Ayağımda yaranmış problemlə əlaqədar ictimai nəqliyyatdan istifadə etməyə çətinlik çəkirəm. Bu səbəbdən qarşılaşdığım problemlə bağlı sizə müraciət etmək qərarına gəldim.  Paytaxtda xətlərə buraxılan avtobuslar müasir standartlara qismən uyğun deyil.

Düzdür, səliqəlidir, kondisionerlə təmin olunublar, oturacaqlar sınıq-salxaq deyil, sürücülər müəyyən olunmuş qaydalara nisbətən əməl edirlər, ümumiyyətlə, əvvəlki avtobuslarla müqayisə olunası deyil. Amma fiziki məhdudiyyətli vətəndaşların avtobuslardan istifadəsi üçün infrastruktur yaradılmayıb.

Avropa standartlarında avtobusların səkilərə yaxın saxlayaraq problemi olan şəxslərin nəqliyyata rahat minməsinə şərait yaradılması hər birimizə məlumdur. Bizdə isə əsa ilə belə avtobusa qalxmaq çətinlik yaradır, hələ əlil arabasını demirəm, oturacaqda əyləşməsini gözləmədən avtobusu hərəkət etdirən sürücüləri demirəm… Avtobusların onlar üçün ayrılmış xüsusi ciblərdə yox, dayanacaqdan kənarda saxlaması heç kəsə sirr deyil. Bu vəziyyətdə panduslardan söhbət belə gedə bilməz. Bir sözlə, kömək olmadan, təkbaşına ictimai nəqliyyatdan istifadə fiziki məhdudiyyətli insanlar üçün ciddi problemdir. Nəzərə alsaq ki, 44 günlük Vətən müharibəsindən sonra  ölkəmizdə qazilərimiz, fiziki qüsurlu vətəndaşlarımız var, bu ciddi məsələnin həllinə məsul olan şəxslərin maneələrin aradan qaldırılmasına kömək edəcəklərinə ümid edirik.  Ətrafdakı insanlar əlilliyi olan şəxslərə kömək edirlər, amma bu problemin həlli deyil. Fiziki məhdudiyyətli insanlara heç kimdən asılı olmadan sərbəst hərəkət etmələri üçün şərait yaratmaq lazımdır.

Nuranə ƏLİŞOVA,

Bakı şəhər sakini