35 il öncə, 1991-ci il aprelin 7-də Qubadlı rayonunda mülki Azərbaycan vətəndaşlarını qoruyarkən silahlı erməni birləşmələri tərəfindən qətlə yetirilən Oleq Babak haqqında nəşr edilən kitab onun Poltava vilayətinin Viktoriya kəndində yaşayan ata-anasına, təhsil aldığı, hazırda onun adını daşıyan kənd məktəbinə, Poltavadakı muzeyinə təqdim olunub.
AZƏRTAC xəbər verir ki, Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Zəngəzur” Cəmiyyətləri İctimai Birliyinin layihəsi əsasında Azərbaycan və Ukrayna dillərində nəşr edilən “Oleq Babak, Azərbaycan səni unutmayacaq!” kitabının müəllif yazıçı-publisist Hacı Nərimanoğludur. Kitabda AZƏRTAC-ın Oleq Babak haqqında hazırladığı reportajlar da yer alıb.
Poltavada Azərbaycan diasporunun rəhbəri Füzuli Qənbərov bildirib ki, diaspor təmsilçiləri qəhrəmanın məzarını da ziyarət edib, məzarı üstünə gül-çiçək dəstələri düzüblər. Oleqin atası Yakov Babak və anası Nadiya Babak yeganə övladları haqqında Azərbaycan və Ukrayna dillərində nəfis tərtibatlı belə bir kitabın nəşrindən olduqca mütəəssir olduqlarını, əməyi keçən hər kəsə minnətdarlıqlarını bildiriblər.
“Ukraynadakı Azərbaycan diplomatları, diaspor təmsilçiləri illərdir ki, bizə daimi qayğı, diqqət göstərirlər, bilirik ki, bizə qayğı Azərbaycan Prezidenti İlham Əliyevin birbaşa tapşırığı ilə həyata keçirilir”, - deyə Nadya Babak əlavə edib.
Bundan əlavə, mayın 21-də Kiyevdə “Millətlərarası Harmoniya və Mədəni Müxtəliflik Günü” münasibətilə Ukraynanın Milli Azlıqları və Yerli Xalqlarının Ümum-Ukrayna Forumu çərçivəsində təşkil olunan sərgidə sözügedən kitab da yer alıb. 300-dən çox iştirakçı - milli azlıqların və yerli xalqların nümayəndələri, hökumət rəsmiləri, diplomatlar, beynəlxalq tərəfdaşlar və ictimai xadimlərin bir araya gəldiyi forumda sözügedən kitabın nüsxələri Azərbaycanın Ukraynadakı səfiri Seymur Mərdəliyevə, Ukrayna Ali Radası sədrinin birinci müavini Oleksandr Kornienkoya, Ukraynanın İnsan hüquqları üzrə müvəkkili Dmitri Lubinetsə, diplomat və diaspor təşkilatlarına təqdim olunub.
Qeyd edək ki, Oleq Babak 1967-ci il fevralın 25-də Ukraynanın Poltava vilayətinin Viktoriya kəndində doğulub. SSRİ-nin Daxili İşlər Nazirliyinin Daxili Qoşunlarının xüsusi təyinatlı 21-ci briqadasının siyasi hazırlıq üzrə bölük komandirinin müavini olan Oleq Babak 1991-ci ilin martından Azərbaycanın Qubadlı rayonunda ictimai asayişin qorunması tapşırıqlarını yerinə yetirərkən silahlı erməni birləşmələri tərəfindən qətlə yetirilib. Ölümündən sonra o, “Sovet İttifaqı Qəhrəmanı” adına layiq görülüb.
