ABŞ mərkəzi ordu komandanlığı Müdafiə Nazirliyinə müraciət edərək hərbi əməliyyatların uğurla davam etdirilməsi üçün əlavə şəxsi heyət və silah-sursat istəyib. “Politica” nəşri yazır ki, bu istək müharibənin daha 100 gün davam edəcəyini göstərir.
AZƏRTAC xəbər verir ki, əgər hərbi əməliyyatlar sentyabr ayına kimi davam etsə onda dünya iqtisadiyyatı dərin böhran vəziyyətinə düşəcək.
Məsələ heç də Hörmüz boğazının bağalanaraq dünya bazarını neft ixracının məhdudlaşdırılmasında deyil. Körfəz ölkələri idxaldan asılıdır. Coğrafi baxımdan Yaxın Şərq ölkələrinin ərazisi əsasən səhralıqdır. Ona görə də ərzaq mallarından tutmuş digər gündəlik istehlak mallarına qədər hamısı idxal edilir. Bütün bu idxal-ixrac əməliyyatları isə məhz Körfəz vasitəsilə həyata keçirilir. Müharibə təkcə neft və neft məhsullarının deyil, bütün məhsulların bahalaşmasına gətirib çıxarıb ki, bu da dövlətlərin narahatlığına səbəb olub.
“The New York Times” yazır ki, Yaxın Şərqdə ABŞ-nin keçirdiyi hərbi əməliyyatlar yanacağın qiymətinin artmasına səbəb olub ki, bu da zəncirvari reaksiya kimi bütün istehlak mallarının bahalaşmasına gətirib çıxarıb. Rəsmi Vaşinqton bir həftə ərzində hərbi əməliyyatları bitirib İran hakimiyyətini devirəcəyini düşünsə də hadisələr planlaşdırıldığı kimi olmadı. Qəzet yazır ki, dünya bazarında neft və qazın bahalaşması ilk növbədə ABŞ iqtisadiyyatına mənfi təsir göstərir.
Mövcud vəziyyət ilə bağlı Prezident Donald Tramp bəyan edib ki, Körfəzdən neft daşımaq heç də təhlükəli deyil. Onun sözlərinə görə, ABŞ-nin hərbi dəniz donanması neft daşıyan tankerləri mühafizə edəcək. Hətta ABŞ Prezidenti bildirib ki, vurulan tankerlərin sahiblərinin zərərini özü qarşılayacaq. Lakin bu bəyanata baxmayaraq Körfəzdən neft daşınması dayanıb. Heç bir sığorta şirkəti Hörmüz boğazından keçəcəyini biləndən sonra tankerləri sığortalamır.
Beləliklə, ABŞ-nin başlatdığı hərbi əməliyyatlar dünya neft bazarında gərgin vəziyyət və bahalaşmaya səbəb olub ki, bu da öz növbəsində dünya üzrə bütün istehlak mallarını bahalaşdırıb.
