"Heydər Əliyev İli" çərçivəsində Mingəçevir Dövlət Universitetində şəhər icra hakimiyyətinin təşkilatçılığı ilə "Əsrin müqaviləsi tarixi zəfərimizə gedən yolun başlanğıcıdır" mövzusunda konfrans keçirilmişdir. 
Konfransda şəhər icra hakimiyyətinin başçısı İlham İsmayılov çıxış etmişdir. Bildirilmişdir ki, Ümummilli Lider Heydər Əliyev 1969-cu ildə Azərbaycana rəhbər seçildikdən sonra sosial-iqtisadi həyatın bütün sahələrində olduğu kimi, neft emalı sənayesində də dərin keyfiyyət dəyişiklikləri baş vermişdir. Həmin illər Azərbaycanda neft sənayesinin inkişafına təkan verən 75 növdə 400-dən çox qurğu gətirilmiş, Xəzərin dərinliyində işləməyə imkan verən qazma qurğularının alınması nəticəsində dənizin daha dərin sahələrində zəngin neft və qaz yataqlarının kəşf olunmasına imkan yaranmışdır. Nəticədə 60-cı illərin sonu ilə müqayisədə yeni 8 neft və qaz yatağı kəşf edilmiş, neft ehtiyatları 2, qaz ehtiyatları isə 3 dəfə artmışdır. 80-ci illərdə isə üzən qazma qurğularının sayı 11-ə çatmışdır və onlardan istifadə nəticəsində indi Azərbaycan neftinin əsas hissəsini verən "Azəri", "Çıraq" və "Günəşli" yataqları kəşf olunmuşdur.
Qeyd edilmişdir ki, Azərbaycan müstəqilliyini bərpa etdikdən sonra 90-cı illərin əvvəllərində bir çox çətinliklərlə üzləşmişdir. Bu çətinliklər aşkar edilmiş "Azəri", "Çıraq", "Günəşli" kimi yataqların işlənməsinə imkan vermirdi. Belə vəziyyətdə xalqın tələbi ilə Azərbaycan rəhbərliyinə qayıdan Heydər Əliyev müstəqilliyini yenicə bərpa etmiş ölkənin neft sənayesinin bərpası və inkişafı ilə yaxından məşğul olmağa başladı. Ümummilli Lider xarici iri neft şirkətlərini Azərbaycana dəvət etmək qərarına gəldi və yeni neft strategiyası tez bir vaxtda işlənib hazırlandı. Elə ilk günlərdən ARDNŞ-nin birinci vitse-prezidenti İlham Əliyev danışıqlar prosesinə cəlb edilərək yeni neft strategiyasının hazırlanmasının və uğurla həyata keçirilməsinin ən fəal iştirakçılarından oldu. 1994-cü il sentyabrın 20-də "Azəri-Çıraq-Günəşli" yataqlarının işlənməsi üzrə 7 ölkənin 11 məşhur neft şirkəti ilə  "Əsrin müqaviləsi" imzalandı.
Konfransda daha sonra vurğulanmışdır ki, "Əsrin müqaviləsi"nin imzalanmasından keçən 30 ilə yaxın müddət ərzində Heydər Əliyevin yeni neft strategiyasının uğurla reallaşması günümüzün reallığına çevrilmişdir. Bu strategiya müstəqil dövlət kimi Azərbaycanın öz milli sərvətinin sahibi olmasının, iqtisadiyyatımızın dünya iqtisadiyyatına qovuşmasının, ölkəmizin böhranlardan çıxaraq dirçəlməsinin və ən əsası, sürətlə inkişaf edən, qüdrətli Azərbaycan dövlətinin yaranmasının rəmzidir. Məhz bu inkişaf və qüdrət bizə imkan verdi ki, müzəffər Ali Baş Komandan İlham Əliyevin rəhbərliyi ilə Azərbaycan Ordusu Qarabağ və Şərqi Zəngəzuru 30 illik işğaldan tam azad etdi. 
Konfransda Milli Məclisin deputatı Aydın Mirzəzadə, Mingəçevir Dövlət Universitetinin rektoru Şahin Bayramov, elmi işlər üzrə prorektoru Veysəl Əyyubov, kafedra müdiri Emiliya Hüseynova müxtəlif mövzularda məruzələrlə çıxış etmişlər.

Lazım QULİYEV,
"Azərbaycan"