Azərbaycanda icra edilən iqtisadi islahatlar qeyri-neft-qaz sektorunun inkişafında önəmli rol oynaması məlum reallıqdır. Bu istiqamətdə görülən işlər və həmin sahədə çalışan sahibkarlara verilən dəstək qeyri-neft-qaz sektorunda məhsul istehsalı ilə yanaşı, ixracın da həcminin artmasına səbəb olub. Cari ilin yanvar-fevral ayları üzrə açıqlanan statistik rəqəmlərdən bunu açıq görmək mümkündür.
İqtisadi İslahatların Təhlili və Kommunikasiya Mərkəzinin (İİTKM) məlumatına görə, cari ilin yanvar-fevral aylarında Azərbaycanın qeyri-neft sektoru üzrə ixracı ötən ilin müvafiq dövrü ilə müqayisədə 6,6 faiz artaraq 485 milyon dollar təşkil edib. İki ay ərzində ölkə üzrə yeyinti məhsullarının ixracının dəyəri 12,3 faiz artaraq 153,9 milyon dollara bərabər olub. Həmin dövrdə ixrac olunan qara metallar və ondan hazırlanan məmulatlar 66,9, şəkər və şəkərdən hazırlanan qənnadı məhsulları 47, alkoqollu və alkoqolsuz içkilər 39,2, kimya sənayesi məhsulları 30 faiz, çay 21,3, alüminium və ondan hazırlanan məmulatlar isə 2,8 faiz artıb.
Hesabat dövründə aqrar məhsulların ixracında da artım müşahidə edilib. Belə ki, yanvar-fevral aylarında aqrar məhsullarının ixracının dəyəri 9,5 faiz artaraq 119,7 milyon, aqrar-sənaye məhsullarının ixracının dəyəri isə 17,7 faiz artaraq 43 milyon dollara bərabər olub. Bütövlükdə aqrar və aqrar-sənaye məhsullarının ixracının dəyəri 162,8 milyon dollar (11,6 faiz çox) təşkil edib.
"Azexport" portalı və tərəfdaşlarının ixraca dair "Fəaliyyət planı" müzakirə olunub. Məqsəd daha çox məhsulu geniş coğrafiyaya ixrac etməkdir. İİTKM-in operatoru olduğu "Azexport" portalı, "Meetup Networking Club" və Latviyanın "STC" şirkəti arasında əməkdaşlıq çərçivəsində cari il üzrə "Fəaliyyət planı" ilə bağlı görüşdə tərəflər arasında bağlanmış anlaşma memorandumunda nəzərdə tutulan layihələrin icra vəziyyəti müzakirə olunub.
Tədbirdə "Azexport" portalının rəhbəri Ayxan Qədəşov bildirib ki, Azərbaycan məhsullarının Amerika, Avropa və Asiya bazarlarına ixrac imkanlarının genişləndirilməsi üçün sertifikatlaşdırma, qablaşdırma, etiketləmə və brendləşdirmə istiqamətlərində birgə fəaliyyət davam edir.
"STC" şirkətinin rəhbəri Antanas Makarnvicius vurğulayıb ki, "GLOBALG.A.P", "HACCP" və "Organic" kimi sertifikatların mövcudluğu xarici bazarlara çıxışda ciddi üstünlük qazandırır. Bu baxımdan il ərzində Azərbaycanda fəaliyyət göstərən şirkətlərə layihə tərəfdaşları ilə birlikdə sadalanan sertifikatların əhəmiyyəti və prosedur qaydaları barədə seminarların, istehsal yerlərində real praktiki təlimlərin təşkili nəzərdə tutulur.
"Azexport" portalı xarici əlaqələrini genişləndirir. Bu məqsədlə portal Pakistan və Türkiyə şirkətləri ilə əməkdaşlığı genişləndirmək üçün müzakirələr aparır. "Azexport" portalı ilə Pakistan və Türkiyədən olan təşkilat nümayəndələri arasında görüş keçirilib. Görüşdə Pakistanda yerləşən Azərbaycan Ticarət Evinin rəhbəri Adeel S Butt, biznes hüququ üzrə beynəlxalq vəkil və iş adamı Muhammad Sohail Sajid və Türk Dünyası Vasitəçilik Assosiasiyasının (TDVA) Azərbaycan komissiyasının koordinatoru Aygün Əliyeva iştirak ediblər.
Həmin tədbirdə "Azexport" portalının rəhbəri Ayxan Qədəşov portalın Azərbaycan məhsullarının xarici bazarlara çıxarılması istiqamətində rəqəmsal həllərə dair geniş təqdimat edib. O, portalın rəqəmsal sərgi zalında pilot olaraq 10 Azərbaycan şirkəti üçün qurulan rəqəmsal stendlərin türk dövlətlərindən olan 100 şirkət üçün də qurulması istiqamətində işlərin davam etdirildiyini vurğulayıb. A. Qədəşov "Azexport" portalının beynəlxalq platformalarla iş prinsipi barədə də tədbir iştirakçılarına ətraflı məlumat verib.
Pakistandakı Azərbaycan Ticarət Evinin rəhbəri Adeel S Butt portal tərəfindən təqdim olunan rəqəmsal sərgi zalının innovativ və müasir həll yolu olduğunu bildirib. O, bu layihədə türk dövlətləri ilə yanaşı, Pakistanın da təmsil olunmasını, rəqəmsal stendlərlə bağlı imkanların Pakistan şirkətlərinə təqdimatı istiqamətində birgə fəaliyyətin planlaşdırılmasını təklif edib.
Görüşdə iştirak edən beynəlxalq vəkil və iş adamı Muhammad Sohail Sajid bildirib ki, "Azexport" portalının yerli sahibkarlara beynəlxalq platformalar vasitəsilə xarici bazarlara çıxışda göstərdiyi dəstək mexanizmi uğurlu və effektiv vasitədir: "Pakistan şirkətləri beynəlxalq sərgilərdə iştirak üçün ciddi yatırımlar, zaman və digər resurslar sərf edirlər. Beynəlxalq platformalarda vahid ad altında rəqəmsal formada təmsilçilik müasir və iqtisadi cəhətdən səmərəli seçim ola bilər". O, "Azexport" təcrübəsinin Pakistanda təqdim olunması və tətbiqi üçün portal nümayəndələrini Pakistana səfərə dəvət edib.
Rüstəm KAMAL,
"Azərbaycan"
jpg_1765911295.jpg)
