Qanunsuz rejim özünü buraxmayana, ağ bayraq qaldırmayana qədər antiterror tədbirləri həyata keçiriləcək
İkinci Qarabağ müharibəsindəki məğlubiyyətindən sonra regionda sülhün bərqərar olunması üçün heç bir addım atmayan, əvəzində isə Qarabağdakı separatçı dəstələrə dəstək verən Ermənistana daha bir dərs verildi. Azərbaycan Ordusu Qarabağ bölgəsində lokal xarakterli antiterror tədbirləri keçirərək separatçı qüvvələrin hərbi təyinatlı obyektlərini, uzunmüddətli atəş nöqtələrini məhv etdi.
Azərbaycan dəfələrlə məğlub Ermənistana xəbərdarlıq ünvanlayaraq revanşist qüvvələrin yenidən silahlandırma prosesini dayandırmasını, hərbi təxribatlardan, mina terrorundan əl çəkilməsini tələb edirdi. Ancaq qarşı tərəf hər zamankı kimi oyunbazlıq edərək siyasi şantaja, manipuliyasiyaya əl ataraq diqqətləri yayındırmağa çalışırdı. İki gün öncə Ağdam-Xankəndi və Laçın yolu ilə yüklərin Xankəndiyə keçidinin reallaşması və ermənilərin etirafları Hayastanın "humanitar böhran" iddiasının ifşası ilə nəticələndi. Hayastanın dünya ictimaiyyətinə "həqiqət" kimi sırımaq istədiyi iddiaların ağ yalan olduğu üzə çıxan kimi əsl erməni xisləti özünü göstərdi. Son günlər törətdikləri təxribatlar, mina terroru nəticəsində Daxili İşlər Nazirliyinin və Azərbaycan Avtomobil Yolları Dövlət Agentliyinin əməkdaşları həlak oldular. Sentyabrın 19-da Ağdam istiqamətində atəşkəsi pozmaqla iki hərbi qulluqçumuzu yaraladılar.
Ümumiyyətlə, son bir neçə ayda Azərbaycanın Qarabağ bölgəsindəki Ermənistan silahlı qüvvələrinin birləşmələri tərəfindən ordumuzun mövqelərinin müxtəlif çaplı silahlardan sistemli şəkildə atəşə tutulması, ərazilərimizin minalanmasının davam etdirilməsi, döyüş mövqelərinin mühəndis cəhətdən təkmilləşdirilməsi, eləcə də səngər və sığınacaqların sayının artırılması gərginliyin artmasına səbəb olmuşdu.
Separatçıların döyüş mövqelərinin şəxsi heyət, zirehli texnika, artilleriya qurğuları və digər atəş vasitələri ilə gücləndirilməsi, bölmələrinin yüksək döyüşə hazırolma səviyyəsinə gətirilməsi, səfərbərlik üzrə əlavə bölmələrin yaradılması, kəşfiyyat fəaliyyətlərinin genişləndirilməsi, mövqelərimizin dərinliyinə sızaraq minalardan təmizlənmiş ərazilərin və mülki təyinatlı yolların terror-təxribat məqsədilə yenidən minalanması kimi əməlləri Azərbaycanın Qarabağ iqtisadi regionundakı "boz zona"dan gələn təhlükələrin zərərsizləşdirilməsi və konstitusiya quruluşunun bərqərar edilməsi üçün lokal xarakterli antiterror tədbirləri həyata keçirilməsi ilə bağlı qərar qəbul etməsinə səbəb oldu.
Sentyabrın 19-da günorta saatlarında başlanan antiterror tədbirləri çərçivəsində yalnız ermənilərin legitim hərbi obyektləri dəqiq silahlarla hədəfə alındı və sıradan çıxarıldı. Azərbaycan Müdafiə Nazirliyi yaşayış yerlərinin yaxınlığında atəş vasitələrinin Ermənistan silahlı qüvvələrinin birləşmələri tərəfindən yerləşdirilməsini nəzərə alaraq ərazidə olan mülki əhalini hərbi obyektlərdən kənar durmağa və Ermənistan silahlı qüvvələrinin birləşmələrinə dəstək olmamağa çağırış etdi.
