"Azərişiq" türkdilli dövlətlərin energetiklərini Hadrutda bir araya topladı

"Azərişıq" ASC-nin təşkilatçılığı ilə Hadrutda Ümummilli Lider Heydər Əliyevin 100 illik yubileyinə həsr olunmuş türkdilli dövlətlərin gənc energetikləri arasında "Paylayıcı Şəbəkələrin Rəqəmsal Transformasiyası" I Beynəlxalq Peşə Ustalığı Yarışması keçirilib.
Tədbirə Azərbaycanla yanaşı, Qazaxıstan, Qırğızıstan, Rusiya Federasiyasının Tatarıstan Respublikası, Türkiyə və Özbəkistandan energetiklərdən ibarət komandalar qatılıb. Qardaş ölkə Türkiyədən iki komanda "Uludağ" və "Başkənt" yarışlarda iştirak edib. 
Qurumun Mətbuat xidmətinin verdiyi məlumata görə, yarış iştirakçıları ilk olaraq Fəxri xiyabanda Ümummilli Lider Heydər Əliyevin məzarını ziyarət ediblər.
Tədbir iştirakçıları daha sonra Hadruta yola düşüblər.
Yarışlardan əvvəl iştirakçı ölkələri təmsil edən nümayəndələrin və yerli energetiklərin iştirakı ilə Hadrutda "dəyirmi masa" keçirilib. "Azərenerji" və "Azərişıq" ASC-nin işğaldan azad edilmiş ərazilərdə elektroenergetika sahəsində tətbiq etdiyi innovativ yeniliklər və türkdilli ölkələrin energetikləri arasında gələcək əməkdaşlıqla bağlı fikir mübadiləsi aparılıb.
Açılış mərasiminə Azərbaycan Respublikasının Dövlət Himninin səsləndirilməsi ilə start verildi. Daha sonra dövlət başçısı İlham Əliyevin tapşırıqları əsasında "Azərişıq" ASC tərəfindən işğaldan azad olunmuş ərazilərimizdə görülən yenidənqurma işləri haqda məlumat verilib. Həmçinin Ümummilli Lider Heydər Əliyevin Azərbaycanın elektroenergetikasının inkişafındakı müstəsna rolundan bəhs edən film nümayiş etdirilib. Rəsmi hissə başa çatdıqdan sonra gənc energetiklər arasında I Beynəlxalq Peşə Ustalığı Yarışmasına start verilib.
Yarışların ilk günündə elektroenergetikanın tarixi, inkişafı və müasir vəziyyəti mövzusunda tərtib olunan intellektual suallar cavablandırılıb. İntellektual yarışma başa çatdıqdan sonra xarici qonaqlar istifadəyə verilən Hadrut Qovşaq Yarımstansiyası və Rəqəmsal İdarəetmə Mərkəzi ilə tanış olublar. Tədbir iştirakçılarına ən müasir avadanlıqlarla təchiz edilən mərkəz haqda ətraflı məlumat verilib.
 Ümummilli Lider Heydər Əliyevin 100 illik yubileyinə həsr olunmuş türkdilli dövlətlərin gənc energetikləri arasında "Paylayıcı Şəbəkələrin Rəqəmsal Transformasiyası" I Beynəlxalq Peşə Ustalığı Yarışmasının ikinci günündə iştirakçılar peşə bacarıqlarını nümayiş etdiriblər. Qalib iştirakçılar müxtəlif nominasiyalar üzrə kubok və diplomlarla mükafatlandırılıblar. 
Onu da qeyd edək ki, Rusiya Federasiyasının Tatarıstan Respublikası Elektrik Şəbəkələr Şirkətinin baş direktoru İlşat Fardiyevin təklifi ilə Beynəlxalq Peşə Ustalığı Yarışması növbəti il Rusiya Federasiyasının Tatarıstan Respublikasıda təşkil olunacaq.