44 günlük savaşda  şəhid olanlar arasında Ağstafanın Ağgöl kənd sakini, Vətən Müharibəsi Qəhrəmanı Azər Yusifli də var. Rayon sakinləri digər şəhidlər kimi, onun da xatirəsini daim əziz tutur, adının əbədiləşdirilməsi üçün müxtəlif tədbirlər həyata keçirirlər. 
Bu günlər Azərin vaxtilə təhsil aldığı və ölümündən sonra adı verilmiş Böyük Kəsik kənd orta məktəbində onun xatirəsinə həsr olunmuş güləş üzrə rayon birinciliyi keçirilmişdir. Rayon rəhbərliyinin, şəhidin atası Nazim Yusifovun, hüquq-mühafizə orqanları və ictimaiyyət nümayəndələrinin iştirak etdikləri idman yarışında ölkəmizin azadlığı və suverenliyi uğrunda canını fəda edən şəhidlərimizin xatirəsi birdəqiqəlik sükutla yad edilmişdir.
Açılış mərasimində Nazim Yusifov çıxış edərək xalqımızın ən böyük qürur yeri olan şəhidlərimizin xatirəsinə həsr olunan belə tədbirlərin əhəmiyyətini yüksək qiymətləndirmiş, eyni zamanda ölkəmizdə şəhid ailələrinə, müharibə iştirakçılarına göstərilən yüksək dövlət qayğıkeşliyindən danışmışdır.
82 yeniyetmə və gənc güləşçinin iştirak etdiyi və gərgin idman mübarizəsi şəraitində keçən yarışda yüksək yerləri tutan idmançılar Ağstafa Rayon Gənclər və İdman İdarəsinin,  Ağstafa Təhsil Sektorunun müvafiq diplom və medalları ilə təltif olunmuşlar.
Yarışdan sonra iştirakçılar Ağgöl kənd qəbiristanlığına gələrək Vətən Müharibəsi Qəhrəmanı Azər Yusiflinin, eləcə də həmin qəbiristanlıqda dəfn olunan digər şəhidlərin məzarlarını ziyarət etmişlər.

Sabir ƏLİYEV,
"Azərbaycan"