Sosial Tədqiqatlar Mərkəzində “Bakı şəhərinin mövcud mənzil fondunun inkişafında yeni gözləntilər” mövzusunda elmi-praktik konfrans keçirilib.
AZƏRTAC xəbər verir ki, müxtəlif dövlət qurumları, tənzimləyici orqanlar, ekspert dairələri və akademik ictimaiyyətin nümayəndələrinin iştirak etdiyi tədbirin əsas məqsədi Bakının mövcud yaşayış fondunun cari vəziyyəti və gələcək inkişaf istiqamətlərinə dair institusional dialoqu gücləndirməkdir.
Tədbirdə çıxış edən məruzəçilər urbanizasiya prosesi, binaların istismar müddəti və əmlak bazarındakı yeni tendensiyalarla bağlı önəmli fikirlər səsləndiriblər.
Sosial Tədqiqatlar Mərkəzinin sədri Zahid Oruc çıxış edərək bildirib ki, 2040-cı ilə qədər Bakıda yaşayış fondunun ümumi sahəsi 2020-ci illə müqayisədə 64 faiz artırılaraq 47 milyon kvadratmetrdən 78 milyon kvadratmetrə çatdırılacaq. Qeyd edilib ki, mənzil fondunun sürətlə böyüməsi əhalinin məskunlaşmasını da sürətləndirir.
“Ərazidə iqtisadi şərtlər daşınmaz əmlaka sərmayə qoyuluşunun artmasını və mənzil tikintisinin vüsət almasını şərtləndirir. Lakin əhali axını Bakının mənzil bazarına təzyiqləri artırır. Yaşayış fondlarının yaradılmasında bölgələrarası fərqin səbəblərindən biri də budur”, - deyə o bildirib.
Eyni zamanda, enerji səmərəliliyi, mövcud infrastrukturun dayanıqlılığı və normativ tənzimləmələrə dair mühüm məqamlar gündəmə gətirilib. Konfrans çərçivəsində müasir şəhərsalma yanaşmaları və planlaşdırma modellərinin tətbiqi məsələləri də geniş nəzərdən keçirilib. İştirakçılar bir sıra konseptual təkliflərlə çıxış edərək mövcud mənzil fondunun təkmilləşdirilməsi üzrə alternativ yanaşmaları müzakirəyə çıxarıblar.
Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov bildirib ki, mənzil bazarında əlçatanlıq problemi qalmaqdadır, qiymətlərin yüksəkliyi xüsusilə orta və aşağıgəlirli qruplar üçün mənzil sahibi olma imkanlarına təsir göstərir. Qeyd edilib ki, mənzil fondunun inkişafında qiymət faktoruna bir neçə amil təsir edir: “Bunlardan birincisi enerji səmərəliliyi və ekoloji dayanıqlılıqdır. Müasir şəhərsalma trendləri yalnız kvadratmetrlə ölçülən daşınmaz əmlak deyil, həm də texnoloji cəhətdən təchiz olunmuş, ekoloji baxımdan davamlı və yaşamaq üçün rahat məkanlar tələb edir. İkinci mühüm istiqamət isə kiçik və orta sahibkarlığın mənzil sektoruna inteqrasiyasıdır. Biz agentlik olaraq hesab edirik ki, bu sahədə özəl təşəbbüslərin genişlənməsi təkcə yaşayış sahələrinin sayının artmasına yox, eyni zamanda, tikinti materialları sənayesindən xidmət sektoruna qədər olan bütün sahələrin inkişafına təkan verir. KOB-ların mənzil fondunun genişlənməsində rolu həm bu sahənin şaxələnməsi, həm də infrastrukturun lokallaşdırılması baxımından əhəmiyyətlidir”.
Konfransda əməkdaşlıq formatları, hüquqi mexanizmlər və bazar iştirakçılarının rolu konfransın əsas müzakirə mövzularından biri olub.
Ekspertlər tərəfindən mənzil fondunun yenilənməsi, rekonstruksiya tədbirlərində dövlət və özəl sektor arasında optimal balansın yaradılmasının vacibliyi vurğulanıb.
Aparılmış geniş təhlillər əsasında paytaxtın mənzil sektorunda kompleks yanaşmaların tətbiqi zərurəti bir daha təsdiqlənib.
jpg_1775472819.jpg)
