Ermənistanın bir dövlət olaraq ayaq üstə qalmasında mühüm rol oynayan diaspor və lobbi qüvvələri ilə İrəvan arasında münasibətlərin kifayət qədər pisləşməsi müşahidə olunmaqdadır.
İrəvanın region dövlətlərlə düşmənçilik siyasətinin həyata keçirilməsində diasporun da rolunun olduğu heç kimə sirr deyil. Ancaq indi görünür ki, Paşinyan hakimiyyəti diasporun təsir dairəsindən uzaq olmağa çalışır.
Bu günlərdə ABŞ-də səfərdə olan Ermənistanın baş naziri Nikol Paşinyanın məqsədlərindən biri də erməni diasporu ilə əlaqə yaratmaq olub. Lakin görünən odur ki, o buna nail olmayıb. Belə ki, erməni diasporunun nümayəndələri Paşinyanı Vaşinqtonda etirazla qarşılayıblar.
Daha əvvəl isə Amerika Erməni Milli Komitəsi Paşinyanın Azərbaycanla sülhə nail olmaq üçün beynəlxalq məhkəmələrə müraciət etmək məsələsindən əl çəkməklə bağlı açıqlamasını kəskin tənqid edib. Əslində, Paşinyanla diaspor arasında münasibətlər pisləşməyə 44 günlük müharibədə Ermənistanın məğlubiyyəti fonunda başlayıb. Çünki diaspor məğlubiyyətin günahkarı qismində məhz Paşinyanı görür.
Erməni ictimai xadim Manvel Livanosyan deyib ki, 2020-ci il müharibəsi böyük bir birləşmək siqnalı idi. Diasporun Ermənistana kömək etməsi, sonra əl-qolunu çəkməsi onun üçün yolverilməzdir: "Biz eyforiya ilə yaşayırdıq, bu müddət ərzində isə rəqib silahlandı. 2020-ci ilə qədər eyforiya var idi, indi məyusluq var. Hakimiyyətdən asılı olaraq Ermənistanı sevmək və ya sevməmək olmaz".
Xatırladaq ki, üç il öncə Ermənistanın milli təhlükəsizlik xidməti "Vətəndaşlıq haqqında" qanuna əlavə və dəyişikliklərin edilməsi ilə bağlı qanun layihəsini ictimai müzakirəyə təqdim etmişdi. Layihədə "diaspor erməniləri"nin Ermənistan vətəndaşlığı almaları üçün prosedurların sərtləşdirilməsi nəzərdə tutulurdu. Xaricdə yaşayan ermənilər üçün vətəndaşlıq almaq prosedurunun sərtləşdirilməsinin əsas səbəbləri bölgədəki vəziyyət, Ermənistan vətəndaşlığı alan şəxslərin sonradan ölkəyə gəlməmələri və erməniliyin xeyrinə fəaliyyət göstərməmələridir.
Ümumiyyətlə isə, xaricdə yaşayan ermənilərin siyasi düşüncəsi yoxdur. Onların Ermənistan, millət, erməni məsələsi və dövlətə münasibətdə ideyaları həddindən artıq abstraktdır.
Hayastanda iqtisadi durum da getdikcə ağırlaşır. Bunu keçirilən sosioloji sorğular da təsdiqləyir. Belə ki, bu günlərdə rəyi soruşulan insanların 38,3 faizi ölkə iqtisadiyyatının pis vəziyyətdə olduğunu düşünür. Respondentlərin 35,6 faizinin fikrincə, Ermənistan iqtisadiyyatı çox pis vəziyyətdədir. Əhalinin yalnız 0,6 faizi iqtisadi vəziyyətin çox yaxşı olduğunu bildirib.
Ermənistanın ümumi dövlət borcunun 13 milyard ABŞ dollarına çatacağı proqnozlaşdırılır ki, siyasi dilemmaların fonunda gözlənilən defolt bu ölkənin xarici borc öhdəlikləri sahəsində ciddi çətinliklər meydana çıxaracaq. Çünki defolt o deməkdir ki, dövlət borc öhdəliklərini vaxtında yerinə yetirə bilmir.
Beləliklə, bir daha aydın olur ki, Ermənistan cəmiyyətində pessimizm baş alıb gedir. İqtidar problemlərin həllində çıxılmaz vəziyyətə düşüb, müxalifət isə istədiklərinə nail ola bilmir. Bu vəziyyət bütövlükdə ölkədə idarəçiliyi iflic vəziyyətinə salıb.
Elçin CƏFƏROV,
"Azərbaycan"
