Beynəlxalq münasibətlər sistemində yeni güc mərkəzlərinin
formalaşdığı, qlobal siyasi və iqtisadi proseslərin sürətlə dəyişdiyi müasir
dövrdə dövlətlərin milli maraqlarının qorunması, təhlükəsizliyinin təmin edilməsi
və davamlı inkişafı məhz qətiyyətli idarəçilikdən asılıdır. Tarixi təcrübə göstərir
ki, prinsipial mövqeyi, strateji baxışı və milli maraqlara söykənən siyasəti ilə
seçilən liderlər öz ölkələrini mürəkkəb sınaqlardan çıxarmağa, onların beynəlxalq
mövqeyini möhkəmləndirməyə nail olurlar.
Azərbaycanın son illərdə keçdiyi inkişaf yolu
da bunun bariz nümunəsidir. Son ictimai rəy sorğularında Prezident İlham Əliyevə
yüksək etimadın ifadə olunması həyata keçirilən siyasətin cəmiyyətdə geniş dəstək
qazandığını göstərir. Bu etimad uzun illər ərzində həyata keçirilən ardıcıl
islahatların, əldə olunan uğurların və ölkənin dinamik inkişafının məntiqi nəticəsidir.
Etimadın əsas səbəblərindən biri Prezident
İlham Əliyevin həyata keçirdiyi uzaqgörən və milli maraqlara əsaslanan siyasətdir.
Dövlət başçısı fəaliyyətində hər zaman Azərbaycan xalqının mənafeyini əsas
prioritet kimi müəyyənləşdirib, milli maraqların beynəlxalq münasibətlər
sistemində ardıcıl və prinsipial şəkildə müdafiəsini təmin edib. Mürəkkəb
geosiyasi proseslərin yaşandığı bir dövrdə Azərbaycanın uğurlu xarici siyasət
kursu ölkənin müstəqilliyini, siyasi sabitliyini və strateji mövqeyini daha da
gücləndirib.
Liderliyin gücü yalnız qəbul edilən qərarlarla
deyil, həm də xalqla dövlət arasında qarşılıqlı etimadın möhkəmləndirilməsi ilə
ölçülür. Prezident İlham Əliyev dəfələrlə bəyan edib ki, onun ən böyük dayağı
Azərbaycan xalqıdır. Xalqın iradəsinə söykənən idarəçilik modeli, vətəndaşlarla
açıq dialoq və milli maraqların əsas götürüldüyü qərarlar cəmiyyətlə dövlət
arasında etimadı daha da gücləndirib. Məhz bu birlik qarşıda duran mühüm vəzifələrin
uğurla həyata keçirilməsində həlledici rol oynayıb.
Müasir dövrdə liderin şəxsi keyfiyyətləri dövlətin
beynəlxalq nüfuzuna da birbaşa təsir göstərir. Təsadüfi deyil ki, Avropa
Komissiyasının Prezidenti Ursula Fonder Leyen də ölkəmizə səfəri zamanı
regionda sülh təşəbbüslərinin təşviqində Azərbaycan Prezidentinin liderlik
keyfiyyətlərinin xüsusi rol oynadığını vurğuladı. Cənab Prezidentin qətiyyətli siyasi iradəsi,
strateji düşüncəsi və operativ qərarvermə bacarığı Azərbaycanın həm regionda, həm
də beynəlxalq arenada mövqeyini əhəmiyyətli dərəcədə möhkəmləndirib. Bu gün Azərbaycan
regional və qlobal əhəmiyyətli layihələrin təşəbbüskarı, etibarlı tərəfdaş və
söz sahibi olan dövlətlərdən biri kimi tanınır.
