"AŞPA qərəzli siyasəti ilə özünə zərbə vurur"

"Avropa Şurası Parlament Assambleyası (AŞPA) kimi qurumların qəbul etdiyi qətnamələrin bizim üçün əhəmiyyəti yoxdur. Bu baxımdan 24 iyun tarixində qəbul edilən növbəti sənədin də indiyə qədərkilərdən heç bir fərqi yoxdur. Heç kim bizimlə diktə dilində danışa  bilməz".

Bunu  qəzetimizə açıqlamasında Milli Məclisin deputatı Pərvanə VƏLİYEVA deyib. Əlavə edib ki, özünü "demokratik təsisat" hesab edən AŞPA Avropa Şurasının daxili prosedurlarını kobud şəkildə pozaraq, birtərəfli qaydada Azərbaycandan olan parlamentarilərin etimadnaməsinin tanınmasının əleyhinə səs vermişdi: "Lehinə səs verən deputatlar və qurum bununla ölkəmizə qarşı riyakarlıq və siyasi ikiüzlülük göstərdi. Bu gün regionda sülhə, sabitliyə və rifaha nail olunması əsas siyasi prioritetdir. Sülhün təşəbbüskarı və memarı isə Azərbaycandır. Azərbaycan və Ermənistan arasında artıq paraflanmış sülh sazişinə və de-fakto sülhə nail olunub. Ölkələr bir-birinin ərazi bütövlüyünü və suverenliyini tanıyır. Ermənistanın rəsmi mövqeyi isə açıq-aşkardır. Rəsmi İrəvan Qarabağın legitim sahibinin Azərbaycan olduğunu və mövzunun bağlandığını bildirir. Son seçkilərdə də erməni xalqı sülh prosesinin davamına səs verdi. Belə vəziyyətdə AŞPA qərəzli siyasəti ilə özünə zərbə vurur", - deyə o əlavə edib. 

Deputat qeyd edib ki, erməni diasporunun maliyyəsi ilə AŞPA və Avropa Parlamentində guya erməni xalqının mənafeyindən çıxış edən şəxslər bölgədə yaranan reallıqları görməzdən gəlirlər: "Onlar keçmiş narrativlərlə çıxış edərək, regionu əvvəlki vəziyyətə - münaqişə ocağına çevirməyə çalışırlıar. Çünki bu region uzun zaman onlar üçün əlavə gəlir yeri olub".  

Avropada insanların irqçilik, ksenofobiya, islamofobiya ilə rastlaşdıqlarını bildirən P.Vəliyeva vurğulayıb ki, Avropa parlamentlərinin deputatları, rəsmi şəxslər  öz ölkələrində ayrı-seçkilik olduğunu təsdiq edirlər: "Bəziləri islama qarşı mənfi münasibəti yolverilən hesab edirlər. Əslində, dini dözümsüzlük də diskriminasiyanın bir növüdür və bu, insan hüquqlarının pozulması deməkdir. Eyni zamanda tolerantlığa, BMT-nin İnsan Hüquqları üzrə Bəyannaməsinə də ziddir. AŞPA-lı deputatlar Azərbaycanın sülh təşəbbüslərinə ədalətsiz mövqe nümayiş etdirməkdənsə, fundamental insan hüquq və azadlıqlarının pozulmasının qarşısını almaq üçün müvafiq qanunvericilik təşəbbüsləri və effektiv nəzarət mexanizmləri hazırlamalıdırlar". 

AŞPA-nın dövlətlərin daxili işlərinə, o cümlədən məhkəmə proseslərinə müdaxilə etdiyini deyən deputat əlavə edib ki, hər bir ölkənin öz hüquq sistemi, hüquqi ənənələri və konstitusiyası mövcuddur. "Odur ki, bu cür lobbiçilik fəaliyyəti nə Avropanın təhlükəsizliyinə, nə regional sabitliyə, nə də beynəlxalq hüququn aliliyinə töhfə verir. Əksinə, ikili standartları dərinləşdirərək qlobal etimadı sarsıdır", - deyə yekunda deputat bildirib.

Ə.QARDAŞXANOVA,

"Azərbaycan"