Ukrayna və ABŞ texniki məsləhətləşmələr aparıb, Qara dənizin və enerji infrastrukturunun təhlükəsizliyini müzakirə ediblər. Tərəflər əsas diqqəti hərbi əsirlərin azad edilməsi və deportasiya olunmuş ukraynalı uşaqların geri qaytarılması məsələsinə yönəldiblər.
AZƏRTAC xəbər verir ki, bu barədə görüşdə iştirak edən Ukraynanın müdafiə naziri Rustem Umerov feysbuk səhifəsində məlumat verib.
“Ukrayna Prezidentinin tapşırığını yerinə yetirərək, ədalətli sülhün yaxınlaşması və dövlətimizin təhlükəsizliyinin təmin edilməsi istiqamətində işi davam etdiririk. Bu görüş Ciddədə ABŞ-la uğurlu məsləhətləşmələrin məntiqi davamıdır. Heç kim ukraynalılardan çox ədalətli sülhə can atmır, bizim mövqeyimiz dürüst, şəffaf və ardıcıl olaraq qalır", - deyə Umerov bildirib.
Tərəflər Qara dənizdə təhlükəsiz naviqasiyaya zəmanət vermək və kommersiya gəmilərinin hərbi məqsədlər üçün istifadəsini qadağan etmək barədə razılığa gəliblər. Bölgədə güc tətbiqinə son qoyulması da razılaşdırılıb.
Ukrayna qeyd edir ki, Rusiya hərbi gəmilərinin Şərqi Qara dənizdən kənara çıxması razılaşmaları pozacaq. Bu cür hərəkətlər olarsa, Kiyev özünümüdafiə hüququnu özündə saxlayır.
Ukrayna və Rusiyanın enerji infrastrukturuna hücumların tam qadağan edilməsi ilə bağlı razılıq əldə olunub. Bu, regionda enerji vəziyyətinin sabitləşməsinə kömək edəcək. Tərəflər enerji və dəniz sazişlərinin icrasına nəzarət etmək üçün üçüncü ölkələrin cəlb edilməsini dəstəkləyir. Bu, onların səmərəli həyata keçirilməsini təmin edəcəkdir.
Davamlı sülhə nail olmaq məqsədilə danışıqlar davam etdiriləcək. Tərəflər bu istiqamətdə gələcək addımlar üzərində işləyəcəklər. Birləşmiş Ştatlar hərbi əsirlərin mübadiləsi, mülki şəxslərin azad edilməsi və deportasiya olunmuş ukraynalı uşaqların geri qaytarılmasına dəstəyini təsdiqləyib. Bu məsələ danışıqlarda əsas məsələlərdən biri olaraq qalır.
Sazişlərin həyata keçirilməsi üçün ən qısa zamanda əlavə texniki məsləhətləşmələr aparılacaq. Onlar təfərrüatları, monitorinq və nəzarət mexanizmlərini razılaşdırmağa kömək edəcəklər.
