İlham Əliyev son 20 ildə Azərbaycanı Avrasiyanın mühüm nəqliyyat qovşağına çevirib
Bu gün Avrasiyanın nəqliyyat xəritəsini Azərbaycansız, onun nəqliyyat infrastrukturu olmadan təsəvvür etmək mümkün deyil. Hazırda ölkəmizin ərazisindən Şərq-Qərb və Şimal-Cənub nəqliyyat dəhlizləri keçir. Bu dəhlizlər üzrə daşınan yüklərin həcmi ildən-ilə artır. Yüklərin daha səmərəli daşınması üçün fiziki infrastrukturla yanaşı, digər addımlar da atılır, o cümlədən rəqəmsallaşma məsələlərinə diqqət yetirilir. Qonşu ölkələrlə yeni əməkdaşlıq formatları yaradılıb və ortaq, müştərək müəssisələr qurulub. Bir sözlə, Azərbaycan Avrasiyanın əvəzolunmaz nəqliyyat mərkəzlərindən biridir.
Bir məsələni xüsusi vurğulayaq ki, adətən nəqliyyat mərkəzləri statusuna sahiblənən ölkələrin açıq dənizə, okeana çıxışları olur. Azərbaycan isə dənizə çıxışı olmayan ölkə kimi nəqliyyat qovşağına çevrilməyi bacarıb.
Bütün bunlar Prezident İlham Əliyevin son 20 ildə həyata keçirdiyi inkişaf konsepsiyasının uğurlarıdır. Məhz İlham Əliyevin rəhbərliyi ilə Azərbaycanın yol infrastrukturu sahəsində böyük irəliləyişlər əldə edilib. Bu gün ölkənin yol şəbəkəsi yalnız fiziki infrastrukturla məhdudlaşmır, eyni zamanda iqtisadiyyatın inkişafına, beynəlxalq əlaqələrin möhkəmlənməsinə və əhalinin sosial rifahına müsbət təsir göstərir. Yollar ölkənin müxtəlif bölgələrini birləşdirir, iqtisadiyyatın inkişafını sürətləndirir, beynəlxalq əlaqələri möhkəmləndirir.
Sözsüz ki, respublikamızın ötən 20 ilin ən böyük inkişaf göstəricilərindən və mühüm nailiyyətlərindən biri, modern və ən qabaqcıl standartlara cavab verən yol infrastrukturunun formalaşdırılmasıdır.
Prezident İlham Əliyevin hakimiyyətdə olduğu illər ərzində yol təsərrüfatının inkişafı ilə bağlı qəbul edilmiş proqramlar çərçivəsində aparılan uğurlu islahatlar nəticəsində Azərbaycan yol infrastrukturunun keyfiyyəti reytinqində MDB dövlətləri arasında 1-ci yerdə, dünyanın 140 ölkəsi arasında isə 27-ci yerdə qərarlaşıb.
Azərbaycan Avtomobil Yolları Dövlət Agentliyinin məlumatına əsasən son 20 il ərzində Azərbaycanda 21 min kilometr avtomobil yolu tikilib və təmir edilib. 335 körpü və yolötürücüsü, 45 tunel, 163 yerüstü və yeraltı keçid inşa edilib. Yol təsərrüfatının inkişafı ilə bağlı qəbul edilmiş proqramlar çərçivəsində aparılan uğurlu islahatlar nəticəsində, işğaldan azad edilmiş ərazilərdə tikintisi başa çatmış avtomobil yolları da nəzərə alınmaqla, I texniki dərəcəli avtomobil yollarının uzunluğu 12 dəfə artıb. Hazırda I texniki dərəcəli avtomobil yollarının ümumi uzunluğu 2189 kilometr təşkil edir.
Bu, inkişaf, ticarət və daşınma sistemlərinə birbaşa təsir edir. Yeni və yüksəkkeyfiyyətli yollar, məhsul və xidmətlərin daha sürətli və səmərəli daşınmasına imkan verir.
