Livanın paytaxtı Beyrutda Azərbaycan səfirliyi qarşısında toplaşan erməni əsilli bir qrup şəxsin təhlükəsizlik qüvvələrinə hücumu nəticəsində 25 polis əməkdaşı yaralanıb.
Livanın Daxili İşlər Nazirliyinə tabe olan Daxili Təhlükəsizlik Qüvvələri cümə axşamı təxminən 1500 nəfərdən ibarət erməni əsilli qrupun Azərbaycan səfirliyinin binasına yürüş etmək cəhdindən sonra baş verən hadisələrlə bağlı yazılı açıqlama yayıb. 
Ölkənin rəsmi NNA agentliyinin yaydığı bəyanatda qeyd olunub ki, erməni əsilli Livan vətəndaşları tərəfindən təşkil edilən aksiya zamanı 25 təhlükəsizlik əməkdaşı xəsarət alıb, onlardan ikisi ağır yaralanıb.
Bəyanatda qeyd edilir ki, təhlükəsizlik qüvvələri “Daxili Təhlükəsizlik Qüvvələrinin Təşkili haqqında” Qanunun 1-ci maddəsinə uyğun olaraq diplomatik nümayəndəliklərin mühafizəsinə cavabdehdirlər. Sənəddə vətəndaşlara qanunlara hörmətlə yanaşmağa və məsuliyyət ruhu ilə hərəkət etməyə çağırışı yer alıb.
Zorakılıq və dağıdıcı hərəkətlərin olduğu hücum zamanı nümayişçilər təhlükəsizlik qüvvələrinə fişənglər, daş, taxta, şüşə butulkalar və tərkibində rəngli boyalar olan əşyalar atıblar.
Səfirliyin yerləşdiyi küçənin əvvəlində təhlükəsizlik qüvvələri istehkam quraraq Livandakı erməni daşnak partiyasına mənsub izdihamı keçirməyə imkan verməyib.
Bunadan sonra etirazçılar təhlükəsizlik qüvvələrinə hücum ediblər. Polis izdihamı dağıtmaq üçün gözyaşardıcı qaz və su şırnaqlarından istifadə edərək cavab verib.

“Azərbaycan”