Milli Məclisin sədri Sahibə Qafarova martın 6-da Moldova Respublikası Baş nazirinin müavini, xarici işlər naziri Mixay Popşoi ilə görüşüb.
Görüşdə Azərbaycan ilə Moldova arasında mövcud olan yüksəksəviyyəli siyasi əlaqələrin müxtəlif sahələr üzrə əməkdaşlığın inkişafı üçün geniş imkanlar yaratdığı qeyd edilib. Tərəflər ölkələrimiz və xalqlarımız arasında əlaqələrin dərinləşməsində dövlət başçılarının və hökumət rəsmilərinin qarşılıqlı səfərlərinin mühüm rol oynadığını vurğulayıblar. Həmçinin ölkələrimizin beynəlxalq təşkilatlar çərçivəsində qarşılıqlı dəstək nümayiş etdirməsindən məmnunluq ifadə olunub.
Milli Məclisin sədri bildirib ki, beynəlxalq parlament təşkilatları çərçivəsində əməkdaşlıq uğurla davam edir və bu qurumlarda Azərbaycan və Moldova deputatları bir-birinə qarşılıqlı dəstək nümayiş etdirirlər.
S.Qafarova İran tərəfindən Azərbaycanın Naxçıvan Muxtar Respublikası istiqamətində həyata keçirilən dron hücumlarını pisləyərək, ölkəmizə qarşı törədilən bu hücumların qəbuledilməz olduğunu və Azərbaycan xalqı tərəfindən böyük hiddətlə qarşılandığını diqqətə çatdırıb.
Mixay Popşoi isə Moldovanın bu hücumları qətiyyətlə pislədiyini bildirərək, bu məsələdə ölkəsinin Azərbaycanla həmrəy olduğunu qeyd edib.
Görüşdə qeyd olunub ki, Azərbaycan və Moldova bir sıra məsələlərdə, xüsusilə ərazi bütövlüyü və suverenlik məsələlərində bir-birinə qarşılıqlı dəstək nümayiş etdirirlər. Mixay Popşoi Moldovada baş vermiş enerji böhranı zamanı Azərbaycanın göstərdiyi dəstəyə görə minnətdarlığını ifadə edib.
Milli Məclisin sədri qonağa Azərbaycan ilə Ermənistan arasında davam edən normallaşma və sülh prosesi barədə də məlumat verib. Mixay Popşoi ölkəsinin sülh prosesində Azərbaycanın təşəbbüs və liderliyini alqışladığını bildirib.
Görüşdə qarşılıqlı maraq doğuran digər məsələlər ətrafında da fikir mübadiləsi aparılıb.
jpeg_1776696379.jpeg)