Ölkəmizin sosial-iqtisadi inkişafı da həyata
keçirilən siyasətin səmərəliliyini təsdiqləyən əsas göstəricilərdəndir. Güclü
iqtisadi potensialın formalaşdırılması, iri infrastruktur layihələrinin
reallaşdırılması, enerji və nəqliyyat sahələrində strateji təşəbbüslərin həyata
keçirilməsi, müdafiə qabiliyyətinin gücləndirilməsi və müasir ordunun qurulması
Azərbaycanın dayanıqlı inkişaf modelini daha da möhkəmləndirib.
Azərbaycanın Cənubi Qafqazın aparıcı dövləti
kimi mövqeyinin güclənməsi də müstəqil və milli maraqlara əsaslanan siyasətin
mühüm nəticəsidir. Beynəlxalq təşkilatlarda fəal iştirak, müxtəlif dövlətlərlə
qarşılıqlı faydalı əməkdaşlığın inkişafı və qlobal proseslərdə fəal mövqe ölkəmizin
beynəlxalq nüfuzunun artmasına mühüm töhfə verir.
Prezident İlham Əliyevin rəhbərliyi ilə Azərbaycanın
ərazi bütövlüyü və suverenliyi tam təmin olunub. Bu tarixi nailiyyət güclü
siyasi iradənin, iqtisadi qüdrətin, müasir ordunun və xalq–lider birliyinin vəhdətinin
nəticəsi kimi ölkənin tarixində yeni inkişaf mərhələsinin əsasını qoyub.
Qlobal təhlükəsizlik mühitinin mürəkkəbləşdiyi,
müxtəlif bölgələrdə münaqişələrin davam etdiyi bir şəraitdə Azərbaycanda
sabitliyin və təhlükəsizliyin qorunması xüsusi əhəmiyyət daşıyır. Ölkədə mövcud
olan sabit ictimai-siyasi mühit iqtisadi inkişafın davamlılığını, sosial
rifahın yüksəlməsini və beynəlxalq əməkdaşlığın genişlənməsini təmin edən əsas
amillərdəndir.
Eyni zamanda, Azərbaycanın əldə etdiyi uğurlar
və beynəlxalq nüfuzunun artmasından narahat olanlar da az deyil. Son illərdə
müxtəlif platformalarda özlərini "müstəqil bloger", "media fəalı"
və ya "siyai şərhçi" kimi təqdim edən bəzi antimilli ünsürlərin ölkəmiz
haqqında qərəzli məlumatlar yayması, Azərbaycanın beynəlxalq imicinə xələl gətirməyə
yönəlmiş kampaniyalarda xüsusi canfəşanlığı təəssüf doğurur. Tənqidi fikir və
ifadə azadlığı demokratik cəmiyyətin mühüm prinsiplərindən olsa da, qəsdən
dezinformasiyanın yayılması, faktların təhrif edilməsi, təhqir və qarayaxma
kampaniyalarının aparılması milli maraqlarla ziddiyyət təşkil edir.
Azərbaycanın son illərdə əldə etdiyi real nəticələr,
beynəlxalq tərəfdaşlarla uğurlu əməkdaşlığı, iqtisadi göstəriciləri və həyata
keçirdiyi qlobal layihələr göstərir ki, qərəzli informasiya kampaniyaları
sözsüz ki, ölkənin inkişafına təsir göstərə bilmir. Əksinə, ölkəmizin artan
beynəlxalq nüfuzu, yeni tərəfdaşlıqların qurulması və həyata keçirilən strateji
layihələr bu cür cəhdlərin nəticəsiz qaldığını nümayiş etdirir.
Müasir beynəlxalq münasibətlər sistemi bir
daha sübut edir ki, güclü lider milli maraqları qoruya, cəmiyyətdə həmrəylik
yarada, dövlətin strateji inkişaf kursunu müəyyənləşdirə və ölkəsini beynəlxalq
arenada layiqincə təmsil edə bilir. Azərbaycanın son illərdə qazandığı uğurlar
da həyata keçirilən məqsədyönlü siyasətin və dövlət–xalq birliyinin nəticəsidir.
Könül NURULLAYEVA,
Milli Məclisin deputatı
