"Rusiya mətbuatında Azərbaycana qarşı kampaniyanın davam etməsi, eləcə də Rusiya Prezidentinin xüsusi nümayəndəsi Mixail Şvıdkoyun Xankəndidə Ayvazovskinin büstünün sökülməsi məsələsinə dair açıqlamasının ardınca bu hücumların daha da radikallaşması, habelə dövlət xəbər agentliyi olan TASS tərəfindən Azərbaycanın Xankəndi şəhərinin "Stepanakert" adlandırılması Azərbaycana qarşı qonşuluq münasibətinə sığmayan addımdır".
Bu fikirləri "Azərbaycan" qəzetinə açıqlamasında Milli Məclisin deputatı Bəhruz Məhərrəmov deyib. O bildirib ki, Mixail Şvıdkoy və Rusiyanın şovnist və artıq faşist xislətinə bürünmüş məlum media orqanları Azərbaycan tərəfini "abidələrlə müharibədə", rus mədəniyyətinin "ləğv edilməsi" tədbirlərində günahlandırırlar: "Lakin Kreml əvvəldən başa düşməli idi ki, Rusiya sülhməramlıları tərəfindən Azərbaycan tərəfinin icazəsi olmadan torpaqlarımızda İvan Ayvazovskinin (Hovanes Ayvasyan) büstünün quraşdırılması beynəlxalq hüququn normalarında əks edilən prinsiplərə zidd olmaqla qanunsuz və ölkəmizin suverenliyinə münasibətdə hörmətsizlik idi. Bu mənada yaxşı olardı ki, ən azı sülhməramlılar Azərbaycanı tərk edərkən buraxılmış bu kobud səhvin nəticələrini aradan qaldırardı. İşğaldan azad edilmiş ərazilərimizdə özünün də gözü ilə gördüyü Natəvan, Üzeyir bəy Hacıbəyli, Bülbül və digər mədəniyyət xadimlərimizin abidələrinə qarşı vandallıqlara, habelə Azərbaycan ərazisində törədilmiş dağıntılarla bağlı susması mədəniyyət siyasətinə məsul şəxs kimi cənab Şvıdkoyun Ayvazovskinin abidəsinin sökülməsinə münasibətdə həssaslığı sadəcə sözün əsl mənasında saxtakarlıqdır. Üstəlik, nə qədər gülünc olsa da, cənab Şvıdkoy məsələni Azərbaycanda Rusiya mədəniyyətinin "ləğv edilməsi" iddiaları ilə şərh etməyə çalışır".
Deputatın sözlərinə görə, Azərbaycanda rus teatrı, rus dilində məktəblər, nəşrlər olduğu halda, Rusiyada Azərbaycan dilində teatr, məktəb, qəzet və jurnallar mövcud olmadığı disparitet şəraitində bu cür iddialar deməyə əsas verir ki, Bakı şimal qonşumuzun bu reallığı görməməsi fonunda həmin disparitetə düzəlişlər etməlidir. Rusiya tərəfinin bu kimi davranışları sanki rus mədəniyyəti, incəsənəti ədəbiyyatı olmadan Azərbaycanda, bütövlükdə MDB məkanında mədəniyyət mühiti və mənzərəsinin yoxsulluğu ab-havası formalaşdırmağa çalışır. "Sirr deyil ki, istər çar Rusiyası, istərsə də Sovetlər Birliyi dönəmində şimal qonşumuzun elmi-mədəni mühitinin Azərbaycana və digər ittifaq respublikalarına da bu və ya digər formada təsiri olub. Ötən dövr ərzində ölkəmiz Rusiya ilə mədəni-humanitar sahədə əməkdaşlığa böyük önəm verib. Lakin bütün bunlar heç kimə, o cümlədən heç bir Rusiya rəsmisinə bu ölkənin tədbirləri olmadan Azərbaycan mədəni mühitinin mənzərəsinin yoxsul qalacağı barədə yanlış təsəvvür yaratması üçün əsas ola bilməz. Əksinə, Azərbaycanda bir çox sahələr, o cümlədən elmi, mədəni, incəsənət və ədəbi istiqamətlərin tarixi Rusiya dövlətinin özünün tarixindən daha qədimdir. İndiki məqamda Şvıdkoy və digər Rusiya rəsmiləri bu kimi şovinist, qızışdırıcı və faydasız bəyanatlardan çəkinərək ölkələrimiz arasında müşahidə olunan və hər kəsdən öncə Moskvanın özünün Qafqazda maraqlarına zərbə olan arzuolunmaz situasiyanın dinc yolla aradan qaldırılmasına diqqət yetirməsi yaxşı olar", - deyə o əlavə edib.