Prezident İlham Əliyev bu inkişafın, Azərbaycanın beynəlxalq bazarlara daha yaxın olmasına və iqtisadiyyatın böyüməsinə böyük təsir etdiyini qeyd edib. Göründüyü kimi, Azərbaycan hökuməti nəqliyyat sektorunun inkişafına xüsusi önəm verir. Şəhərdaxili nəqliyyat problemlərindən tutmuş beynəlxalq tranzit layihələrinə qədər genişmiqyaslı işlər aparılır. Bununla belə yeni yanaşmaların və innovativ həllərin tətbiqinə ehtiyac olduğu da aydın görünür.
Müzəffər Ali Baş Komandan, Prezident İlham Əliyevin rəhbərliyi ilə 44 günlük Vətən müharibəsində əldə edilən Şanlı Zəfər Azərbaycanda yol-nəqliyyat məsələləri ilə bağlı vəzifələri və hədəfləri də yenilədi. Azad edilmiş ərazilərdə görülən işlərin əsasını yol layihələri təşkil edir. Bu gün işğaldan azad edilmiş ərazilərdə dünyanın ən modern yol infrastrukturu yaradılır.
2020-2024-cü illərdə Qarabağ və Şərqi Zəngəzur iqtisadi rayonları ərazisində "Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı" çərçivəsində, həmçinin dövlət başçısının sərəncamları əsasında 44 avtomobil yolu layihəsinin tikintisi aparılır. Bu layihələr çərçivəsində 45 tunel, 447 körpü, 16 viadukun inşası nəzərdə tutulub. Bunlardan 28 tunel, 392 körpü və 9 viadukun tikintisi artıq tamamlanıb.
Prezident İlham Əliyev azad edilən Qarabağ və Şərqi Zəngəzur bölgələrində yeni avtomobil yollarının salınmasını və nəqliyyat infrastrukturunun bərpasını prioritet istiqamətlərdən biri kimi müəyyən edib. Bu layihələr Azərbaycanın gələcək inkişafına dayanıqlı əsaslar yaradır və ölkəni regionda daha da gücləndirir.
Yeni yollar yalnız iqtisadiyyatı deyil, həm də sosial həyatımızı yaxşılaşdırır. Kənd və dağlıq bölgələrə yeni yolların çəkilməsi, əhalinin təhsil, səhiyyə və digər xidmətlərə asan çıxışını təmin edir.
Yeni nəqliyyat dəhlizləri həmçinin, Azərbaycanın təbii və tarixi zənginliklərini daha çox insana tanıdaraq turizmin inkişafına kömək edir. Bu, ölkəmizə turist axınını artırır.
Yol tikintisi layihələrində ətraf mühitə zərər verməmək və ekoloji cəhətdən təmiz nəqliyyat sistemləri yaratmaq ön plandadır. Prezident İlham Əliyev bu yanaşmanın Azərbaycanın gələcək inkişafını dayanıqlı əsaslarla təmin edəcəyini vurğulayır. Yeni yolların tikintisində ekoloji cəhətdən təmiz yanaşmalar tətbiq edilir ki, bu da karbon emissiyalarını azaldaraq daha yaşıl bir gələcək təmin edir.
Beləliklə, Prezident İlham Əliyevin rəhbərliyi altında Azərbaycan Avtomobil Yolları Dövlət Agentliyinin həyata keçirdiyi layihələr, Azərbaycanın yol infrastrukturunun beynəlxalq standartlara uyğunlaşdırılmasına və ölkənin sosial-iqtisadi inkişafına əhəmiyyətli töhfə verib və proses bu gün də uğurla davam etdirilir. Azərbaycanın yol infrastrukturunda baş verən dəyişikliklər, möhtəşəm uğurlu layihələr Prezident İlham Əliyevin məqsədyönlü strategiyasının nəticəsidir.
Rəşad BAXŞƏLİYEV,
"Azərbaycan"
jpg_1762509871.jpg)
