Rusiyanın Ukraynaya qarşı başladığı müharibədən sonra Odessa vilayəti yeganə logistik mərkəzə çevrilib. Bu gün bütün yüklərin demək olar 80 faizə yaxını regionun limanlarından keçir.
AZƏRTAC xəbər verir ki, bu barədə Odessa vilayəti Dövlət Administrasiyasının rəhbəri Oleq Kiper Azərbaycanın Ukraynadakı səfiri Seymur Mərdəliyevlə görüşündə deyib.
Onun sözlərinə görə, ilin əvvəlindən Odessa limanları vasitəsilə 50 milyon tona yaxın mal, əsasən də kənd təsərrüfatı məhsulları ixrac edilib.
“Dəniz blokadasına və düşmənin atəşinə baxmayaraq, biz bu gün müharibədən əvvəlki ticarət dövriyyəsinin təxminən 50 faizinə çata bilmişik”, - deyə Kiper vurğulayıb.
Müharibə zamanı göstərdiyi dəstək və yardıma görə Azərbaycan dövlətinə təşəkkürünü bildirən Oleq Kiper ölkəmizlə birgə iqtisadi, mədəni layihələrin reallaşdırılmasında maraqlı olduqlarını deyib.
Azərbaycanın Ukraynaya humanitar yardım siyasətini davam etdirəcəyini vurğulayan səfir Seymur Mərdəliyev isə bildirib ki, ölkəmiz Ukraynanın bərpasında da yaxından iştirak edir.
Diplomat Azərbaycanın Ukraynaya göstərdiyi humanitar yardımlar haqqında ətraflı məlumat verib. Bildirib ki, ölkəmiz Ukraynaya infrastruktur, sosial və humanitar layihələrdə yardım göstərməyə davam etməyə hazırdır.
Səfir, həmçinin Azərbaycanda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına - COP29-a hazırlıqla bağlı fikirlərini bölüşüb. Qeyd edib ki, Azərbaycan “yaşıl enerji”nin inkişafına ciddi töhfələr verir. Bu layihələrdən Avropa ölkələri də yararlanır.
Görüşdə tərəflər mövcud vəziyyəti, o cümlədən iqtisadi, mədəni və digər sahələrdə gələcək əməkdaşlığı müzakirə ediblər.
