Gəncə Şəhər İcra Hakimiyyətinin başçısı Niyazi Bayramov Gəncə Dövlət Dram Teatrının İstanbulda V Maltəpə Beynəlxalq Teatr Festivalında  iştirak edən yaradıcı heyəti ilə görüşüb.
N.Bayramov festivalda uğurla çıxış edən yaradıcı heyəti təbrik edərək onlara daha böyük nailiyyətlər  arzulamışdır. Qazanılan bu uğuru  Prezident İlham Əliyevin və Birinci vitse-prezident Mehriban xanım Əliyevanın Gəncəyə, eləcə də Gəncə mədəniyyətinə göstərdikləri diqqətin nəticəsi kimi dəyərləndirmişdir. Qeyd etmişdir ki, Gəncə Dövlət Dram Teatrının yeni inşa edilmiş binası bu diqqətin bariz nümunəsidir. 
Teatrın direktoru Aqil Bəhramlı səmimi görüş üçün kollektiv adından dərin təşəkkürünü bildirmiş və demişdir ki,  Avrasiya Teatrlar Birliyinin təşkilatçılığı və Maltəpə Bələdiyyəsinin dəstəyi ilə V Maltəpə Beynəlxalq Teatr Festivalında Gəncə Dövlət Dram Teatrı rejissor Tural Mustafayevin quruluşunda E.İoneskonun "Kral ölür" tamaşası ilə çıxış etmişdir. Kral Beranje rolunu oynayan Əməkdar artist Elxan Abbasov festivalın yekununda "Ən yaxşı kişi aktyoru" nominasiyasında mükafata layiq görülmüşdür. Bununla yanaşı, yaradıcı kollektiv  "Kral ölür" tamaşası ilə Türkiyənin Trabzon, Ankara, Amasya və Gürcüstanın Ozurqeti şəhərlərində də qastrol səfərlərində olmuş və müxtəlif mükafatlar almışdır.
Görüşdə Gəncə Dövlət Dram Teatrının uğurlarından, gələcək fəaliyyətindən də danışılmış və teatrın beynəlxalq festivallarda iştirakının davamlı olacağı qeyd olunmuşdur.

Sabir ƏLİYEV,
 "Azərbaycan"