Nazirliyin yaydığı məlumatda bildirildi ki, bu barədə mobil SMS xidməti vasitəsilə Azərbaycanın Qarabağ bölgəsinin erməni sakinlərinə məlumat göndərilib. Eyni zamanda səsgücləndirici texniki vasitələrlə əhali xəbərdar edilir və məlumat vərəqələri paylanılır. Azərbaycan Respublikasının qanunlarına və beynəlxalq humanitar hüquq normalarına uyğun olaraq təhlükəsizliyinə zəmanət verilən inzibati, sosial, təhsil, tibbi, dini və digər obyektlərin mühafizə və müdafiəsi təşkil olundu. Əhalinin təhlükəli ərazidən təxliyəsini təmin etmək üçün Laçın yolu üzərində və digər istiqamətlərdə humanitar dəhliz və qəbul məntəqələri yaradıldı.
Əməliyyat tədbirləri nəticəsində Xocalı rayonu və Qırmızı Bazar istiqamətində Ermənistan silahlı qüvvələrinin birləşmələrinin döyüş mövqeləri, uzunmüddətli atəş nöqtələri, döyüş vasitələri və hərbi təyinatlı obyektləri, separeatçılara məxsus P-18 radiolokasiya stansiyası (RLS), Ağdərə istiqamətində yerləşən Ermənistan silahlı qüvvələrinin 5-ci müdafiə briqadasına məxsus sursat anbarlarından biri, sığınacaq və döyüş texnikası, mülki infrastrukturumuzu hədəfə alan Ermənistan silahlı qüvvələrinin birləşmələrinə məxsus top qurğusu bölmələrimizin sərrast atəşi nəticəsində məhv edildi, Ermənistan silahlı qüvvələrinin birləşmələrinə məxsus hərbi təyinatlı radiotexniki qovşaq zərərsizləşdirildi.
Bütün zamanlarda mülki əhalini hədəfə alan Ermənistan yenə də öz xislətinə sadiq qalaraq Şuşa şəhərini iri çaplı silahlardan, o cümlədən minaatanlardan atəşə tutdu. Törədilən terror hücumu nəticəsində bir mülki şəxs həlak oldu.
Azərbaycan Ordusu, cəsur Azərbaycan əsgəri isə 44 günlük İkinci Qarabağ müharibəsində olduğu kimi bu əməliyyat tədbirlərində də heç bir mükli obyektə, mülki əhaliyə ziyan vurmadı.
Bir sözlə, Azərbaycanın öz suveren ərazisində həyata keçirdiyi kompleks tədbirlər Ermənistan Silahlı Qüvvələrinin hələ də bölgədə olan bölmələrinin hərbi infrastrukturunun məhv edilməsinə, Ermənistan hərbçilərinin tərk-silahı və neytrallaşdırılmasına yönəlib.
Lokal xarakterli əməliyyat tədbirlərinin dayandırılmasına gəlincə isə Azərbaycan Respublikası Prezidentinin Administrasiyası məlumat yayaraq separatçılara yeganə yolu göstərib - antiterror tədbirlərinin dayandırılması üçün qanunsuz erməni silahlı dəstələri ağ bayraq qaldırmalı, bütün silahlar təhvil verilməli, qanunsuz rejim özünü buraxmalıdır. Əks təqdirdə, antiterror tədbirləri sona qədər davam etdiriləcək.
Bir sözlə, Azərbaycan separatçıların yaratmaq istədikləri "boz zona"da bütün hərbi dəstələrin və hərbi obyektlərin məhv edilməsi, separatçıların tərk-silah olunması, konstitusiya normalarının tətbiqi, bölgədə əmin-amanlığın bərqərər edilməsi, təhlükəsizliyin təmin olunması, həmin ərazidə yaşayan insanların Azərbaycan cəmiyyətinə reinteqrasiyası, qanunlara uyğun formada idarəçiliyin formalaşdırılması, bütövlükdə regionun inkişafı ilə bağlı bütün tədbirləri həyata keçirəcək.
Rəşad BAXŞƏLİYEV,
"Azərbaycan"