B.Məhərrəmov söyləyib ki, Azərbaycan ümumbəşəri dəyərlərə sadiq qalaraq bütün dünya xalqları ilə dostluq, sülh və əmin-amanlıq şəraitində yaşamağı və bu məqsədlə qarşılıqlı fəaliyyət göstərməyi özünün konstitusion niyyətlərindən biri kimi müəyyən edib: "Biz başqa dövlətlərlə, o cümlədən Rusiya ilə münasibətlərimizi hamılıqla qəbul edilmiş beynəlxalq hüquq normalarında nəzərdə tutulan prinsiplər əsasında qurmağa üstünlük veririk. Prezident İlham Əliyevin böyük uğurla realizə etdiyi və Azərbaycanın hərbi-siyasi zəfərlərini birmənalı şəkildə beynəlxalq müstəvidə möhkəmlədən çoxvektorlu xarici siyasət kursumuz beynəlxalq münaqişələrin həlli üsulu kimi müharibəni rədd edir və biz hətta ərazilərimizi 30 il işğalda saxlamış Ermənistanla belə sülhün və əməkdaşlıq mühitinin təşəbbüskarı kimi çıxış edirik. O cümlədən də 200 ildən artıq tarixi, hüquqi, siyasi, mədəni və humanitar əlaqələrə malik olduğumuz Rusiya ilə münasibətlərin hər hansı formada korlanmasında maraqlı deyilik. Lakin hesab edirik ki, Rusiya özü də reallıqları görməli, xüsusən Azərbaycanın hərbi-siyasi qələbələrindən sonra Cənubi Qafqazda maraqlarının təmininin yalnız ölkəmizlə bərabərhüquqlu əməkdaşlıqdan keçdiyini başa düşməli və Bakı ilə Moskva arasında bu günə qədər imzalanan sənədlərə və ən əsası, öz imzasına hörmətlə yanaşaraq davranışlarında beynəlxalq hüququn aliliyini rəhbər tutmalıdır".
Hazırda Azərbaycan və Rusiya arasında münasibətlərin gərgin dövr yaşadığını qeyd edən deputat bu gərginliyin Bakıdan qaynaqlanmadığını və Azərbaycanın ən qısa müddətdə Rusiya ilə münasibətlərin yaxşılaşdırılması və gərginliyə səbəb olan amillərin aradan qaldırılmasını arzu etdiyini bildirib: "Rusiyanın Azərbaycan Hava yollarına məxsus təyyarəni vurduqdan sonra bu cinayəti ört-basdır etməsi, daha sonra bu ölkədə yaşayan Azərbaycan diasporunun fəallarına qarşı terror siyasəti iki ölkə arasında münasibətlərin normallaşması üçün həllini gözləyən məsələlərdir. Lakin Rusiyada ayrı-ayrı dairələrin məsələlərin həllinə, Rusiya-Azərbaycan münasibətlərinin nizamlanmasına, beləliklə, milli maraqlara xidmət edən bu kimi problemlərə diqqət yönəltməkdənsə, Bakının ünvanına təhdid dolu bəyanatlar səsləndirməsi absurd görünür. Hər kəs əmin ola bilər ki, bu tip şovinist dairələr Azərbaycana deyil, əslində, Rusiyanın Cənubi Qafqazdakı maraqlarına bərpaolunmaz zərər vurmaqdadır. Lakin gördüyünüz kimi, Azərbaycan dövləti, cəmiyyəti və mediamız bu kimi bəyanatlar qarşısında kifayət qədər təmkinli və praqmatik davranmaqda, dövlət maraqlarının bu gün Rusiyada müşahidə olunduğu kimi populist bəyanatlarla yox, ötən dövrün effektiv nümunələrinə əsaslanaraq təmininə inam ifadə edir".
Siyasətçi deyib ki, bütün bunların fonunda dövlət mediası və informasiya agentliyində işğala, separatizmə dəstək verən mövqe bölgədə heç bir formada Moskvanın maraqlarının müdafiəsi kimi təqdim oluna bilməz, əksinə yalnız və yalnız Rusiyanın beynəlxalq hüquqa hörmət etməyən qlobal işğalçı imicini möhkəmləndirir: "Bu mənada istər Rusiya rəsmiləri, istərsə də özünün müstəqil təhlil qabiliyyətini itirmiş tezislərlə hərəkət edən, çirkli kampaniyaların alətinə çevrilmiş muzdlu rus mediası Azərbaycana uğursuz hücum cəhdlərinin fayda və zərərlərini tərəziyə qoyaraq itkilərin faydalardan çox olacağını anlamalıdır".
Əsmər QARDAŞXANOVA,
"Azərbaycan"
