Zəngəzur dəhlizinin açılması təkcə Azərbaycan ilə Ermənistan arasında münasibətlər məsələsi deyil, həm də bütün Türk dünyası üçün əhəmiyyətli bir təşəbbüsdür. Bu marşrut sayəsində türk dövlətlərinin fəal inteqrasiyası yolunda maneələr aradan qaldırılacaq.
AZƏRTAC xəbər verir ki, bu fikri Ankara Hacı Bayram Vəli Universitetinin dosenti Levent Ersin Orallı “Star” qəzetinin əməkdaşına söyləyib.
Onun sözlərinə görə, Azərbaycanın qətiyyətli mövqeyi və Türkiyənin strateji dəstəyi geosiyasi uğura nail olmağa - Zəngəzur dəhlizinin açılışını yaxınlaşdırmağa imkan verib. “Strateji arteriya Mərkəzi Asiyadan İstanbula qədər “türk qurşağı” yaradacaq, türk dövlətlərinin təkcə iqtisadiyyatlarını deyil, həm də mədəniyyətlərini və vətəndaşlarının qəlblərini bir araya gətirməyə imkan verəcək”, - deyə E.Orallı 44 günlük Vətən müharibəsində Qələbə ilə Azərbaycanın beynəlxalq mövqelərinin xeyli möhkəmləndiyini vurğulayıb.
“Respublika təkcə döyüş meydanında deyil, həm də danışıqlar masası arxasında öz gücünü nümayiş etdirdi. Regionda güc balansını nəzərə alan rəsmi Bakının diplomatiyasının dəqiq tələbləri və qətiyyəti Zəngəzur dəhlizinin açılmasının faydalarını dünyaya tam göstərdi”, - deyə ekspert qeyd edib.
Universitetin dosenti diqqətə çatdırıb ki, Azərbaycanın qərb bölgələri ilə Naxçıvan Muxtar Respublikası arasında marşrut logistik xərcləri azaldacaq, ticarətin miqyasını artıracaq, mədəni əlaqələri fəallaşdıracaq və bununla da “Bir millət, yeddi dövlət, bir gələcək” strateji Konsepsiyasının həyata keçirilməsi üçün zəmin yaradacaq.
O, Ankara və Bakının regionda əlaqələndirilmiş diplomatik səylərinin uğuruna diqqət çəkib, bildirib ki, bu da bir çox cəhətdən avqustun 8-də Vaşinqtonda keçirilən görüşün əsasını formalaşdırıb.
“Zəngəzur dəhlizi sayəsində Cənubi Qafqaz artıq münaqişə bölgəsi deyil, əməkdaşlıq və inkişaf zonası kimi qəbul ediləcək. Bu, gələcək nəsillərə miras qalacaq dəyərli irsdir. Azərbaycanın iradəsi və qətiyyəti, Türkiyənin strateji baxışı ilə birlikdə bütün dünyaya göstərdi ki, Türk dünyası naminə birgə səylər istənilən maneələri dəf edə bilir, gələcəyə yol açır”, – deyə L.Orallı sözünü yekunlaşdırıb.
