəti sülh olsun. Ermənistan tərəfi sülh istəyirsə, ərazi iddialarına birdəfəlik son qoyaraq konstitusiyasına dəyişiklik etməlidir".
Cənubi Qafqaz regionunun geosiyasi transformasiya mərhələsindən keçdiyini qeyd edən deputat əlavə edib ki, bu kontekstdə Ermənistanda keçiriləcək parlament seçkiləri və ardınca mümkün referendum təşəbbüsü təkcə daxili siyasi hadisə deyil, həm də regional təhlükəsizlik və sülh gündəliyi baxımından vacib mərhələ kimi qiymətləndirilir. Bu mənada parlament seçkiləri faktiki olaraq Ermənistan cəmiyyətinin hansı strateji yolu seçəcəyini müəyyənləşdirəcək: normallaşma və regional inteqrasiya, yoxsa daha riskli siyasi xətt. "Seçkilərdən sonra gündəmə gələcək əsas məsələ xüsusilə konstitusiya dəyişiklikləri ilə bağlı olan referendumdur. Ermənistan konstitusiyasından Azərbaycanla bağlı ərazi iddialarına istinad edən müddəalar mütləq şəkildə çıxarılmalıdır. Sülh müqaviləsinin imzalanması üçün əsas və haqlı şərt budur. Əgər referendum konstitusion dəyişiklikləri təsdiqləyərsə, sülh müqaviləsinin imzalanmasının qarşısında heç bir əngəl qalmayacaq. Bununla da regionumuzda üzunmüddətli sülh və sabitlik üçün hüquqi baza formalaşacaq. Bu proses sərhədlərin delimitasiyasını, regional kommunikasiyaların açılması prosesini sürətləndirməklə yanaşı, Cənubi Qafqazda iqtisadi əməkdaşlıq üçün yeni mərhələnin də əsasını qoyacaq", - deyə o bildirib.
V.Rəhimzadə vurğulayıb ki, əks halda referendumun uğursuzluğu sülh prosesini ləngidə və ya qeyri-müəyyən vəziyyətə sala bilər ki, bundan zərərçəkən tərəf yenə də Ermənistan olacaq. Ona görə də Ermənistan cəmiyyəti faktiki olaraq seçim qarşısındadır: yeni reallıqları qəbul edərək normallaşma yoluna davam etmək, sülh şəraitində yaşamaq, yoxsa yenə dalan dövlət statusunu qoruyub saxlamaq.
Ə.QARDAŞXANOVA,
"Azərbaycan"
jpg_1777669996.jpg)
