Yaponiyanın Azərbaycandakı fövqəladə və səlahiyyətli səfiri Vada Cüniçi və həyat yoldaşı Gədəbəy rayonuna səfər etmişlər.
Rayon icra hakimiyyətində keçirilən görüşdə RİH-in başçısı İbrahim Mustafayev dağlar qoynunda yerləşən füsunkar Gədəbəy rayonu haqqında, eləcə də yeni yaradılmış Operativ Xidmət Mərkəzinin fəaliyyəti barədə qonaqlara ətraflı məlumat vermişdir.
Qeyd olunmuşdur ki, mərkəzin yaradılmasında əsas məqsəd rayon icra hakimiyyətinin səlahiyyətlərinə daxil olan xidmət və fəaliyyətlərin optimallaşdırılması, vətəndaş müraciətlərinin operativ həllinə nail olunması, vətəndaşın eyni vaxtda vahid məkanda rayon icra hakimiyyətinin bütün struktur bölmələri ilə ünsiyyətdə olmasının təmin edilməsi, keyfiyyətli xidmətin göstərilməsi və son nəticədə vətəndaş məmnunluğunun yüksəldilməsini təmin etməkdən ibarətdir.
Sonra qonaqlar Operativ Xidmət Mərkəzində olmuşlar. Burada quraşdırılmış monitorda Gədəbəyin tanıtım videoçarxına baxmış, mərkəzdə fəaliyyət göstərən könüllülərlə xatirə şəkli çəkdirmişlər.
İ.Mustafayev yaponiyalı qonaqlara Gədəbəyin tarixi, iqtisadiyyatı, mədəniyyəti, turizm potensialı barədə ətraflı məlumat vermiş, rayonda kartofçuluq, heyvandarlıq kimi ənənəvi kənd təsərrüfatı sahələrinin yüksək səviyyədə inkişaf etdiyini diqqətə çatdırmış və bu regionun qədim tarixi-memarlıq abidələri ilə zəngin olduğunu qeyd etmişdir. Bildirmişdir ki, Gədəbəydə turizm sahəsinin inkişafı üçün bütün imkanlar mövcuddur.
Daha sonra qonaqlar Yaponiyanın “Ot kökləri və İnsan Təhlükəsizliyi” Qrant Yardımı Proqramı çərçivəsində Gədəbəy rayonunun Qoşabulaq kəndində inşa edilən tibb məntəqəsində olmuşlar. Qeyd edək ki, müasir standartlara uyğun inşa edilən Qoşabulaq həkim məntəqəsi ötən ilin sentyabr ayında istifadəyə verilmişdir.
Səfir Cüniçi Vada və xanımı Gədəbəydə olduğu müddətdə rus icmasının nümayəndələri ilə də görüşmüş, əkin sahələri, qızıl mədəninin ərazisi, rayon Aşıqlar Məktəbi ilə tanış olmuşlar. Sonda qonaqlar Milli Yaylaq Festivalının keçirildiyi ərazidə və Siemens qardaşlarından yadigar qalan Qanlı körpüyə baxış keçirmişlər.
Sabir ƏLİYEV,
“Azərbaycan”
