Bakı Slavyan Universitetində (BSU)  "Heydər Əliyev İli" çərçivəsində keçirilən Ümummilli Lider Heydər Əliyevin anadan olmasının 100 illiyinə həsr edilmiş “Azərbaycanşünaslığın aktual məsələləri (tədqiqat, elmi diskurs, beynəlmiləlləşmə)” adlı Beynəlxalq elmi konfransın “Heydər Əliyev və Azərbaycan təhsilinin inkişafı: regional kontekstdə” adlı 15-ci bölmə iclası Bakı Slavyan Universiteti, Lənkəran Dövlət Universiteti (LDU) və Lənkəran-Astara Regional Təhsil İdarəsinin birgə təşkilatçılığı ilə LDU-da keçirilib.
Tədbirdə əvvəlcə Azərbaycan Respublikasının Dövlət Himni səsləndirilib və Ulu Öndər Heydər Əliyevin və Azərbaycanın müstəqilliyi, torpaqlarımızın azadlığı uğrunda canlarından keçmiş şəhidlərin əziz xatirəsi bir dəqiqəlik sükutla yad edilib. 
BSU-nun rektoru Anar Nağıyev, LDU-nun rektoru Natiq İbrahimov və Lənkaran-Astara Regional Təhsil İdarəsinin (LARTİ) müdiri Elxan Nəcəfovun  rəhbərliyi ilə keçirilən bölmə iclasında hər iki ali təhsil müəssisəsinin professor-müəllim heyətinin, eləcə də regional təhsil idarəsinin müəllim və əməkdaşlarının məruzə və çıxışları dinlənilib.
BSU-nun rektoru Anar Nağıyev Ulu Öndər Heydər Əliyevin zəngin irsi, dövlətçilik fəaliyyəti barədə geniş çıxış edib. XX əsrin 70-ci illərinin başlanğıcında, Sovet İttifaqının sürətlə inkişaf etdiyi dövrlərdə müdrik rəhbər Heydər Əliyevin Azərbaycan dilini dövlət dili səviyyəsinə qaldırmasının təkcə öz xalqına olan sevgisi deyil, həm də böyük uzaqgörənlik missiyası olduğunu xüsusi qeyd edib. Rektor LDU-da keçirilən regional konfransın əsas hədəfinin Ümummilli Liderin Azərbaycan təhsili və xüsusilə də, regionlarda bu sahənin inkişafındakı misilsiz rolunu vurğulayıb. 
BSU-nun Tədris işləri üzrə prorektoru, dosent Ənvər Abbasov, Pedaqogika və psixologiya kafedrasının müdiri,  professor Piralı Əliyev, LDU-nun “Azərbaycan dili və ədəbiyyat” kafedrasının əməkdaşı, professor Yədullla Ağazadə, Beynəlxalq əlaqələr və layihələr üzrə prorektoru, dosent Zaur Məmmədov, “Pedaqogika, psixologiya və incəsənət” kafedrasının baş  müəllimi Nahidə Cəfərova, Lənkəran-Astara Regional İdarəsinin əməkdaşları İlham Əhmədov və  İlhamə Muradova çıxış ediblər.
Elmi konfransın sonunda regional fənn olimpiadasının qalibləri, həmçinin, beynəlxalq konfransda fəal iştirak edən çıxışçılar mükafatlandırılıb.

İ.ƏLİYEVA,
“Azərbaycan”