Bayramlar ayında rayonun Sarıcalı kəndinin sakinlərinin yurda dönməsi ilə Qarabağ zəfərimizin növbəti möhtəşəm səhifəsi yazıldı
"Mən işğal dövründə keçmiş köçkünlərlə çoxsaylı görüşlərim zamanı onlara müvəqqəti yaşayış evlərini təqdim edərkən hər dəfə deyirdim ki, torpaqlar azad olunandan sonra daha da gözəl şərait yaradılacaq və biz sizi öz doğma torpağınıza qaytaracağıq. Bu gün də o sözlərimin təsdiqi bir daha öz yerini tapır. Artıq 13-cü yaşayış məntəqəsidir ki, keçmiş köçkünlər qayıdırlar".
Martın 27-də Ağdam rayonunun Sarıcalı kəndində yeni evlərə köçən sakinlərlə görüşü zamanı Prezident İlham Əliyevin qürurla dilə gətirdiyi kimi, bu gün Azərbaycan dövlətinin Qarabağ və Şərqi Zəngəzurda həyata keçirdiyi quruculuq işlərinin dünyada misli-bərabəri yoxdur. Elə bu böyük əzmin sayəsindədir ki, o yerlərə mütəmadi qayıdış karvanları yola salınır, düz bir qərinə torpaq həsrəti ilə yaşayan keçmiş məcburi köçkünlər sevinclə dədə-baba yurdlarına qayıdırlar, söndürülmüş ocaqlarını yenidən qalayırlar.
2022-ci il iyulun 19-da Zəngilanın Ağalı kəndinin sakinlərinin yurda dönüşləri ilə başlanğıcı qoyulan Böyük qayıdış bu il də uğurla davam edir. Yenidən qurulan şəhər və kəndlərimizin sayı gündən-günə artır. Artıq Laçın, Füzuli, Şuşa, Xocalı, Cəbrayıl şəhərlərində, Zəngilan rayonunun Ağalı, Tərtər rayonunun Talış, Xocalı rayonunun Ballıca, Laçın rayonunun Zabux və Sus, Ağdərə rayonunun Həsənriz və Suqovuşan kəndlərində yenidən həyat qaynayır.
Bu il Ramazan bayramı ərəfəsində isə Ağdamın Sarıcalı kəndində qayıdışla bayram sevinci birgə yaşandı. Xoş ənənə halını aldığı kimi, bu kəndə köçən sakinlərə də yeni evlərinin açarlarını Qarabağın qurucusu İlham Əliyev şəxsən təqdim etdi. İşğal dövründə düşmənin xarabalığa çevirdiyi, görənlərin dəhşətlə "Qafqazın Xirosiması" adlandırdığı Ağdama yenidən həyatı qaytaran qalib lider İlham Əliyev bununla bir daha dünyaya "Qarabağ Azərbaycandır!" ismarışını çatdırdı, dostları sevindirdi, düşmənlərə göz dağı verdi: "İndi Ağdam rayonunun ilk sakinləri sizsiniz. Amma yaxın aylarda qonşularınız da gələcək, Xıdırlıya, - yəqin ki, görmüsünüz, böyük inşaat işləri gedir, - Kəngərliyə, ilin sonuna qədər Ağdam şəhərinə. Burada rahat, xoşbəxt yaşayacaqsınız".
Yurda dönüş
Vətən müharibəsindən dərhal sonra dövlətimiz tərəfindən Qarabağ və Şərqi Zəngəzurda böyük quruculuq həyata keçirilir. Bu yerlərdə görülən işləri şəxsi nəzarəti və diqqəti altında saxlayan Prezident İlham Əliyevin gündəliyində duran vacib məsələlərdən biri də məhz Qarabağın və Şərqi Zəngəzurun bərpasıdır. Buna görə də həmin ərazilərimizdə "ağıllı kənd və şəhərlər" salınır, beynəlxalq hava limanlarından, kilometrlərlə uzunluqda tunellərdən, yollardan tutmuş çoxsaylı SES, su anbarına qədər böyük infrastruktur layihələri həyata keçirilir.
Digər işğaldan azad edilən rayonlarımız kimi, Ağdam da sürətlə dirçəldilir. Rayonda quruculuq işlərinin geniş vüsət aldığı yerlərdən biri də Sarıcalı kəndidir. Təməli 2022-ci il oktyabrın 4-də Prezident İlham Əliyev tərəfindən qoyulan kənd 1873 nəfər (425 ailə) əhali üçün planlaşdırılıb. Layihələndirilən ümumi ərazisi 123 hektardan çoxdur. Ümumilikdə kənddə 2 mərhələ üzrə 425 fərdi evin inşası nəzərdə tutulub. Martın 27-də Prezident İlham Əliyev və birinci xanım Mehriban Əliyeva Sarıcalı kəndində yerli icra strukturları üçün inşa olunmuş çoxfunksiyalı inzibati binanın, Sarıcalı kənd körpələr evi-uşaq bağçasının, kənd tam orta məktəbinin binasının açılışında iştirak ediblər, həmçinin burada yeni inşa edilmiş fərdi yaşayış evlərində yaradılan şəraitlə tanış olublar. Qeyd edək ki, birinci mərhələ üzrə kəndə 895 nəfərin (203 ailə) köçürülməsi planlaşdırılır. Artıq 203 fərdi ev inşa olunub.
