Elə insanlar var ki, temperatur isti olsa
belə, əl və ayaq nahiyələri daim buz kimi soyuq olur. Mütəxəssislər isə bu kimi
halların bəzi xəstəliklərin göstəricisi ola biləcəyini deyirlər.
Terapevt Xumar Novruzova əl və ayağın soyuq
olmasına səbəb olan həmin xəstəlikləri aşağıdakı kimi sıralayıb.
Qalxanvarı vəzin funksiyasının zəifləməsi
Qalxanvarı vəz orqanizmin termostatıdır desək,
yanılmarıq. Bu orqanın funksiyası zəiflədikdə orqanizmdə bütövlükdə mübadilə pozğunluğu
baş verdiyi üçün piylənmə, halsızlıq, qəbizlik və üşümə kimi əlamətlərə rast gəlinir.
Anemiya
Qanda hər hansı səbəbdən yaranan dəmir çatışmazlığı
nəticəsində oksigenlə təchizat pozulur və baş ağrıları, ümumi zəiflik, başgicəllənmə,
təngnəfəslik kimi əlamətlərlə birgə bədən üzvlərinin soyuması baş verir.
B12 vitamini çatışmazlığı
Bu vitamin ən çox ət, toyuq, yumurta və süd
məhsullarında olur, qanda hemoqlobinin miqdarı bununla bağlıdır. B12 vitamini çatışmazlığına
vegetarianlarda, 50 yaşdan yuxarı şəxslərdə, Kron xəstəliyi olanlarda rast gəlinir.
Bu vitaminə olan tələbatı ödəməklə problemləri həll etmək olur.
Qan təzyiqinin aşağı olması
Bu zaman bədənin qanla təchizatı zəifləyir.
Belə ki, qan daxili orqanları təmin etmək üçün səfərbər olur. Bunun bir çox səbəbləri
var: qanaxma, susuzlaşma, bəzi dərman preparatlarının qəbulu, endokrin xəstəliklər
və s. Əgər siz özünüzdə ətrafların soyumasından başqa, başgicəllənmə, ürəkbulanma,
ümumi halsızlıq hiss edirsinizsə, mütləq həkiminizlə məsləhətləşin.
Stress və həyəcan
Xroniki stress faktoru qanda adrenalinin
miqdarını artırır və nəticədə qan damarlarının spazmı baş verdiyi üçün əl-ayaqlar
soyuyur.
Dərman preparatları
Bəzi dərmanların. məsələn, beta-blokerlər,
miqren əleyhinə vasitələrin və s. qəbulu damarları, xüsusən də, arteriyaları daraltmaqla
əllərin soyumasına gətirib çıxarır.
Yasəmən MUSAYEVA,
"Azərbaycan”
