Qurumun ali nümayəndəsi, Avropa Komissiyasının vitse-prezidenti Kaya Kallasın Azərbaycana səfəri də bu məqsəddən irəli gəlir
Azərbaycana dünyada ehtiram gətirən əsas amillərdən biri dövlətimizin müstəqil və qətiyyətli siyasət həyata keçirməsidir. Təbəddülatlarla dolu və dünya nizamının böyük təzyiqlərlə üzləşdiyi bir şəraitdə bu cür siyasət yürütmək kifayət qədər çətin olsa da, rəsmi Bakı özünün milli maraqlarını inamla təmin edir. Eyni zamanda respublikamız iştirakçısı olduğu hər bir məsələdə etibarlı tərəfdaş kimi tanınır və bu, dəfələrlə müxtəlif hadisələrin fonunda öz təsdiqini tapıb. O cümlədən Azərbaycan Avropa İttifaqı ilə münasibətlərində də hər zaman səmimi olub, tərəfdaşlığa kölgə salan fəaliyyətə yol verməyib.
Amma elə müxtəlif hadisələrin fonunda görə bilərik ki, Avropa İttifaqı da bir sıra hallarda Azərbaycanın uğurlarına qarşı çıxanların sırasında ön yerlərdə olub. Bu baxımdan Aİ-nın Azərbaycanın ərazi bütövlüyünü bərpa etməsindən sonra, Ermənistanla münasibətlərin normallaşdırılması prosesində nümayiş etdirdiyi mövqe, Ermənistan-Azərbaycan sərhədinin Ermənistan tərəfində müşahidəçi missiyası saxlamaqla həyata keçirdiyi təxribatçı fəaliyyətin münasibətlərə xələl gətirməsi reallıqdır. Hamı bilir ki, adı mülki olsa da, bu, kəşfiyyat missiyasıdır. Missiyanın əməkdaşları "binokl diplomatiyası" yolu ilə Azərbaycanın mövqeləri, bölmələrin dislokasiya rayonları haqqında kəşfiyyat məlumatları toplayır, ardınca bu məlumatları Ermənistanın baş qərargahına ötürürlər.
Lakin dəyişikliklərə məruz qalan dünya nizamı, dünyanın siyasi qütbləri arasında yeni müstəviyə qədəm qoyan, daha da dərinləşən gərginliklər Avropa İttifaqını da yürütdüyü yanlış və milli maraqlarını ehtiva etməyən siyasətdən imtinaya vadar edir. Belə ki, indi özünün iqtisadi təhlükəsizliyi ətrafında daha çox düşünməyə məcbur olan Avropa İttifaqı bu məsələdə Azərbaycanla tərəfdaşlığın da mühüm rol oynadığının qənaətindədir. Avropa İttifaqının xarici siyasət və təhlükəsizlik məsələləri üzrə ali nümayəndəsi, Avropa Komissiyasının vitse-prezidenti Kaya Kallasın Azərbaycana səfəri də elə bu məqsədlərdən irəli gəlir.
Prezident İlham Əliyevlə görüşdə Avropa İttifaqı ilə Azərbaycan arasında enerji sahəsində çox uğurlu və səmərəli əməkdaşlığın olduğunu vurğulayan Kaya Kallas ölkəmizin Avropanın enerji təhlükəsizliyinin təmin olunmasında etibarlı tərəfdaş rolunda çıxış etdiyini deyib. O, nəqliyyat bağlantıları mövzusuna toxunaraq, bu xüsusda da çox mühüm regional bir dövlət olan və vacib geosiyasi məkanda yerləşən Azərbaycanın rolunun əhəmiyyətini vurğulayıb. Kaya Kallas Avropa İttifaqının Azərbaycanla əlaqələri yüksək dəyərləndirdiyini və bu münasibətləri daha da inkişaf etdirməkdə maraqlı olduğunu qeyd edib.
Bəli, nəhayət ki, Aİ Azərbaycanın dünya nizamındakı rolunu, qlobal proseslərə təsir imkanlarını görür. Sözsüz ki, Aİ Azərbaycanın regiondakı aparıcı rolunu, enerji təhlükəsizliyinə verdiyi töhfələri çoxdan bilir. Bu qurumun rəsmiləri həyata keçirilən enerji əməkdaşlığının ittifaq üzvləri üçün nə demək olduğunu hamıdan yaxşı anlayırlar. Kaya Kallası qəbul edərkən Prezident İlham Əliyevin dediyi kimi, Azərbaycan artıq Avropanın 10 ölkəsini, o cümlədən Avropa İttifaqının 8 üzvünü qazla təchiz edir. Azərbaycan qaz təchizatının coğrafi əhatəsinə görə Avropa məkanını qazla təmin edən ilk ölkələrdən biridir. Bütün bunlara rəğmən Aİ-nın Azərbaycanla Ermənistan arasındakı normallaşma prosesində nümayiş etdirdiyi destruktiv mövqe, Ermənistandakı missiyası vasitəsilə ölkəmizə qarşı apardığı hibrid müharibə, bu qurumun rəsmilərinin zaman-zaman səsləndirdiyi fikirlər sadəcə təəssüf doğurur.
Lakin Azərbaycan özünün qətiyyətli yolu və siyasəti olan dövlətdir. Hansısa təzyiqlər respublikamızı öz yolundan döndərə bilməz. Prezident İlham Əliyevin çıxışlarından birində dediyi kimi, müstəqil siyasətin alternativi yoxdur və gec-tez hər kəs bu siyasətlə hesablaşacaq. Və Avropa İttifaqının xarici siyasət və təhlükəsizlik məsələləri üzrə ali nümayəndəsinin Azərbaycana səfəri və təmsil etdiyi qurumun ölkəmizlə münasibətləri daha da inkişaf etdirməkdə maraqlı olduğunu bildirməsi Prezident İlham Əliyevin söylədiyi fikirlərin real həyatdakı təcəssümüdür.
Bütövlükdə, Aİ-nın üzləşdiyi çağırışlar, qlobal siyasi reallıqlar bu quruma Azərbaycanla münasibətlərdə fərqli davranmağı diqtə edir. Bu baxımdan Kaya Kallasın ölkəmizə səfəri həm də bu məqsədlərdən irəli gəlir. Aİ rəsmiləri onun da fərqindədirlər ki, dalanda qalan Ermənistan "qoca qitə" üçün heç bir önəm kəsb etmir. Azərbaycan isə Şərq-Qərb, Şimal-Cənub nəqliyyat dəhlizlərinin aparıcı iştirakçısıdır. Məhz respublikamızın sayəsində Orta dəhliz Avropa ilə Asiya arasında yüklərin daha sürətli daşınması üçün əsas istiqamət kimi özünü göstərir. Aİ-nın 8 üzvü əvvəldə qeyd edildiyi kimi, Azərbaycandan təbii qaz alır.
Bu mənada Aİ-nın xarici siyasət və təhlükəsizlik məsələləri üzrə ali nümayəndəsinin ölkəmizə səfəri və Prezident İlham Əliyevlə görüşü Azərbaycan-Aİ əlaqələrində dönüş nöqtəsi kimi qiymətləndirilə bilər. Görünən odur ki, Aİ Azərbaycanın əhəmiyyətini görür və əvvəl mövcud olmuş stereotiplər və yanaşmalardan geri çəkilir. Gözləntilər də ondan ibarətdir ki, bu səfər ikitərəfli münasibətlərdə yeni səhifə açacaq və onu yeni səviyyəyə yüksəldəcək.
Rəşad CƏFƏRLİ,
"Azərbaycan"
jpeg_1782323875.jpeg)