Sarıcalı sakinlərinə yeni evlərinin açarlarını təqdim edən Prezident İlham Əliyev söylədi ki, Ağdam rayonunun bərpa edilmiş birinci kəndinin sakinləri ilə görüşmək böyük xoşbəxtlikdir: "Uzun fasilədən sonra siz doğma torpağınıza qayıtmısınız. Burada sizin üçün gözəl şərait yaradılıb". Dövlət başçısı bildirdi ki, bu il Ağdamın Kəngərli, Xıdırlı kəndlərinə də qayıdış nəzərdə tutulub, digər kəndlərdə inşaat işləri gedir. Eyni zamanda Ağdam şəhəri sıfırdan yenidən qurulur və ölkəmizin ən gözəl şəhərlərindən birinə çevriləcək.
Prezident İlham Əliyev məlumat verdi ki, Ağdamda indi genişmiqyaslı quruculuq işləri aparılır. İşğaldan sonrakı dövrdə bir çox önəmli infrastruktur obyekti istifadəyə verilib. Ağdam-Bərdə yolu yenidən qurulub, Ağdam-Xankəndi yolu inşa edilir. Dəmir yolu çəkilir və bu il istifadəyə verilməsi planlaşdırılır. Vağzal kompleksi, Muğam Mərkəzi inşa edilir. Ağdam məscidi, "İmarət" Kompleksi, Natəvanın qəbri bərpa olunub, Xaçınçay su anbarı yenidən qurulub. Məktəb binası inşa edilir, xəstəxana tikilir, böyük sənaye kompleksi fəaliyyət göstərir. Artıq bir neçə müəssisə orada fəaliyyət göstərir və bu, Qarabağ, Şərqi Zəngəzur bölgəsinin ən böyük sənaye kompleksi olacaq. Eyni zamanda burada bir neçə yaşayış kompleksi inşa edilir və bu il istifadəyə veriləcək. Həmçinin bölgənin turizm imkanları nəzərə alınaraq iki mehmanxana artıq fəaliyyətə başlayıb.
Azərbaycanın mədəniyyət paytaxtı Şuşada da sürətli bərpa və quruculuq işləri davam edir. Martın 27-də birinci xanım Mehriban Əliyeva ilə birgə Şuşaya səfər edən Prezident İlham Əliyev zəfər qalamızda tarixi Çöl Qala məscidinin və bulağının bərpadan sonra açılışında iştirak edib, iaşə obyektlərində yaradılan şəraitlə, Qarabağ küçəsində, Şuşa Müalicə-Sağlamlıq Mərkəzində və Yeni Şuşa məscidində aparılan tikinti işləri ilə tanış olub.
Xatırladaq ki, Şuşaya ilk qayıdış köçü 2024-cü ilin mayında gerçəkləşdirilib. Şəhərdə 371 ailə (1396 nəfər) məskunlaşıb.
"Elə bir şəhər quracağıq ki, bütün dünya bizə həsəd aparacaq"
Qarabağ və Şərqi Zəngəzurun yenidən qurulan 13 yaşayış məntəqəsində artıq 12034 nəfər (3014 ailə) yaşayır. Ümumilikdə isə bu ərazilərdə 40 mindən çox insan yaşayır və çalışır. Bu statistikanın özü də işğaldan azad edilən torpaqlarımızda qısa zaman ərzində dövlətimiz tərəfindən görülən kompleks işləri aydın şəkildə gözlər önünə sərir.
"Yadımdadır, işğaldan sonra ilk dəfə Ağdamda ağdamlılarla görüşəndə və yeni şəhərin təməlini qoyanda mən demişdim, elə bir şəhər quracağıq ki, bütün dünya bizə həsəd aparacaq" deyən Prezident İlham Əliyev sarıcalılılarla görüşü zamanı bildirdi ki, Azərbaycan dövləti bu gün bu işləri görməyə qadirdir. Dövlət başçısı əlavə etdi: "Mən təkcə Ağdam rayonunda gedən işləri sadaladım. Amma əgər bütövlükdə azad edilmiş torpaqlarda gedən işləri götürsək, qısa müddət ərzində bu qədər bərpa işləri heç bir ölkədə heç vaxt görülməmişdir".
Yasəmən MUSAYEVA,
"Azərbaycan"
