Mayası ikili standartlardan yoğrulmuş təsisat

"Mayası ikili standartlardan yoğrulmuş AŞPA Azərbaycana qarşı bu "standart"ları tətbiq etməkdən yorulmur. Bu usanmazlığın növbəti təzahürüdür ki, sözügedən təsisat Azərbaycana qarşı davamlı qərəzçilik mövqeyi sərgiləyir".

Bu fikirləri "Azərbaycan" qəzetinə Milli Məclisin deputatı Azər Badamov deyib. O bildirib ki, bu günü analiz etməmişdən əvvəl çox uzağa da getmədən COP29 ərəfəsini xatırlamaq kifayətdir. Bu önəmli tədbir ərəfəsində də bütövlükdə səs-səsə, avaz-avaza verilərək Qərb təsisatları tərəfindən Azərbaycan əleyhinə silsilə məqalələr yazıldı, böhtan xarakterli fikirlər səsləndirildi. "Məsələn, Avropa Parlamenti Natali Loiseau tərəfindən irəli sürülən "Azərbaycanda vəziyyət, insan hüquqlarının və beynəlxalq hüququn pozulması və Ermənistanla münasibətlər" adlı böhtan xarakterli qətnaməni Azərbaycana qarşı qəbul etməklə dünya ermənilərinin mənafeyinə oynanıldı. Hətta Natali bildirirdi ki, o, Avropa Parlamenti üzvlərinin böyük əksəriyyətini Azərbaycanla bağlı COP29 ərəfəsində onlara təqdim etdiyi qətnamənin lehinə səs verməyə inandırmaqdan qürur duyur. Qürurun səbəbinə baxın. Azərbaycan deyir dünya birliyi olaraq bəşəriyyətin ümumi problemlərinə qarşı birlikdə mübarizə aparaq, regionda sülh olsun, bölgə xalqları rifah içində yaşasın, bu "siyasətçi"lər nifaq salır, ikitərəflilik yaradırlar. Onu da nəzərə alaq ki, bu qadın Ermənistan ərazisinə Aİ-nin genişləndirilmiş missiyasının göndərilməsini də fəal şəkildə müdafiə edirdi", - deyə deputat əlavə edib. 

O, Avropa diplomatiyasının keçmiş rəhbəri Cozep Boreli də xatırladıb. Borel canfəşanlıqla "münaqişələrin güc yolu ilə həllinin qadağan edilməsi ilə bağlı" təxribat xarakterli bəyanatlarını dövriyyəyə cəlb etmək üçün müxtəlif kürsülərdən, siyasi kluarlardan hər fürsətdə istifadə edirdi. Avropa Şurasının İnsan Hüquqları üzrə Komissarı Maykl O'Flaherti "Azərbaycan: hakimiyyət həbsdə olan hüquq müdafiəçilərini, jurnalistləri və vətəndaş cəmiyyəti fəallarını azad etməlidir" başlıqlı reallıqdan tamamilə uzaq, absurd müraciət ünvanlamışdı. 

A.Badamov vurğulayıb ki, AŞPA ilə münasibətlərdə yaranan dərin böhran və qırılan iplər məhz Frank Şvabenin "əməyi"nin nəticəsidir: "Şvabe münasibətləri yenə gərginləşdirmək yolunu tutaraq Azərbaycanda şəffaf seçkinin, real müxalifətin olmadığından, demokratiyanın yoxluğundan "bəhs edir". Cənab Şvabe unutmamalıdır ki, müxalifət deyərkən öz fikirlərindəki şəxsləri nəzərdə tutursa, reallıq sizə sosial bazası olmayan kəsləri göstərəcək. O kəsləri ki, Azərbaycan cəmiyyəti birmənalı qaydada əlinin tərsi ilə geri çevirib. Azərbaycana barmaq sallamaqla nəyəsə nail olmaq alınmayacaq. Münasibətlərin normal məcraya dönməsinin yolu ikili standartları dayandırmaqdan, bütün ali qanunları Azərbaycana da eynilə tətbiq etməkdən keçir".

Deputat qeyd edib ki, bu təsisatlar dildə insan faktorunun önəmini qabartsalar da, siyasətləri kimi əməlləri də nəinki Azərbaycana qarşıdır, dünya xalqları üçün də zəhər saçırlar. Belə ki, ötən il yayınlanmış bir hesabatda Avropanın çox təhlükəli hesab edilən məhsulları bütün dünyaya necə satdığı tənqid olunurdu. Bildirilirdi ki, "Amnesty International Greenpeace" 100-dən çox qeyri-hökumət təşkilatına qoşulur və Avropa İttifaqını AB-dəki şirkətlərə Avropada qadağan olunmuş məhsulların dünyanın digər hissələrinə ixracını qadağan etməyə, insanlara, ətraf mühitə daha çox zərər vurmağı dayandırmağa çağırır. Aİ-də qadağan edilmiş müşahidə və digər zərərli texnologiyaların ixracına icazə verilməsi, bir tərəfdən Aİ-ni "təhlükəsiz, etibarlı və etik Süni İntellektin" təşviqində qlobal lider kimi təqdim edən, digər tərəfdən isə Aİ şirkətlərinin dünyanın qalan hissəsinə Aİ sistemlərini satmasını dayandırmaqdan imtina edən Aİ qanunvericiləri tərəfindən açıq-aşkar ikili standartdır. Bunu biz yox, özləri deyir. Deməli, ikili standartlar bu təsisatların canına hopub. 

A.Badamov bildirib ki, Azərbaycan otuz ilə yaxın zaman çərçivəsində qaçqın və məcburi köçkün problemindən əziyyət çəkəndə fəaliyyətinin ana xəttini insan haqları üzərində quran AŞPA bir milyon insanı necə görməzdən gələ bilib? Onlar rahat yolu tutaraq, bu insanlıq dramına məhəl qoymamağı seçdilər. Azərbaycan öz suverenliyini və ərazi bütövlüyünü tam bərpa edən kimi bizi dərhal "etnik təmizləmə" aparmaqda ittiham edirlər. Bir amilin üzərində hər zaman dayanmalıyıq ki, Azərbaycan beynəlxalq hüququn bir bəndini belə pozmadan öz suverenliyini və ərazi bütövlüyünü bərpa edib. Azərbaycana gələndə bu təsisatlar çox yox, ikicə anlayışı obyektivlik və reallıqdan uzaq məfhumlarını sanki beyinlərindən silirlər. Halbuki AŞPA siyasiləşmədən uzaq durmalıdır. Təəssüf ki, AŞPA hər keçən gün öz ideallarından bir addım daha uzaq düşür. İmkan yaranan kimi Azərbaycana qarşı növbəti, bitib-tükənməyən siyasi avantüranın həyata keçirilməsi düyməsinə basılır. Ünvanlarını ədalətin ünvanı deyə müəyyənləşdirsələr də, əslində, AŞPA-nı lobbi qruplarının kiçik məntəqəsinə çevirməklə təsisatı cılızlaşdırırlar.

Əsmər QARDAŞXANOVA,

"Azərbaycan"